ຕະຫລອດໄລຍະ 8 ປີຜ່ານມາ ນັບແຕ່ມີການຊື້-ຂາຍ, ຕລຊລ ໄດ້ມີການພັດທະນາຕາມລໍາດັບ ປັດຈຸບັນມີ 10 ບໍລິສັດເຂົ້າຈົດທະບຽນ ໂດຍສະເພາະໃນໄລຍະເກືອບ 5 ປີຜ່ານມານີ້ ຕລຊລ ໄດ້ຮັບຄວາມສົນໃຈຈາກນັກລົງທຶນ ທັງພາຍໃນ ແລະ ຕ່າງປະເທດຫລາຍຂຶ້ນ ໂດຍຈໍານວນບັນຊີຫລັກຊັບ ໄດ້ເພີ່ມຂຶ້ນຈາກ 11.360 ບັນຊີ ໃນຕົ້ນປີ 2015 ເປັນ 14.493 ບັນຊີໃນປັດຈຸບັນ (30/06/2019) ເພີ່ມຂຶ້ນ 3.133 ບັນຊີ ຫລື ຄິດເປັນ 28% ໂດຍມີການແລກປ່ຽນຊື້-ຂາຍທັງໝົດ 131 ລ້ານຮຸ້ນ ໃນມູນຄ່າປະມານ 784 ຕື້ກີບ ກວມເອົາການແລກປ່ຽນຊື້-ຂາຍ ຈາກຕ່າງປະເທດ 63% ແລະ ການແລກ ປ່ຽນຊື້-ຂາຍ ຈາກນັກລົງທຶນພາຍໃນ 37%.
 |
ໄລຍະ 8 ປີຜ່ານມາ ຕະຫລາດຫລັກຊັບລາວ ມີ 10 ບໍລິສັດເຂົ້າຈົດທະບຽນ. (ພາບ: ຂປລ)
ນອກນີ້, ການລະດົມທຶນຄັ້ງທຳອິດ ໃນຈຳນວນເງິນເກືອບ 537 ຕື້ກີບ ຂອງ 7 ບໍລິສັດຈົດທະບຽນໃໝ່ ແລະ ການອອກຮຸ້ນເພີ່ມທຶນໃໝ່ ຈຳນວນເງິນ 3.651 ຕືີ້ກີບ ເພີ່ມຂຶ້ນ 19,42% ຂອງທຶນລະດົມໄດ້ທັງໝົດທຽບໃສ່ຕັ້ງ ແຕ່ປີ 2014. ພ້ອມດຽວກັນນີ້, ຕລຊລ ຍັງຮັບຈົດທະບຽນຊື້-ຂາຍພັນທະບັດລັດຖະບານ ເປັນຄັ້ງທໍາອິດໃນຕົ້ນປີ 2019 ໂດຍມີມູນຄ່າ 1.000 ຕື້ກີບ ເພື່ອດັດສົມງົບປະມານແຫ່ງຊາດ.
ທ່ານ ອັອດ ພົນຊຽງດີ ຜູ້ອໍານວຍການໃຫຍ່ ຕລຊລ ຄົນໃໝ່ ໃຫ້ຮູ້ວ່າ: ເພື່ອອໍານວຍຄວາມສະດວກໃຫ້ແກ່ນັກລົງທຶນໃນການຊື້-ຂາຍຫລັກຊັບ ໄດ້ມີການຍົກລະດັບ ກົນໄກຊື້-ຂາຍຮຸ້ນຮູບແບບໃໝ່ ດ້ວຍການຂະຫຍາຍເວລາການຊື້-ຂາຍຫລັກຊັບ ຈາກເວລາ 8:30 - 11:30 ໂມງ ເປັນເວລາ 8:30 - 15:00 ໂມງ, ເຊິ່ງເຫັນໄດ້ວ່າການຊື້-ຂາຍເພີ່ມຂຶ້ນຫລາຍກວ່າ 14% ທຽບໃສ່ການຊື້ຂາຍ ໄລຍະເວລາເກົ່າ. ພ້ອມດຽວກັນນີ້, ໄດ້ເພີ່ມຄໍາສັ່ງຊື້-ຂາຍ ຫລັກຊັບຮູບແບບ ໃໝ່ ຄື ຄໍາສັ່ງຮູບແບບMarket Order ແລະ ໄດ້ດໍາເນີນການຄົ້ນຄວ້າປັບປຸງ ການກໍານົດລາຄາປິດສະເພາະ, ການກໍານົດຮຸ້ນທີ່ມີສະພາບຄ່ອງຕ່ຳ ແລະ ວິທີການໃນການຈັດສັນຮຸ້ນ ໃຫ້ແກ່ຜູ້ສ້າງສະພາບຄ່ອງ; ພ້ອມທັງໄດ້ຕິດຕັ້ງລະບົບໂປລແກຣມ ພື້ນຖານໂຄງລ່າງຕ່າງໆທີ່ກ່ຽວຂ້ອງ ແລະ ສືບຕໍ່ດຳເນີນການສຶກສາການຕິດຕັ້ງລະບົບ ດຳເນີນງານຕະ ຫລາດລົງໃນລະບົບທົດລອງຊຸດດັ່ງກ່າວ.
ຕລຊລ ໄດ້ເພີ່ມທະວີການກໍ່ສ້າງນັກວິຊາຊີບທຸລະກິດຫລັກຊັບ ໃນການເປັນທີ່ປຶກສາທາງດ້ານການເງິນຢ່າງມືອາ ຊີບ ແລະ ຍົກລະດັບດ້ານການທະນາຄານ ເພື່ອການລົງທຶນຢ່າງມືອາຊີບລາວ; ສໍາເລັດການຈັດຫລັກສູດການເຮັດບັນຊີ ແລະ ການກວດສອບບັນຊີ ທີ່ມີຄຸນນະພາບສໍາລັບຕະຫລາດທຶນ, ແລກປ່ຽນປະສົບການໃນການພັດທະນາວຽກງານຫລັກຊັບ ແລະ ການສົ່ງເສີມສະພາບຄ່ອງໃນ.ນອກນີ້, ຍັງມີການພົວພັນທີ່ດີກັບຕະຫລາດຫລັກຊັບ ສ ເກົາຫລີ ໃນຖານະຜູ້ຮ່ວມທຶນ, ຕະຫລາດຫລັກຊັບ ຫວຽດນາມ, ໄທ, ເຊິນເຈິ້ນ ແລະ ຊຽງໄຮ້ຂອງ ສປ ຈີນ ລວມທັງບັນດາຕະຫລາດຫລັກຊັບອາຊຽນ.
（ແຫຼ່ງຂໍ້ມູນ： ຂ່າວສານປະເທດລາວ）
