 |
ກອງປະຊຸມຄະນະຊີ້ນໍາໂຄງການຂັ້ນສູນກາງ ຄັ້ງທີ 5.
ຄະນະຊີ້ນຳ ໂຄງການ ຄຖລ ໄດ້ຈັດກອງປະຊຸມ ຄັ້ງທີ 5 ຂຶ້ນໃນວັນທີ 28 ສິງຫາ 2019 ທີ່ນະຄອນຫລວງວຽງຈັນ ເພື່ອປຶກສາຫາລືການແກ້ໄຂ ຂໍ້ຄົງຄ້າງ ແລະ ແຜນການໃນຕໍ່ໜ້າຂອງໂຄງການດັ່ງກ່າວ ເພື່ອນຳເອົາບົດຮຽນ ແລະ ປະສົບການໄປຜັນຂະຫຍາຍ ແລະ ພັດທະນາ ເຂົ້າໃນການປະຕິບັດກິດຈະກຳ ຂອງໂຄງການໄລຍະທີ 2 ໃຫ້ຖືກຕ້ອງຕາມລະບຽບການ ແລະ ສອດຄ່ອງ ກັບແນວທາງ ນະໂຍບາຍຂອງລັດຖະບານ ແນໃສ່ເຮັດໃຫ້ໂຄງການສາມາດ ດຳເນີນໄປຕາມກອບຂອງໂຄງການ ໃຫ້ມີປະສິດທິພາບສູງຂຶ້ນ. ໂອກາດນີ້, ທ່ານ ອານຸພາບ ຕຸນາລົມ ຮອງເຈົ້າຄອງນະຄອນ ຫລວງວຽງຈັນ, ປະທານຊີ້ນໍາໂຄງການ ຄຖລ ໄລຍະທີ 1ກ່າວວ່າ: ການຈັດຕັ້ງປະຕິບັດ ໂຄງການໄລຍະທີ 1 ໄດ້ເລີ່ມມາແຕ່ປີ 2013 ໂດຍໄດ້ຮັບທຶນສະໜັບສະໜູນ ຈາກທະນາຄານພັດທະນາອາຊີ(ADB) ຈຳນວນ 36,5 ລ້ານໂດ ລາສະຫະ ລັດ ເຊິ່ງເປັນເງິນກູ້ຢືມ 24 ລ້ານໂດລາສະຫະລັດ, ເງິນຊ່ວຍເຫລືອລ້າ 12,5 ລ້ານໂດລາສະຫະລັດ ແລະ ລັດຖະບານສົມທົບ 59 ລ້ານໂດລາສະຫະລັດ.
ໂຄງການນີ້ ໄດ້ມີຜົນສຳເລັດຫລາຍໜ້າວຽກ ເປັນຕົ້ນ: ກໍ່ສ້າງ-ຕິດຕັ້ງສະຖານີອຸຕຸນິຍົມ ແລະ ອຸທົກກະສາດ ທີ່ທັນສະໄໝ ຈຳນວນ 27 ສະຖານີຢູ່ແຂວງ ສະຫວັນນະເຂດ, ຄຳມ່ວນ ແລະ ນະຄອນຫລວງວຽງຈັນ; ເພີ່ມຂີດຄວາມສາມາດ ທາງດ້ານຂໍ້ມູນ-ຂ່າວສານ, ຄວາມຮູ້ກ່ຽວກັບການຄຸ້ມຄອງ ຄວາມສ່ຽງຈາກໄພນ້ຳຖ້ວມ ແລະ ແຫ້ງແລ້ງ, ສ້າງຄວາມເຂັ້ມແຂງໃຫ້ຊຸມຊົນ ໃນການຄຸ້ມຄອງໄພພິບັດ ທີ່ອາດເກີດຂຶ້ນ. ພ້ອມທັງພັດທະນາໂຄງລ່າງພື້ນຖານ ໃນການຄຸ້ມຄອງນ້ຳ ໂດຍການກໍ່ສ້າງຄູປ້ອງກັນນ້ຳຖ້ວມ, ຊົນລະປະທານ, ປະຕູລະບາຍນ້ຳ ແລະ ສະຖານີເຕືອນໄພ ຢູ່ຈຸດທີ່ມີຄວາມສ່ຽງຕາມເຂດແມ່ນ້ຳຂອງ ໃນຂອບເຂດທົ່ວປະເທດ.
ທ່ານ ປະທານຊີ້ນຳໂຄງການ ກ່າວຕື່ມວ່າ: ໃນໄລຍະຜ່ານມາ ພື້ນທີ່ສ່ວນໃຫຍ່ລຽບຕາມແມ່ ນ້ຳຂອງໄດ້ໄດ້ຮັບຜົນກະທົບ ຈາກເຫດການນ້ຳຖ້ວມ ເຊິ່ງມັນ ໄດ້ສົ່ງຜົນເສຍຫາຍຕໍ່ກັບຊີວິດ ແລະ ຊັບສິນຂອງປະຊາຊົນ ໃນນະຄອນຫລວງວຽງຈັນ ຢ່າງຫລວງຫລາຍ ໂດຍສະເພາະໃນເຂດພື້ນທີ່ກະສິກຳ ແລະ ເຂດເສດຖະກິດ. ສະນັ້ນ, ລັດຖະບານ ຈຶ່ງສືບຕໍ່ໂຄງການໄລຍສອງ ເພື່ອແກ້ໄຂບັນຫາດັ່ງກ່າວໃຫ້ຫລຸດລົງ.
（ແຫຼ່ງຂໍ້ມູນ： ຂປລ）
