ທ່ານຫົວໜ້າບັນນາທິການໃຫຍ່ວາລະສານຍຸກສະໄໝ ເລກວາງທ້ຽນ ໃຫ້ຮູ້ວ່າ: ໂຄງການສື່ສານລວມມີ: ພິມຈຳໜ່າຍວາລະສານພິເສດສອງພາສາຫວຽດນາມ-ລາວ; ເປີດຄໍລຳ (banner) ພິເສດ ເຜີຍແຜ່ການພົວພັນຫວຽດນາມ - ລາວ ໃນ 6 ໜ້າເວັບໄຊພາສາຕ່າງປະເທດຂອງວາລະສານ; ຈັດຕັ້ງການ ປະກວດສຳລັບຜູ້ທີ່ເປັນພະຍານ, ພະນັກງານ, ນັກຮົບ… ສອງປະເທດທີ່ໄດ້ເຂົ້າຮ່ວມການຮ່ວມມື, ຜູກພັນໃນການຕໍ່ສູ້, ອອກແຮງງານ ແລະ ຮ່ຳຮຽນຢູ່ 2 ປະເທດ ເພື່ອຂຽນ, ເລົ່າເລື່ອງກ່ຽວກັບວັດຖຸພັນ ແລະ ຄວາມຊົງຈຳຂອງຕົນ; ເວທີປາໄສ/ການປະກວດມີ ຫົວຂໍ້ “ໃຫ້ຂອງທີ່ລະລຶກເລົ່າເລື່ອງ”; ຜະລິດວິດີໂອສາລະຄະດີ; ຈັດຕັ້ງການພົບປະແລກປ່ຽນສິລະປະ... ຄາດວ່າຈະຈັດຕັ້ງການຖ່າຍທອດສົດໃນລາຍການ “60 ປີແຫ່ງການພົວພັນຫວຽດນາມ - ລາວ: ສາຍພູຫຼວງ - ສອງເຄິ່ງຫົວໃຈ” ໃນຊ່ອງ VTV ຫຼື VTC.
ທ່ານ ເລກວາງທ້ຽນ ສະເໜີສະຖານທູດລາວ ປະຈຳ ຫວຽດນາມ ສົມທົບກັນໂຄສະນາເຜີຍແຜ່ບັນດາການເຄື່ອນໄຫວ, ໂດຍສະເພາະແມ່ນການປະກວດ “ໃຫ້ຂອງທີ່ລະລຶກເລົ່າເລື່ອງ” ເຖິງປະຊາຊົນລາວທຸກຊັ້ນວັນນະ; ໜູນຊ່ວຍນັກຂ່າວ ວາລະສານຍຸກສະໄໝ ປະຕິບັດງານຢູ່ລາວ.
ທ່ານອັກຄະລັດຖະທູດ ຈັນທະພອນ ຄຳມະນີຈັນ ຕີລາຄາສູງບັນດາການປະກອບສ່ວນ ແລະ ບົດບາດຂອງວາລະສານຍຸກສະໄໝ ໃນການຊຸກຍູ້ການພົວພັນຫວຽດນາມ - ລາວ; ຢືນຢັນວ່າ ສະຖານທູດ ລາວ ປະຈຳ ຫວຽດນາມ ຈະເປັນຫົວໜ່ວຍໃຫ້ຄຳປຶກສາ ແລະ ສົມທົບກັນຜະລິດວາລະສານພິເສດສອງພາສາ ຫວຽດນາມ - ລາວ, ເຂົ້າຮ່ວມຄະນະຈັດຕັ້ງ ແລະ ຄະນະກຳມະການການປະກວດ “ໃຫ້ຂອງທີ່ລະລຶກເລົ່າເລື່ອງ”. ສະຖານທູດຈະປຸກລະດົມການປະກວດ “ໃຫ້ຂອງທີ່ລະລຶກເລົ່າເລື່ອງ” ເຖິງບັນດາຫົວໜ່ວຍ, ອົງການຈັດຕັ້ງ ແລະ ປະຊາຊົນລາວໃນທົ່ວປະເທດ ແລະ ປະຊາຄົມຊາວລາວ ຢູ່ ຫວຽດນາມ.
ທ່ານອັກຄະລັດຖະທູດ ຈັນທະພອນ ຄຳມະນີຈັນ ເນັ້ນໜັກວ່າ: “ສະຖານທູດລາວ ປະຈຳ ຫວຽດນາມ ຈະສົມທົບກັບວາລະສານຍຸກສະໄໝ ເພື່ອຜັນຂະຫຍາຍບັນດາການເຄື່ອນໄຫວລະຫວ່າງ 2 ຝ່າຍໃນ “ປີສາມັກຄີມິດຕະພາບ ຫວຽດນາມ - ລາວ, ລາວ - ຫວຽດນາມ 2022”.
ທ່ານອັກຄະລັດຖະທູດ ຈັນທະພອນ ຄຳມະນີຈັນ ຫວັງວ່າ ບັນດາການເຄື່ອນໄຫວທີ່ອຸດົມສົມບູນ ແລະ ແທດຈິງຈະສ້າງຂີດໝາຍໃນການພົວພັນສອງປະເທດໃນປີ 2022.
ເນື່ອງໃນໂອກາດບຸນປີໃໝ່ລາວ 2022, ທ່ານຫົວໜ້າບັນນາທິການໃຫຍ່ວາລະສານ ຍຸກສະໄໝ ເລກວາງທ້ຽນ ໄດ້ມອບຂອງຂວັນ ແລະ ອວຍພອນໄຊອັນປະເສີດເຖິງທ່ານອັກຄະລັດຖະທູດ ຈັນທະພອນ ຄຳມະນີຈັນ ພ້ອມທັງພະນັກງານ, ພາລະກອນສະຖານທູດລາວ ປະຈຳຫວຽດນາມ ແລະ ພັກ, ລັດ ແລະ ປະຊາຊົນລາວບັນດາເຜົ່າ.
ບູນມີ
