ລາວ-ກຳປູເຈຍ ເຫັນດີຖອນກຳລັງທະຫານຂອງຕົນ

15:15 | 29/08/2019

ກອງປະຊຸມພົບປະສອງຝ່າຍລະຫວ່າງສອງກອງທັບ ລາວ ແລະ ກຳປູເຈຍ ກ່ຽວກັບກຳນົດການຖອນກຳລັງທະຫານຂອງຕົນອອກຈາກບໍລິເວນໄຮ່ເຂົ້າຈຸດພິກັດ (E0523410N1579776) ເມືອງມຸນລະປະໂມກ ແຂວງ ຈຳປາສັກ ສປປ ລາວ ຈັດຂຶ້ນວັນທີ 27 ສິງຫາ 2019 ທີ່ດ່ານປະເພນີຫາງດອນຂະເໝົາ ເມືອງໂຂງ ແຂວງ ຈຳປາສັກ ຝ່າຍລາວນຳໂດຍທ່ານ ພົນຈັດຕະວາ ສຸໄກ ພິມມະສານ ຫົວໜ້າການທະຫານ ກອງບັນຊາການທະ ຫານແຂວງຈຳປາສັກ ເປັນຫົວໜ້າຄະນະ ແລະ ຝ່າຍກຳປູເຈຍນຳໂດຍທ່ານ ພົນຕີ ດວງຈັນ ຜູ້ບັນຊາການກອງ ພົນນ້ອຍທີ 9 ກອງທັບລາຊະອານາຈັກກຳປູເຈຍ ເປັນຫົວໜ້າຄະນະ.

ກອງປະຊຸມຄັ້ງນີ້ ໄດ້ພ້ອມກັນຕົກລົງເປັນເອກະພາບໃນບັນຫາສຳຄັນດັ່ງນີ້: ສອງຝ່າຍເຫັນດີຖອນກຳລັງທະຫານຂອງຕົນ ອອກຈາກບໍລິເວນໄຮ່ເຂົ້າຈຸດພິກັດ (E0523410N1579776) ກັບຄືນສູ່ຈຸດທີ່ຕັ້ງເດີມຂອງຕົນ ສອງຝ່າຍເຫັນດີເປັນເອກະພາບຈັດຕັ້ງຄະນະກຳມະການຮ່ວມເພື່ອສັງເກດການ ແລະ ກວດກາການຖອນກຳລັງທະ ຫານຂອງທັງສອງຝ່າຍ ເຊິ່ງກຳນົດເອົາຝ່າຍລະ 5 ຄົນ ແລະ ສອງຝ່າຍເຫັນດີກຳນົດເວລາການຈັດຕັ້ງປະຕິບັດ ການຖອນກຳລັງທະຫານຂອງຕົນອອກຈາກຈຸດດັ່ງກ່າວ ເລີ່ມແຕ່ເວລາ 8-11:00 ໂມງ ຂອງວັນທີ 29 ສິງຫາ 2019 ໃຫ້ສຳເລັດ.

ການຈັດກອງປະຊຸມຄັ້ງນີ້ ແມ່ນປະຕິບັດຕາມຄຳສັ່ງຂອງສອງນາຍົກລັດຖະມົນຕີ ລາວ ແລະ ກຳປູເຈຍ ເຊິ່ງກອງປະຊຸມຄັ້ງນີ້ ໄດ້ດຳເນີນໄປດ້ວຍຜົນສຳເລັດຢ່າງຈົບງາມບົນພື້ນຖານໄມຕີຈິດມິດຕະພາບ ແລະ ຄວາມເຂົ້າອົກເຂົ້າໃຈເຊິ່ງກັນ ແລະ ກັນເປັນຢ່າງດີ ເພື່ອສ້າງໃຫ້ຊາຍແດນສອງປະເທດເປັນຊາຍແດນແຫ່ງສັນຕິພາບ ມິດຕະພາບ ແລະ ການພັດທະນາຢ່າງແທ້ຈິງ.

（ແຫຼ່ງຂໍ້ມູນ： vientianemai.net）