| ປະທານປະເທດຫວຽດນາມ ປະດັບຫຼຽນໄຊແຮງງານຊັ້ນ I ໃຫ້ທີມຊາດບານເຕະຍິງ | |
| ມອບສົ່ງຫໍສະພາແຫ່ງຊາດລາວຫຼັງໃໝ່ - ຂອງຂວັນຂອງພັກ, ລັດ ແລະປະຊາຊົນຫວຽດນາມ ໃຫ້ແກ່ລາວໃນທ້າຍໄຕມາດທີ I ປີ 2021 |
 |
| ພາບປະກອບ |
ຕາມກົມພາສີແລ້ວ, ໃນເດືອນ ມີນາ ປີ 2022, ການສົ່ງອອກກາເຟຂອງຫວຽດນາມບັນລຸ 170.000 ໂຕນ, ເປັນມູນຄ່າ 394 ລ້ານ USD, ເພີ່ມຂຶ້ນ 22% ດ້ານປະລິມານ ແລະ ເພີ່ມຂຶ້ນ 22,6% ໃນດ້ານມູນຄ່າເມື່ອທຽບໃສ່ກັບເດືອນກຸມພາ 2022, ເມື່ອທຽບໃສ່ເດືອນ ມີນາ 2021 ເພີ່ມຂຶ້ນ 0,2% ໃນດ້ານປະລິມານ ແລະ ເພີ່ມຂຶ້ນ 26.2% ໃນດ້ານມູນຄ່າ.
ໃນໄຕມາດທີ 1 ປີ 2022, ການສົ່ງອອກກາເຟຂອງຫວຽດນາມ ຄາດຄະເນບັນລຸ 541.000 ໂຕນ, ເປັນມູນຄ່າປະມານ 1,22 ຕື້ USD, ເພີ່ມຂຶ້ນ 19,4% ດ້ານປະລິມານ ແລະ ເພີ່ມຂຶ້ນ 50,4% ໃນດ້ານມູນຄ່າເມື່ອທຽບໃສ່ກັບໄລຍະດຽວກັນຂອງປີ 2021.
ໃນເດືອນມີນາ 2022, ລາຄາກາເຟສົ່ງອອກສະເລ່ຍຂອງຫວຽດນາມບັນລຸ 2.318 USD/ໂຕນ, ເພີ່ມຂຶ້ນ 0,5% ເມື່ອທຽບໃສ່ເດືອນກຸມພາ 2022 ແລະ ເພີ່ມຂຶ້ນ 26% ເມື່ອທຽບໃສ່ເດືອນ 3/2021. ໃນໄຕມາດທີ 1 ປີ 2022, ລາຄາສົ່ງອອກກາເຟສະເລ່ຍຂອງຫວຽດນາມ ຄາດຄະເນບັນລຸ 2.250 USD/ໂຕນ, ເພີ່ມຂຶ້ນ 26% ເມື່ອທຽບໃສ່ກັບໄລຍະດຽວກັນຂອງປີ 2021.
ການສົ່ງອອກກາເຟ Robusta ໄປຍັງຕະຫຼາດຫຼັກໄດ້ເພີ່ມຂຶ້ນເຊັ່ນ: ເຢຍລະມັນ, ແບນຊິກ, ອັງກິດ, ຍີ່ປຸ່ນ, ຣັດເຊຍ, ສະເປນ, ຟີລິບປິນ. ໃນທາງກົງກັນຂ້າມ, ການສົ່ງອອກກາເຟ Robusta ໄປຕະຫຼາດຂອງອີຕາລີ ແລະ ສະຫະລັດອາເມລິກາ ຫຼຸດລົງ.
ຫວ່າງມໍ່ໆມານີ້, Rabobank ໄດ້ປັບປຸງການຄາດຄະເນປະລິມານການຜະລິດກາເຟ Arabica ຂອງປະເທດບຣາຊິນໃນລະດູການໃຫມ່ 2022/2023 ຈະເພີ່ມຂຶ້ນຈາກ 31,8% ມາເປັນ 41,1 ລ້ານເປົາ. ໃນຂະນະດຽວກັນ, ຜູ້ບໍລິໂພກມີແນວໂນ້ມທີ່ຈະຫຼຸດການໃຊ້ຈ່າຍຍ້ອນອັດຕາເງິນເຟີ້ສູງ ແລະ ສະຖານະການເສດຖະກິດທີ່ຫຍຸ້ງຍາກ. ຜູ້ຊ່ຽວຊານຫຼາຍຄົນຄາດຄະເນວ່າຕະຫຼາດກາເຟທົ່ວໂລກຈະສືບຕໍ່ໄດຮັບຄວາມກົດດັນໃນເດືອນເມສາ 2022.
ແນວໃດກໍດີ, ບັນດາວິສາຫະກິດສົ່ງອອກກາເຟພາຍໃນປະເທດໃຫ້ຂໍ້ສັງເກດວ່າ ແງ່ຫວັງຂອງຕະຫຼາດກາເຟໃນປີ 2022 ແມ່ນຂ້ອນຂ້າງໃສແຈ້ງ, ລາຄາຍັງຈະສືບຕໍ່ເພີ່ມຂຶ້ນ. ຕາມນັ້ນແລ້ວ, ຂະແໜງກາເຟຂອງຫວຽດນາມ ໃນປີ 2022 ຈະເຕີບໂຕ 30-40% ເພາະວ່າທົ່ວໂລກພວມປັບຕົວເຂົ້າກັບ Covid-19, ຄວາມຕ້ອງການແມ່ນໃຫຍ່ຫຼວງໃນຂະນະທີ່ການສະໜອງພັດຫຼຸດລົງ. ແລະ ລາຄາກາເຟສົ່ງອອກອາດຈະບັນລຸ 2.400 – 2.600 USD/ໂຕນ ໃນປີ 2022 ແລະ ທ່າອ່ຽງເພີ່ມຂຶ້ນສາມາດແກ່ຍາວຮອດປີ 2023.
ໜຶ່ງໃນບັນດາສາຍເຫດທີ່ເຮັດໃຫ້ການສົ່ງອອກກາເຟເຕີບໂຕແມ່ນຍ້ອນວ່າ ກາເຟ robusta ຂອງ ຫວຽດນາມ ໄດ້ຮັບການຕີລາຄາສູງຈາກລູກຄ້າ ແລະ ມີຄວາມສາມາດແກ່ງແຍ້ງເມື່ອທຽບໃສ່ກັບບັນດານັກສະໜອງໃຫຍ່ໃນໂລກຄື: Brazil, ອິນເດຍ, ອາເມລິກາໃຕ້, Colombia… ບັນດາປະເທດ ອີຢູ ຄື: ເຢຍລະມັນ, ແບນຊິກ, ອີຕາລີ ມັກກາເຟຫວຽດນາມຫຼາຍ. ໃນ 2 ເດືອນຕົ້ນປີ 2022, ຕະຫຼາດ 3 ແຫ່ງນີ້ໄດ້ນຳເຂົ້າກາເຟ ຫວຽດນາມ 108.500 ໂຕນ, ເທົ່າກັບ 232 ລ້ານ USD, ກວມ 29% ຍອດປະລິມານ ແລະ ວົງເງິນສົ່ງອອກກາເຟຫວຽດນາມ . ເຖິງຢ່າງໃດກໍຕາມ, ລາຄາການຂົນສົ່ງທາງທະເລຍັງຄົງເປັນອຸປະສັກຕໍ່ບັນດາວິສາຫະກິດອອກໂດຍທົ່ວໄປ ແລະ ວິສາຫະກິດສົ່ງອອກກາເຟເວົ້າສະເພາະ.
ໄຊພອນ
