ປັບປຸງລະບຽບ ແລະ ກົນໄກປະສານງານໃນການດຳເນີນທຸລະກິດຢູ່ລາວ

14:18 | 26/08/2019

ກະຊວງແຜນການ ແລະ ການລົງທຶນ (ຜທ) ຈັດກອງປະຊຸມປຶກສາຫາລື ແລະ ຜ່ານແຜນປະຕິບັດງານ ເພື່ອຕິດຕາມການຈັດຕັ້ງປະຕິບັດຄຳສັ່ງເລກທີ 02/ນຍ ວ່າດ້ວຍການປັບປຸງບັນດາລະບຽບການ ແລະ ກົນໄກປະສານງານໃນການດຳເນີນທຸລະກິດຢູ່ ສປປ ລາວ ຂຶ້ນວັນທີ 22 ສິງຫາ 2019 ຢູ່ໂຮງແຮມຄຣາວພຣາຊາ ໂດຍເປັນປະທານຂອງທ່ານນາງ ຄຳຈັນ ວົງແສນບູນ ຮອງລັດຖະມົນຕີກະຊວງ ຜທ ມີພາກສ່ວນກ່ຽວຂ້ອງ ເຂົ້າຮ່ວມ.

ເພື່ອປັບປຸງການອຳນວຍຄວາມສະດວກໃນການດຳເນີນທຸລະກິດຢູ່ ສປປ ລາວ ເຊິ່ງຂະແໜງການກ່ຽວຂ້ອງໄດ້ນຳສະເໜີລົງເລິກດ້ານທິດທາງ ຂັ້ນຕອນຈັດຕັ້ງປະຕິບັດ ຄາດໝາຍການຫຼຸດຜ່ອນຂັ້ນຕອນຕ່າງໆ ໄລຍະເວລາ ການອຳນວຍຄວາມສະດວກ ແນວທາງການປັບປຸງລະບຽບການ ເງື່ອນໄຂ ແລະ ນິຕິກຳ ເຊິ່ງໄດ້ກວມເອົາການສ້າງຄວາມສາມາດໃຫ້ພະນັກງານທີ່ຮັບຜິດຊອບແຕ່ລະຂະ ແໜງການ ຮ່າງແຜນປະຕິບັດງານດັ່ງກ່າວຈະຖືກຮັບຮອງໂດຍລັດຖະມົນຕີຂອງກະຊວງກ່ຽວຂ້ອງ ຜັນຂະຫຍາຍລົງສູ່ການປະຕິບັດ ແລະ ນຳໃຊ້ເປັນເຄື່ອງມືໃນການຕິດຕາມຊຸກຍູ້ ໂດຍມີກົມສົ່ງເສີມການລົງທຶນ ກະຊວງ ຜທ ເປັນໃຈກາງປະສານງານ ນອກນີ້ ຜູ້ຕາງໜ້າແຕ່ລະກະຊວງກໍໄດ້ລາຍງານຄວາມຄືບໜ້າໂດຍລວມ ແລະ ສິ່ງທ້າທາຍໃນການປັບປຸງລະບຽບການ ແລະ ນິຕິກຳ ເພື່ອສ້າງຄວາມສະດວກໃນການດຳເນີນທຸລະກິດຢູ່ ສປປ ລາວ.

ເດືອນພຶດສະພາຜ່ານມາ ມີຫຼາຍເຫດການພົ້ນເດັ່ນກ່ຽວກັບວຽກງານປັບປຸງຄວາມສະດວກໃນການ ດຳເນີນທຸລະກິດ ໂດຍສະເພາະໄດ້ສຳເລັດວຽກງານການລາຍງານປັບປຸງ (Data Reform) ການແກ້ໄຂຂໍ້ມູນ (Data correction) ແລະ ໄດ້ສົ່ງບົດລາຍງານໃຫ້ກຸ່ມທະນາຄານໂລກ ເພື່ອປະກອບເປັນຂໍ້ມູນໃນການປະເມີນສຳລັບບົດລາຍງານປີ 2020 ຫຼາຍໜ້າວຽກທີ່ໄດ້ຮັບການປັບປຸງ ໂດຍໄດ້ລາຍງານປະກອບມີ Data Reform 14 ບັນຫາ ແລະ Data correction 10 ບັນຫາ.

ຜ່ານການນຳສະເໜີໂຄງຮ່າງແຜນປະຕິບັດງານຈາກຂະແໜງການກ່ຽວຂ້ອງຂອງກະຊວງອຸດສາຫະກຳ ແລະ ການຄ້າ ກະຊວງໂຍທາທິການ ແລະ ຂົນສົ່ງ ວິສາຫະກິດໄຟຟ້າລາວ ກະຊວງພະລັງງານ ແລະ ບໍ່ແຮ່ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ທະນາຄານແຫ່ງ ສປປ ລາວ ສຳນັກງານຄະນະກຳມະການຄຸ້ມຄອງຫຼັກຊັບ ກະຊວງການເງິນ ແລະ ກະຊວງຍຸຕິທຳ ແມ່ນມີຫຼາຍໜ້າວຽກທີ່ຈະຕ້ອງໄດ້ປັບປຸງຢ່າງຮີບດ່ວນ ເຊິ່ງມີຄວາມຈຳເປັນຈະຕ້ອງໃຊ້ທຶນ ແລະ ບຸຄະລາກອນຈຳນວນໜຶ່ງ ສຳຄັນທີ່ສຸດຈະຕ້ອງມີການປະສານງານກັນເປັນປະຈຳ ເພື່ອຮັບປະກັນການຈັດຕັ້ງປະຕິບັດໃຫ້ໄດ້ຮັບຜົນດີ.

ກອງປະຊຸມດັ່ງກ່າວ ໄດ້ຮັບການສະໜັບສະໜູນຈາກຄູ່ຮ່ວມພັດທະນາໂຄງການສົ່ງເສີມຄວາມສາ ມາດໃນການແຂ່ງຂັນ ແລະ ການຄ້າຂອງ ສປປ ລາວ (LCT) ເຊິ່ງມີເປົ້າໝາຍເພື່ອຫຼຸດຜ່ອນ ແລະ ລົບລ້າງອຸປະສັກຕໍ່ການເຕີບໃຫຍ່ຂະຫຍາຍຕົວຂອງທຸລະກິດພາກເອກະຊົນ ໂດຍໃຫ້ການຊ່ວຍເຫຼືອດ້ານວິຊາການ ແລະ ງົບປະມານ ເພື່ອປັບປຸງສະພາບແວດລ້ອມດ້ານລະບຽບກົດໝາຍ ຫຼຸດຜ່ອນຕົ້ນທຶນໃນການຄ້າຂາຍ ແລະ ຍົກລະດັບຄວາມສາມາດການແຂ່ງຂັນຂອງຫົວໜ່ວຍທຸລະກິດ ນອກນີ້ LCT ແລະ ອົງການຈີໄອແຊັດ ປະຈຳ ສປປ ລາວ ກໍໄດ້ປະກອບສ່ວນດ້ານວິຊາການໃນການສະໜັບສະໜູນການຮ່າງແຜນປະຕິບັດງານ ເພື່ອຕິດຕາມການຈັດຕັ້ງປະຕິບັດຄຳສັ່ງ ເລກທີ 02/ນຍ ຕື່ມອີກ.

（ແຫຼ່ງຂໍ້ມູນ： vientianemai.net）