 |
ບັນຍາກາດກອງປະຊຸມ.
ທ່ານ ກັນຫາ ແກ້ວບົວລະພາ ຮອງຫົວໜ້າພະແນກກະສິກຳ ແລະ ປ່າໄມ້ແຂວງຈຳປາສັກລາຍງານຕໍ່ກອງປະຊຸມປຶກສາຫາລື ແລະ ວາງມາດຕະການແກ້ໄຂໃນວັນທີ 12 ມິຖຸນາ 2019 ທີ່ຫ້ອງວ່າການແຂວງຈຳປາສັກ, ທ່ານໃຫ້ຮູ້ວ່າ: ຕາມການລົງຕິດຕາມເກັບຂໍ້ມູນຂອງພະນັກງານວິຊາການພົບວ່າ: ດິນປ່າໄມ້ຖືກບຸກລຸກລວມທັງໝົດມີ 6 ເມືອງ 48 ບ້ານ 1.829 ຄອບຄົວ,ເທົ່າກັບ 2.964,71 ເຮັກຕາ. ໃນນັ້ນຢູ່ເຂດປ່າສະຫງວນດົງຫົວສາວມີ 13 ບ້ານ 726 ຄອບຄົວ, ເທົ່າກັບ 1.706,10 ເຮັກຕາ.ເຂດປ່າສະຫງວນເຊປຽນມີ 8 ບ້ານ 166 ຄອບຄົວ,ເທົ່າກັບ 189,12 ເຮັກຕາ.ເຂດປ່າຜະລິດປະທຸມພອນມີ 9 ບ້ານ 547 ຄອບຄົວ,ເທົ່າກັບ 509,27 ເຮັກຕາ.ເຂດປ່າຜະລິດສິລິວັງເວີນເມືອງບາຈຽງມີ 4ບ້ານ 54 ຄອບຄົວ,ເທົ່າກັບ58,02 ເຮັກຕາ.ເຂດປ່າປ້ອງກັນຊາຍແດນເມືອງຈຳປາສັກ ແລະ ເມືອງສຸຂຸມາມີ 11 ບ້ານ 325 ຄອບຄົວ,ເທົ່າກັບ 465,70 ເຮັກຕາ.ເຂດປ່າປ້ອງກັນແຫຼ່ງນ້ຳເຊປຽນເມືອງປາກຊ່ອງມີ 3 ບ້ານ 11 ຄອບຄົວ,ເທົ່າກັບ 36,5ເຮັກຕາ.
ການບຸກລຸກດັ່ງກ່າວສ່ວນໜຶ່ງແມ່ນມີການບຸກລຸກໃນເຂດຄຸ້ມຄອງນຳໃຊ້ ແລະ ໃນເຂດທີ່ກຳນົດໃນແຜນຈັດສັນ(ເຂດຄຸ້ມຄອງ ແລະ ເຂດຄວາມຮັບຜິດຊອບຂອງບ້ານຕາມການມອບດິນມອບປ່າ) ແລະ ການບຸກລຸກ ນອກເຂດທີ່ກຳນົດໃນແຜນຈັດສັນຂອງຄົນນອກພື້ນທີ່.
ຕໍ່ກັບສະພາບການດັ່ງກ່າວ, ອຳນາດການປົກຄອງແຂວງຮ່ວມກັບພະແນກການຂອງແຂວງ ແລະ ບັນດາເມືອງທີ່ກ່ຽວຂ້ອງໄດ້ເປີດກອງປະຊຸມປຶກສາຫາລື ແລະ ວາງມາດຕະການແກ້ໄຂ ໂດຍການເຂົ້າຮ່ວມ ແລະ ເປັນປະທານຂອງ ທ່ານ ສົມສະໜິດ ບຸດຕິວົງ ຮອງເຈົ້າແຂວງໆຈຳປາສັກ ປະທານຄະນະຮັບຜິດຊອບແກ້ໄຂບັນຫາດັ່ງກ່າວ, ທ່ານ ປະດິດ ວັນນະລັດສະໝີ ຫົວໜ້າພະແນກກະສິກຳ ແລະ ປ່າໄມ້ແຂວງເປັນຮອງປະທານ ພ້ອມດ້ວຍຄະນະກຳມະການທີ່ກ່ຽວຂ້ອງເຂົ້າຮ່ວມ.
ໃນກອງປະຊຸມໄດ້ຮັບຟັງການລາຍງານສະພາບການບຸກລຸກເນື້ອທີ່ດິນປ່າໄມ້ໃນເຂດປ່າສະຫງວນ ແລະ ປ່າຜະລິດ,ຍົກໃຫ້ເຫັນສະພາບຂອງບັນຫາ,ຂະບວນການ ແລະ ຂັ້ນຕອນແກ້ໄຂເບື້ອງຕົ້ນ ແລະ ມາດຕະການແກ້ໄຂໃນໄລຍະຍາວ. ຈາກນັ້ນທ່ານປະທານ ກໍ່ໄດ້ໂອ້ລົມຊີ້ທິດເຍືອງທາງໃຫ້ຜູ້ເຂົ້າຮ່ວມກອງປະຊຸມມີຄວາມຮັບຮູ້ເຂົ້າໃຈຈະແຈ້ງໃນການແກ້ໄຂບັນຫາ ໂດຍສະເພາະແມ່ນວິທີການຈັດຕັ້ງປະຕິບັດກັບປະຊາຊົນ. ສຳຄັນຕ້ອງກຳແໜ້ນແນວທາງນະໂຍບາຍຂອງພັກ ເພື່ອຮັບປະກັນຄວາມຖືກຕ້ອງ ແລະ ເໝາະສົມ.
（ແຫຼ່ງຂໍ້ມູນ： ຫນັງສືພິມຈຳປາໃຫ່ມ）
