ໂດຍເນັ້ນໃສ່ 3 ກຸ່ມການໜູນຊ່ວຍທີ່ກ່າວມາຂ້າງເທິງນັ້ນ ມີກິດຈະກໍາ ແລະ ໂຄງການໃດແດ່ທີ່ ActionAid ໄດ້ຈັດຕັ້ງປະຕິບັດ?
ໜູນຊ່ວຍຊຸມຊົນສ້າງຊີວິດການເປັນຢູ່ແບບຍືນຍົງ ໃນສະພາບການທີ່ຫຍຸ້ງຍາກ; ໜູນຊ່ວຍການບໍລິການດ້ານສາທາລະນະສຸກ ແລະ ການສຶກສາສໍາລັບແມ່ຍິງ ແລະ ເດັກນ້ອຍ; ໜູນຊ່ວຍ ແລະ ເຊື່ອມໂຍງບັນດາຄູ່ຮ່ວມມືຢູ່ທ້ອງຖິ່ນ ແລະ ສູນກາງ ເພື່ອສຶກສາບັນດາບັນຫາສິ່ງແວດລ້ອມ, ການປ່ຽນແປງຂອງດິນຟ້າອາກາດ... ນັ້ນແມ່ນ 3 ຂົງເຂດບຸລິມະສິດຂອງ ActionAid International, ໂດຍທ່ານນາງ ຫ່ວາງຖາວເຮືອງ, ຫົວໜ້າຜູ້ຕາງໜ້າອົງການຈັດຕັ້ງນີ້ຢູ່ ຫວຽດນາມ ໄດ້ແບ່ງປັນກັບວາລະສານຍຸກສະໄໝ.
ປີ 2021 ເປັນປີທີ່ຫຍຸ້ງຍາກສຳລັບຫຼາຍອົງການບໍ່ສັງກັດລັດຖະບານ, ລວມທັງ ActionAid. ພວກເຮົາກໍານົດວ່ານີ້ ຈະເປັນສະຖານະການໃຫມ່, ດັ່ງນັ້ນ ActionAid ຈໍາເປັນຕ້ອງເຮັດວຽກບຸກບືນ ແລະ ປັບຕົວຢ່າງໄວວາ. ແຕ່ກາງປີ 2021, ດ້ວຍການໜູນຊ່ວຍຢ່າງຕັ້ງໜ້າຂອງ VUFO ແລະ PACCOM, ພວກເຮົາພ້ອມກັບບັນດາຄູ່ຮ່ວມມືທ້ອງຖິ່ນ ໄດ້ຊອກຫາວິທີແກ້ໄຂທີ່ມີໄຫວພິບ ເພື່ອສືບຕໍ່ປະຕິບັດບັນດາໂຄງການທ້ອງຖິ່ນ ທ່າມກາງສະພາບການແຜ່ລະບາດຂອງ Covid-19 ທີ່ສັບສົນໃນທົ່ວປະເທດ. ສະນັ້ນ, ໃນສະພາບຄວາມຫຍຸ້ງຍາກຫຼາຍຢ່າງ, ພວກເຮົາໄດ້ເບີກຈ່າຍເງິນເກືອບ 80% ຂອງງົບປະມານປະຈຳປີ. ພວກຂ້າພະເຈົ້າ ປາດຖະໜາຢາກປະກອບສ່ວນບັນດາໝາກຜົນດັ່ງກ່າວ ເປັນສ່ວນໜ້ອຍໜຶ່ງເຂົ້າໃນບັນດາຄວາມມານະພະຍາຍາມລວມຂອງຫວຽດນາມ, ຂອງບັນດາແພດໝໍ ແລະ ຊຸມຊົນ ເພື່ອຜ່ານຜ່າໂລກລະບາດ Covid – 19.
 |
| ໂຄງການເສີມຂະຫຍາຍບົດບາດຂອງແມ່ຍິງໃນການຫຼຸດຜ່ອນຄວາມສ່ຽງໄພພິບັດ ແລະ ການຫຼຸດຜ່ອນໄພພິບັດຢູ່ ຈາວິງ. |
ເຖິງວ່າຈະມີການແຜ່ລະບາດ, ພວກເຮົາຍັງບັນລຸໄດ້ບາງຜົນສໍາເລັດທີ່ສໍາຄັນດ້ວຍ 2 ໂຄງການທີ່ ActionAid ຮ່ວມມືທາງດ້ານການເງິນກັບສະຫະພາບເອີຣົບ ແລະ ລັດຖະບານເຢຍລະມັນ. ທັງສອງໂຄງການນີ້ ຊ່ວຍໃຫ້ປະຊາຊົນສາມາດຮັບມືຕໍ່ໄພພິບັດທຳມະຊາດ ແລະ ການປ່ຽນແປງດິນຟ້າອາກາດໄດ້ດີຂຶ້ນ ແລະ ໜູນຊ່ວຍແມ່ຍິງ ແລະ ໄວໜຸ່ມຊົນເຜົ່າ ໃຫ້ເຂົ້າເຖິງການບໍລິການດູແລສຸຂະພາບຈະເລີນພັນໄດ້ດີຂຶ້ນ. ນີ້ແມ່ນສອງໂຄງການທີ່ຜັນຂະຫຍາຍຫຍຸ້ງຍາກທີ່ສຸດ, ແຕ່ມາຮອດປະຈຸບັນ ໄດ້ລື່ນກາຍຄາດໝາຍທີ່ວາງໄວ້. ພວກເຮົາດີໃຈຫຼາຍທີ່ເຖິງວ່າຈະມີສິ່ງທ້າທາຍຫຼາຍຢ່າງຈາກສະຖານະການ Covid-19, ແຕ່ທັງສອງໂຄງການຍັງໄດ້ຮັບຜົນສໍາເລັດ ແລະ ໄດ້ຮັບການຍອມຮັບຈາກຜູ້ອຸປະຖຳ ແລະ ຊຸມຊົນ.
ທ່ານນາງກະລຸນາແບ່ງປັນ ກ່ຽວກັບການຊົມໃຊ້ຜົນປະໂຫຍດຂອງໂຄງການໃດໜຶ່ງ?
ໂຄງການ “ຈັດຕັ້ງສັງຄົມສົ່ງເສີມ, ປັບປຸງການບໍລິການສຸຂະພາບຈະເລີນພັນຂອງແມ່ຍິງ ແລະ ໄວໜຸ່ມບັນດາເຜົ່າ” ໄດ້ຮັບການສະໜັບສະໜູນໂດຍ ActionAid ຮ່ວມມືກັບສະຫະພາບເອີຣົບ ແລະ ບັນດາຄູ່ຮ່ວມມືທ້ອງຖິ່ນໃນ 4 ປີ ຢູ່ 2 ແຂວງ ດັກລັກ ແລະ ເລິມດົງ. ໂຄງການດັ່ງກ່າວໄດ້ໜູນຊ່ວຍສ້າງຫ້ອງກວດພະຍາດ 2 ແຫ່ງ ດ້ວຍສິ່ງອຳນວຍຄວາມສະດວກ, ອຸປະກອນທີ່ທັນສະໄໝ ແລະ ແພດໝໍທີ່ມີຄວາມຊຳນານ, ສາມາດເວົ້າໄດ້ວ່າ ດີທີ່ສຸດຢູ່ທ້ອງຖິ່ນ ໃນປະຈຸບັນ. ດ້ວຍເຫດນັ້ນ, ຊາວໜຸ່ມ ແລະ ແມ່ຍິງບັນດາເຜົ່າກວ່າ 90.000 ຄົນ ທີ່ປະສົບກັບຄວາມຫຍຸ້ງຍາກ ໄດ້ເຂົ້າເຖິງການດູແລສຸຂະພາບຈະເລີນພັນທີ່ມີຄຸນນະພາບ. ຫຼາຍກວ່າ 90% ຂອງປະຊາຊົນຜູ້ທີ່ໄດ້ໃຊ້ບໍລິການຂອງສອງຫ້ອງກວດພະຍາດນີ້ເວົ້າວ່າ ພວກເຂົາເພິ່ງພໍໃຈຫຼາຍ.
ຄວາມຊົງຈຳທີ່ໜ້າຈົດຈຳທີ່ສຸດຂອງພໍ່ແມ່ປະຊາຊົນແມ່ນຫຍັງ, ຮຽນທ່ານ?
ຂ້າພະເຈົ້າໂຊກດີທີ່ໄດ້ພົບປະພໍ່ແມ່ປະຊາຊົນຫຼາຍຄົນຢູ່ທົ່ວຫວຽດນາມ. ສຳລັບແຂວງດັກລັກ, ຂ້າພະເຈົ້າໄດ້ພົບກັບແມ່ຍິງຫຼາຍຄົນ ທີ່ເຂົ້າຮ່ວມກຸ່ມພັດທະນາຊຸມຊົນ ເຊິ່ງເປັນກຸ່ມຫຼັກທີ່ປະຕິບັດໂຄງການ ທີ່ສະໜັບສະໜູນໂດຍ ActionAid ຢູ່ທ້ອງຖິ່ນ. ມີນ້ອງສາວທີ່ຍັງໝຸ່ມນ້ອຍຄົນໜຶ່ງທີ່ມີລູກ 4 ຄົນ, ແຕ່ລະຄົນເປັນຜົນມາຈາກຄຸມກຳເນີດບໍ່ສຳເລັດ. ແມ່ຍິງຫຼາຍຄົນຍັງແບ່ງປັນວ່າ ໃນອະດີດ, ເຂົາເຈົ້າຈະເດີນທາງຫຼາຍຮ້ອຍກິໂລແມັດ ເພື່ອກວດພະຍາດຍິງ ຫຼື ຍອມຮັບບໍ່ສົນໃຈກັບຄວາມບໍ່ສະບາຍ ແລະ ຄວາມເຈັບປວດທີ່ພະຍາດເຫຼົ່ານີ້ນໍາມາ. ຫຼາຍຄົນບໍ່ເຄີຍເບິ່ງແຍງສຸຂະພາບຈະເລີນພັນຂອງຕົນເອງ ແລະ ສະມາຊິກໃນຄອບຄົວ ເພາະແນວຄິດເກົ່າໆນີ້ ໄດ້ເຫັນບັນຫານີ້ເປັນເລື່ອງລະອຽດອ່ອນ ແລະ ຄະລຳ. ພາຍຫຼັງ 4 ປີແຫ່ງການເຂົ້າຮ່ວມໂຄງການ, ແມ່ຍິງຫຼາຍຄົນ ໄດ້ປ່ຽນຄວາມຮັບຮູ້ນີ້ ແລະ ຕັ້ງໜ້າລະດົມຄອບຄົວ ແລະ ຊຸມຊົນໃຫ້ມີຄວາມເອົາໃຈໃສ່ເຖິງການຮັກສາສຸຂະພາບຈະເລີນພັນ, ປະກອບສ່ວນຮັກສາຄຸນນະພາບສາຍພັນ ແລະ ຄຸນນະພາບຊີວິດຂອງຕົນ.
ທ່ານນາງກະລຸນາແບ່ງປັນກ່ຽວກັບຈຸດສຸມກິດຈະກໍາການຊ່ວຍເຫຼືອຂອງ ActionAid International ໃນປີ 2022 ໄດ້ບໍ?
ປີ 2022 ແມ່ນປີທີ່ບໍ່ແນ່ບໍ່ນອນ, ຍາກທີ່ຈະຄາດຄະເນຫຍັງໄດ້. ສໍາລັບ ActionAid, ນີ້ແມ່ນປີສຸດທ້າຍ ຂອງການປະຕິບັດຍຸດທະສາດແຫ່ງຊາດ ຄັ້ງທີ 6 ໄລຍະ 2018 - 2023. ActionAid ວາງແຜນທີ່ຈະຍັງສືບຕໍ່ເຮັດວຽກຮ່ວມກັບຊຸມຊົນ ໃນການສ້າງຊີວິດການເປັນຢູ່ແບບຍືນຍົງ. ຊີວິດການເປັນຢູ່ແບບຍືນຍົງນີ້ ອາດຈະຢູ່ໃນສະພາບການປ່ຽນແປງຂອງດິນຟ້າອາກາດ, ໃນສະພາບການປ້ອງກັນ Covid-19 ຫຼື ໃນສະພາບທີ່ ຫວຽດນາມ ເຂົ້າຮ່ວມບັນດາສັນຍາການຄ້າເສລີ ແລະ ອາດຈະສົ່ງຜົນສະທ້ອນເຖິງບັນດາຜູ້ຜະລິດຂະໜາດນ້ອຍ. ບູລິມະສິດທີສອງ ຂອງ ActionAid ແມ່ນເພື່ອຊ່ວຍເຫຼືອກຸ່ມຄົນດ້ອຍໂອກາດ ເຊັ່ນ: ແມ່ຍິງ ແລະ ເດັກນ້ອຍ ໃຫ້ໄດ້ຮັບການຊ່ວຍເຫຼືອດ້ານການບໍລິການດ້ານສາທາລະນະສຸກ ແລະ ການສຶກສາທີ່ດີຂຶ້ນ. ບຸລິມະສິດທີ 3 ແມ່ນໜູນຊ່ວຍບັນດາຄູ່ຮ່ວມມືຢູ່ທ້ອງຖິ່ນ ແລະ ສູນກາງເຊື່ອມໂຍງເຂົ້າກັນກ່ວາອີກ ໃນການຄົ້ນຄວ້າບັນດາບັນຫາສິ່ງແວດລ້ອມ, ການປ່ຽນແປງຂອງດິນຟ້າອາກາດ, ພະລັງງານທົດແທນ ແລະ ບັນດາເປົ້າໝາຍພັດທະນາແບບຍືນຍົງ.
ຄຳຮຸ່ງ
