 |
ທົ່ວປະເທດ ໄຂສົກຮຽນໃໝ່ 2019-2020 ຢ່າງຟົດຟື້ນ
ໃນໂອກາດດັ່ງກ່າວ, ທ່ານ ຊົມພູ ແກ້ວປັນຍາ ຫົວໜ້າພະແນກສຶກສາທິການ ແລະ ກິລາ ນະຄອນຫລວງວຽງຈັນ ໃຫ້ຮູ້ວ່າ: ປັດຈຸບັນ ວຽກງານການສຶກສາ ໄດ້ມີການຂະຫຍາຍຕົວດ້ານປະລິມານ ແລະ ຄຸນນະພາບ ຈຳນວນໂຮງຮຽນ, ຫ້ອງຮຽນ, ຄູສອນ ແລະ ນັກຮຽນ ມີຈຳນວນເພີ່ມຂຶ້ນ; ການສຶກສາ ໄດ້ຮັບການພັດທະນາ ຄົບຕາມ 3 ລັກສະນະ ແລະ 5 ຫລັກມູນ ຂອງການສຶກສາ ເຊິ່ງໄດ້ຂະຫຍາຍຕາໜ່າງໄປສູ່ທ້ອງຖິ່ນ ແລະ ເຂດຊົນນະບົດຫ່າງໄກ. ພ້ອມນີ້ ຍັງມີຫລາຍໂຄງການ ໄດ້ນຳໄປຈັດຕັ້ງປະຕິບັດຢູ່ບັນດາເມືອງ, ບ້ານ ແລະ ກຸ່ມບ້ານພັດທະນາ ເປັນຕົນແມ່ນການຂະຫຍາຍ ໂຮງຮຽນອານຸບານ ຫລື ຫ້ອງກຽມປະຖົມ ເຊິ່ງເຮັດໃຫ້ຈຳນວນໂຮງຮຽນ, ສະຖານທີ່ຮຽນ, ຫ້ອງຮຽນເພີ່ມຂຶ້ນ ແລະ ໄດ້ເປັນເງື່ອນໄຂໃຫ້ແກ່ປະຊາກອນ ໃນແຕ່ລະກຸ່ມເປົ້າໝາຍ ມີໂອກາດໄດ້ຮັບການສຶກສາຫລາຍຂຶ້ນ.
ສຳລັບແຜນວຽກງານຈຸດສຸມ 2020 ກະຊວງສຶກສາທິການ ແລະ ກິລາ ຈະຂະຫຍາຍວຽກງານການສຶກສາ ກ່ອນໄວຮຽນທີ່ມີຄຸນນະພາບ ໃຫ້ກວ້າງຂວາງ ແລະ ທົ່ວເຖິງ ໂດຍເນັ້ນໃສ່ການສະໜອງໂຄ່ງລ່າງພື້ນຖານໃນຊຸມຊົນ ລວມທັງອຸປະກອນຮັບໃຊ້ ການຮຽນ-ການສອນ, ຄູສອນ ແລະ ຜູ້ດູແລເດັກ ໃຫ້ໂຮງຮຽນອານຸບານ ແລະຫ້ອງກຽມ ໂດຍສະເພາະພາກລັດ; ປັງປຸງການຮຽນ-ການສອນ ໃນຊັ້ນປະຖົມ ໂດຍເນັ້ນໃສ່ການປະຕິບັດ ການເລື່ອນຂັ້ນແບບຕໍ່ເນື່ອງ, ການປັບປຸງລະບົບ ນິເທດການສຶກສາ ແລະ ການສ້າງກຸ່ມໂຮງຮຽນ ພ້ອມທັງເອົາໃຈໃສ່ຕິດຕາມ ການປະຕິບັດຫລັກສູດ ແລະ ການສິດສອນຂອງຄູ.
 |
ທ່ານ ຊົມພູ ແກ້ວປັນຍາ ຊີ້ໃຫ້ເຫັນຕື່ມວ່າ: ໃນສົກຮຽນ 2018-2019 ຜ່ານມາ ທົ່ວນະຄອນຫລວງວຽງຈັນ ມີໂຮງຮຽນພາກລັດ ແລະ ເອກະຊົນ ທັງໝົດ 1.099 ແຫ່ງ, ທຽບໃສ່ສົກຜ່ານມາເພີ່ມຂຶ້ນ 41 ແຫ່ງ, ມີນັກຮຽນທັງໝົດ 201.178 ຄົນ ເປັນຍິງ 97.984 ຄົນ ທຽບໃສ່ສົນຮຽນຜ່ານມາ ເພີ່ມຂຶ້ນ 1.453 ຄົນ. ໃນນີ້, ໂຮງຮຽນລ້ຽງເດັກ ແລະ ອານຸບານ ມີ 389 ແຫ່ງ ເພີ່ມຂຶ້ນ 26 ແຫ່ງ, ໂຮງຮຽນປະຖົມ ມີ 533 ແຫ່ງ ເພີ່ມຂຶ້ນ 8ແຫ່ງ ແລະ ໂຮງຮຽນມັດທະຍົມ 177 ແຫ່ງ ເພີ່ມຂຶ້ນ 7 ແຫ່ງ, ລວມທັງໂຮງຮຽນສົງ 6 ແຫ່ງ.
（ແຫຼ່ງຂໍ້ມູນ： ຂປລ）
