ກອງປະຊຸມໄດ້ຄົ້ນຄວ້າສ້າງຄວາມເຂັ້ມແຂງໃນລະບົບການປັບປຸງຄຸນນະພາບ ການຮັກສາສຸຂະພາບໃນລາວ ແລະ ການເສີມສ້າງຂີດຄວາມສາມາດດ້ານການບໍລິຫານຄຸ້ມຄອງໃຫ້ກະຊວງສາທາລະນະສຸກ ການພັດທະນາມາດຕະຖານ ແລະ ເຄື່ອງມື ສຳລັບຄຸນນະພາບຂອງການປິ່ນປົວຄົນເຈັບ ລວມທັງລະບົບສົ່ງຕໍ່ eHealth ໃນທົ່ວປະເທດ ເພື່ອໃຫ້ມີການເຊື່ອມໂຍງກັບການຄຸ້ມຄອງການເງິນ ສາທາລະນະສຸກ ແລະ ລະບົບການຈ່າຍຂອງຜູ້ໃຫ້ບໍລິການເຮັດການທົດລອງ ການຫັນໃຫ້ໂຮງໝໍກຸ້ມຕົນເອງ ຢູ່ຂັ້ນສູນກາງ ແລະ ລະດັບໂຮງໝໍແຂວງ ໂດຍສະເພາະ ການປັບປຸງການບໍລິຫານຄຸ້ມຄອງ ແລະ ການບໍລິການຂອງສາທາລະນະສຸກເມືອງ ເຊັ່ນ: ປະຕິບັດຕົວຈິງຂອງພະນັກງານ ການແກ້ໄຂສຸກເສີນ ສິ່ງອຳນວຍຄວາມສະດວກ ມາດຕະຖານຂອງອຸປະກອນ ການປິ່ນປົວ ການບົ່ງມະຕິພະຍາດ ທະນາຄານເລືອດ ນ້ຳສະອາດ ແລະ ສຸຂາພິບານ ເພື່ອແນໃສ່ເຮັດໃຫ້ການຍົກລະດັບດ້ານການບໍລິການຂອງຊຸມຊົນ ກໍຄື ເຮັດໃຫ້ປະຊາຊົນໃນເຂດຫ່າງໄກສອກຫຼີກໄດ້ເຂົ້າເຖິງການປິ່ນປົວສຸຂະພາບຫຼາຍຂຶ້ນ.
 |
ບັນດາຜູ້ແທນໄດ້ເຂົ້າຮ່ວມກອງປະຊຸມ. (ພາບ: lao's people news)
ນອກນີ້ ກອງປະຊຸມຍັງໄດ້ໃຫ້ຄຳແນະນຳ ແລະ ມີຄຳເຫັນກ່ຽວກັບກົນໄກການຕຳນິຕິຊົມ ການພັດທະນາຊັບພະຍາກອນມະນຸດຂອງຂະແໜງສາທາ ແລະ ການສ້າງຄວາມເຂັ້ມແຂງໃນການຄຸ້ມຄອງພະນັກງານ ເຊັ່ນ: ການຕິດຕາມ ສັບຊ້ອນການໃຫ້ສິ່ງຈູງໃຈ ລະບຽບວິໄນ ກົດລະບຽບ ການປັບປຸງຍຸດທະສາດພັດທະນາຊັບພະຍາກອນມະນຸດ ສາທາ ການຄາດຄະເນພະນັກງານ ລະບົບຄວາມຕ້ອງການໃນວິຊາຊີບ ການປັບປຸງສະຖາບັນການສຶກສາວິຊາຊີບ ສາທາລະນະສຸກ ເພື່ອໃຫ້ມີຄວາມຮູ້ທີ່ດີກ່ອນໃຫ້ບໍລິການ ການໃຫ້ທຶນການສຶກສາສຳລັບຂັ້ນຊ່ຽວຊານ ການແພດຄອບຄົວ ແລະ ພະຍາບານ ການສອບເສັງ ການຂຶ້ນທະບຽນ ແລະ ອອກໃບອະນຸຍາດ ແລະ ການສຶກສາຕໍ່ເນື່ອງຂອງວິຊາຊີບປິ່ນປົວມາດຕະຖານຄຸນນະພາບຂອງສະຖາບັນການສຶກສາ ໂຮງໝໍ ແລະ ຄົ້ນຄວ້າວິທີການຫັນໂຮງໝໍກຸ້ມຕົນເອງ ແລະ ບັນຫາທີ່ກ່ຽວຂ້ອງອື່ນໆ ເພື່ອເຮັດໃຫ້ວຽກງານສາທາມີຄວາມເຂັ້ມແຂງ.
（ຄຳຮຸ່ງ）
