 |
| ພາບປະກອບ: TTXVN |
ແຕ່ວັນທີ 19-27 ເມສາ, ຄະນະປະຕິບັດງານຊຸດທີ 4 ໂດຍພົນໂທ ຫງວຽນວັນບົ໋ງ, ຄະນະພັກເຫຼົ່າທັບເຮືອ ເປັນຫົວໜ້າຄະນະ ໄດ້ລົງຢ້ຽມຢາມ ແລະ ໃຫ້ກຳລັງໃຈພະນັກງານ, ນັກຮົບ ແລະ ປະຊາຊົນເມືອງ ເຈື່ອງຊາ, ແຂວງແຄ໋ງຮ່ວາ, ແລະ ເຮືອນຂຸດເຈາະ DK1.
ເຂົ້າຮ່ວມຄະນະປະຕິບັດງານ ມີການນຳນະຄອນ ຮ່າໂນ້ຍ, ຫາຍຟ່ອງ, ບັນດາແຂວງ ນິງບິ່ງ, ກວາງນິງ, ອຽນບ໋າຍ ພ້ອມດ້ວຍພະນັກງານບັນດາຫົວໜ່ວຍ, ຄະນະ, ຂະແໜງການ...
ຄະນະປະຕິບັດງານຊຸດທີ 4 ໄດ້ໄປຢ້ຽມຢາມ, ມອບຂອງຂວັນ ແລະ ໃຫ້ກຳລັງໃຈພະນັກງານ, ນັກຮົບ ແລະ ປະຊາຊົນທີ່ພວມເຮັດວຽກ ແລະ ດຳລົງຊີວິດຢູ່ໝູ່ເກາະ.
ຢູ່ຕາແສງ ເກາະຊິງໂຕ່ນ, ເມືອງເກາະເຈື່ອງຊາ, ເຫຼົ່າທັບເຮືອສົມທົບກັບຄະນະພັກນະຄອນ, ສະພາປະຊາຊົນ, ແລະ ຄະນະກຳມະການປະຊາຊົນນະຄອນ ຫາຍຟ່ອງ ໄດ້ຈັດຕັ້ງພິທີວາງສີລາລຶກໂຮງໝໍເກາະ ຊິງໂຕ່ນ. ກິດຈະກຳນີ້ໄດ້ຮັບການສ້າງຕັ້ງແຕ່ເດືອນພະຈິກ 2021; ມີໂຄງສ້າງ 3 ຊັ້ນ, ເນື້ອທີ່ທັງໝົດ 360 ຕາແມັດ, ຂະໜາດຂອງໂຮງໝໍ 15 ຕຽງ, ມີຫ້ອງຜ່າຕັດ, ຫ້ອງສຸກເສີນ, premium oxygen...
ນີ້ແມ່ນຂອງຂວັນທີ່ຄະນະພັກ, ອຳນາດການປົກຄອງ ແລະ ປະຊາຊົນນະຄອນ ຫາຍຟ່ອງ ມອບໃຫ້ບັນດາທະຫານ, ປະຊາຊົນຕາແສງ ຊິງໂຕ່ນ ດ້ວຍຄວາມປາດຖະໜາຢາກປະກອບສ່ວນໃຫ້ກຳລັງໃຈທະຫານ ແລະ ປະຊາຊົນຢູ່ທີ່ນີ້ປະຕິບັດສຳເລັດໜ້າທີ່, ປົກປັກຮັກສາໝູ່ເກາະອັນສັກສິດຂອງປະເທດຊາດ.
ຕາແສງເກາະ ຊິງໂຕ່ນ ແມ່ນໜຶ່ງໃນໝູ່ເກາະຂອງເມືອງເກາະ ເຈື່ອງຊາ ທີ່ມີປະຊາຊົນດຳລົງຊີວິດ.
ໃນໄລຍະດຳເນີນງານ, ໂຮງໝໍເກາະຊິງໂຕ່ນໄດ້ປະຕິບັດການກວດ ແລະ ປິ່ນປົວພະຍາດໃຫ້ປະຊາຊົນ 700 ກວ່າຄົນ, ໃນນັ້ນມີ 7 ກໍລະນີຜ່າຕັດໄສ້ຕິ່ງ, ໄດ້ເຂົ້າຮ່ວມການຊ່ວຍເຫຼືອກູ້ໄພຊາວປະມົງ ແລະ ຕ້ານການແຜ່ລະບາດຂອງພະຍາດໂຄວິດ-19 ເປັນຢ່າງດີ, ບໍ່ປະໃຫ້ພະຍາດດັ່ງກ່າວແຜ່ລະບາດຢູ່ໝູ່ເກາະ.
ມາຮອດເກາະ ນຸຍເລ ເບ, ຄະນະປະຕິບັດງານຊຸດທີ 4 ໄດ້ເຂົ້າຮ່ວມພິທີຕັດແຖບຜ້າເປີດສະຫຼອງເຮືອນວັດທະນະທຳອະເນກປະສົງ ໂດຍຄະນະພັກ, ອຳນາດການປົກຄອງ ແລະ ປະຊາຊົນຮ່າໂນ້ຍ ປຸກສ້າງມອບໃຫ້.
ອາຄານດັ່ງກ່າວມີ 3 ຊັ້ນ ແລະ ເຄື່ອງປະກອບຄື: ຂົວຕໍ່ລະຫວ່າງເຮືອນ, ລະບົບໝໍ້ໄຟພະລັງງານແສງຕາເວັນ, ຖັງເກັບນ້ຳຈືດ, ສວນຜັກ... ດ້ວຍຍອດຈຳນວນເງິນລົງທຶນເກືອບ 40 ຕື້ດົ່ງ.
ການປຸກສ້າງເຮືອນວັດທະນະທຳອະເນກປະສົງຢູ່ເກາະ ນຸຍເລ ເບ ປະກອບສ່ວນຮັບປະກັນສະຖານທີ່ເຄື່ອນໄຫວທາງດ້ານວັດທະນະທຳ, ຈິດໃຈໃຫ້ແກ່ພະນັກງານ, ນັກຮົບຢູ່ເກາະ; ພ້ອມກັນນັ້ນ ກໍເປັນບ່ອນສະໜອງ ແລະ ໜູນຊ່ວຍຊາວປະມົງອອກສູ່ທະເລ ເພື່ອຂຸດຄົ້ນຫາປາ ແລະ ອາຫານທະເລ; ປະສານສົມທົບການກູ້ຊີບກູ້ໄພຢູ່ທະເລໝູ່ເກາະເຈື່ອງຊາ.
ຢູ່ເກາະ ດາດົ່ງ ເຊ, ເຫຼົ່າທັບເຮືອໄດ້ສົມທົບກັບຄະນະກຳມະການປະຊາຊົນນະຄອນ ຮ່າໂນ້ຍ ເລີ່ມກິດຈະກຳປຸກສ້າງເຮືອນວັດທະນະທຳອະເນກປະສົງຢູ່ເກາະ.
ໃນເວລາ 9 ວັນໃນການເດີນທາງໄປຍັງໝູ່ເກາະ, ເຮືອນເຈາະ DK1, ຄະນະປະຕິບັດງານຊຸດທີ 4, ໄດ້ມອບຂອງຂວັນໃຫ້ພະນັກງານ, ນັກຮົບ ແລະ ປະຊາຊົນຢູ່ໝູ່ເກາະ ດ້ວຍຍອດມູນຄ່າກວ່າ 90 ຕື້ດົ່ງ.
ທ່ານພົນໂທ ຫງວຽນວັນບົ໋ງ, ຄະນະພັກເຫຼົ່າທັບເຮືອ, ຫົວໜ້າຄະນະປະຕິບັດງານຊຸດທີ 4 ໃຫ້ຮູ້ວ່າ: ການມອບຂອງຂວັນ, ຢ້ຽມຢາມ ແລະ ໃຫ້ກໍາລັງໃຈ, ການພົບປະແລກປ່ຽນອັນອົບອຸ່ນລະຫວ່າງທະຫານ ແລະ ປະຊາຊົນ... ໄດ້ເພີ່ມພູນຄູນສ້າງແປວໄຟ, ຄວາມສຸກ ແລະ ກໍາລັງແຮງໃຫ້ແກ່ທະຫານ, ປະຊາຊົນເມືອງເກາະເຈື່ອງຊາ ແລະ ພະນັກງານ, ນັກຮົບເຮືອນຂຸດເຈາະ DK1, ຜ່ານນັ້ນກໍປະກອບສ່ວນສ້າງກຳລັງໃຈອັນໃຫຍ່ຫຼວງໃຫ້ກອງທັບເຮືອປະຊາຊົນຫວຽດນາມ ຜ່ານຜ່າທຸກຄວາມຫຍຸ້ງຍາກ, ຄວາມອັນຕະລາຍ, ສາມັກຄີເປັນຈິດໜຶ່ງໃຈດຽວ, ຢືນຢູ່ຕໍ່ໜ້າຄື້ນ ແລະ ລົມແຮງ, ປະຕິບັດໜ້າທີ່ອັນໜັກໜ່ວງ ແຕ່ສະຫງ່າລາສີທີ່ພັກ, ລັດ ແລະ ປະຊາຊົນໄດ້ມອບໃຫ້.
ບຸນຄົງ
