 |
| ທ່ານ Pierre Gréga ປະທານສະມາຄົມມິດຕະພາບ ແບນຊິກ - ຫວຽດນາມ (ພາບ: TTXVN) |
ທ່ານ Pierre Gréga ໃຫ້ຮູ້ວ່າ ທ່ານປະທັບໃຈທີ່ສຸດຕໍ່ບັນດາຜົນສຳເລັດເຊິ່ງຫວຽດນາມບັນລຸໄດ້ຍ້ອນນະໂຍບາຍການພົວພັນຕ່າງປະເທດຂອງຕົນ. ນັ້ນແມ່ນນະໂຍບາຍຫຼາຍຝ່າຍ, ເປີດປະຕູກັບບັນດາປະເທດໃນທົ່ວໂລກ. ສິ່ງດັ່ງກ່າວໄດ້ຊ່ວຍໃຫ້ ຫວຽດນາມ ມີການພົວພັນຕ່າງປະເທດກັບ 100 ກວ່າປະເທດໃນໂລກ, ໄດ້ລົງນາມໃນສັນຍາຮ່ວມມືຍຸດທະສາດ, ສັນຍາການຄ້າເສລີກັບປະມານ 15 ປະເທດ, ພິເສດແມ່ນສັນຍາການຄ້າເສລີກັບສະຫະພາບເອີລົບ (EVFTA), ເຊິ່ງເປັນກຳລັງໜູນຊຸກຍູ້ດ້ານເສດຖະກິດ ແລະ ການລົງທຶນຂອງຫວຽດນາມ.
ທ່ານ Gréga ໃຫ້ຮູ້ວ່າ ສິ່ງທີ່ທ່ານສັງເກດໄດ້ນັ້ນແມ່ນ ຫວຽດນາມ ຂ້ອນຂ້າງເປັນເອກະລາດຈາກບັນດາປະເທດມະຫາອຳນາດໂລກ, ມີຄວາມດຸ່ນດ່ຽງໃນການພົວພັນກັບບັນດາປະເທດມະຫາອຳນາດນີ້ ແລະ ມີການພົວພັນມິດຕະພາບກັບບັນດາປະເທດບ້ານໃກ້ເຮືອນຄຽງ. ທ່ານເນັ້ນໜັກວ່າ ຫວຽດນາມ ກໍ່ຢືນຢັນໄດ້ທີ່ຕັ້ງຂອງຕົນໃນເວທີສາກົນເມື່ອຮັບດຳລົງຕຳແໜ່ງເປັນປະທານສະມາຄົມປະຊາຊາດອາຊີຕາເວັນອອກສ່ຽງໃຕ້ (ອາຊຽນ) ໃນປີ 2020, ແມ່ນສະມາຊິກບໍ່ຖາວອນຂອງສະພາຄວາມໝັ້ນຄົງສະຫະປະຊາຊາດ ໄລຍະ 2020-2021. ທຸກສິ່ງທຸກຢ່າງນີ້ສະແດງໃຫ້ເຫັນວ່າ ບັນດາໝາກຜົນຂອງນະໂຍບາຍການພົວພັນຕ່າງປະເທດຂອງຫວຽດນາມ ໄດ້ຮັບການຮັບຮູ້ຈາກໂລກ.
ເມື່ອສະແດງຄວາມເຫັນກ່ຽວກັບວິທີທີ່ຫວຽດນາມ ສືບຕໍ່ປະຕິບັດເພື່ອຍົກງສູງທີ່ຕັ້ງຂອງຕົນໃນເວທີສາກົນ, ທ່ານ Pierre Gréga ໃຫ້ຮູ້ວ່າ: ໃນສະພາບການໂລກພວມມີການຜັນແປຫລາຍຢ່າງຄືໃນປັດຈຸບັນ, ຄວາມເຄັ່ງຕຶງ, ການປະທະກັນ ແລະ ການແຜ່ລະບາດຂອງພະຍາດ COVID-19, ການປ່ຽນແປງຂອງດິນຟ້າອາກາດ... ມີຄວາມສ່ຽງຫຼາຍຢ່າງທີ່ມີຢູ່ໃນໂລກ, ສິ່ງສຳຄັນທີ່ສຸດແມ່ນຕ້ອງຮັກສາໄດ້ຄວາມເປັນເຈົ້າຕົນເອງ ແລະ ສ້າງຄວາມດຸ່ນດ່ຽງໃນການພົວພັນກັບບັນດາປະເທດມະຫາອຳນາດບົນພື້ນຖານນະໂຍບາຍຫຼາຍຝ່າຍ. ຕາມທ່ານແລ້ວ, ສິ່ງດັ່ງກ່າວມີຄວາມສຳຄັນຫຼາຍເພື່ອເຈລະຈາກັບບັນດາປະເທດມະຫາອຳນາດ, ພ້ອມກັນນັ້ນ ກໍສ້າງທີ່ຕັ້ງໃໝ່ໃນການພົວພັນຮ່ວມມືກັບບັນດາປະເທດ.
ທ່ານ Gréga ຖືວ່າ ຫວຽດນາມ ສາມາດເພີ່ມທະວີການພົວພັນທາງການທູດ ແລະ ການລົງທຶນຢູ່ອາຟຼິກາ ຄືໃນກໍລະນີຂອງກັບປະເທດ ແບນຊິກ ເຊິ່ງເປັນປະເທດນ້ອຍຢູ່ເອີລົບ ແຕ່ປະສົບຜົນສຳເລັດພໍສົມຄວນຢູ່ອາຟຼິກາ, ຄຽງຄູ່ກັບບັນດາປະເທດໃຫຍ່ຄື ຝະລັ່ງ ແລະ ປັດຈຸບັນແມ່ນຈີນ. ທ່ານຢືນຢັນວ່າ ຫວຽດນາມ ຍັງມີທີ່ຕັ້ງສຳຄັນຢູ່ອາຟຼິກາ ໃນການພົວພັນຮ່ວມມືໃຕ້ - ໃຕ້, ເພາະວ່າ ຫວຽດນາມ ມີຫຼາຍຄູ່ຮ່ວມມືໃຕ້ - ໃຕ້ ແລະ ສິ່ງດັ່ງກ່າວແມ່ນຄວາມສາມາດບົ່ມຊ້ອນເພື່ອໃຫ້ ຫວຽດນາມ ເປີດກວ້າງການຮ່ວມມື.
ໂດຍເຕື້ອງເຖິງນະໂຍບາຍການປ່ຽນແປງໃໝ່ ຂອງຫວຽດນາມ ທີ່ໄດ້ຮັບການປະຕິບັດນັບແຕ່ປີ 1986, ທ່ານ Gréga ເນັ້ນໜັກວ່າ ຫວຽດນາມ ພວມມີການປ່ຽນແປງຢ່າງວ່ອງໄວ. ໂດຍໄດ້ມາຫວຽດນາມໃນຊຸມປີ 1990 ແລະ ນັບແຕ່ນັ້ນມາ, ທ່ານໄດ້ໄປປະຕິບັດງານເປັນຫຼາຍສິບຄັ້ງຢູ່ປະເທດອາຊີຕາເວັນອອກສ່ຽງໃຕ້ນີ້, ທ່ານ Gréga ໃຫ້ຄຳເຫັນວ່າ: ນະໂຍບາຍການປ່ຽນແປງໃໝ່ ໄດ້ອຳນວຍຄວາມສະດວກໃຫ້ແກ່ການພັດທະນາເສດຖະກິດຕະຫຼາດ. ນີ້ແມ່ນບາດກ້າວທຳອິດທີ່ສຳຄັນເພື່ອສ້າງເງື່ອນໄຂສະດວກໃຫ້ແກ່ການເປີດກ້ວາງຂະແໜງກະສິກຳ ແລະ ລັດວິສາຫະກິດ. ພື້ນຖານເສດຖະກິດເປີດກວ້າງການດຶງດູດການລົງທຶນຈາກຕ່າງປະເທດ. ນັ້ນແມ່ນໝາກຜົນຂອງນະໂຍບາຍການປ່ຽນແປງໃໝ່ ຂອງ ຫວຽດນາມ.
ທ່ານເນັ້ນໜັກວ່າ ສິ່ງສຳຄັນມາຮອດປະຈຸບັນແມ່ນ ຫວຽດນາມ ສືບຕໍ່ພັດທະນາຕາມເສັ້ນທາງສັງຄົມນິຍົມ. ສໍາລັບທ່ານແລ້ວ, ສິ່ງນີ້ແມ່ນສິ່ງທີ່ຫນ້າສົນໃຈ. ຫວຽດນາມ ຍັງຮັກສາຄວາມສົມດູນລະຫວ່າງການພັດທະນາເສດຖະກິດ ແລະ ສັງຄົມນິຍົມ. ລັດຮັກສາໄດ້ບົດບາດສຳຄັນ, ແມ່ນປັດໄຈດັດປັບການຕະຫຼາດ, ຄວາມດຸ່ນດ່ຽງ ແລະ ຫຼຸດຜ່ອນຄວາມບໍ່ສົມດຸນໃນພື້ນຖານເສດຖະກິດ. ຕາມທ່ານແລ້ວ, ການປ່ຽນແປງໃໝ່ ໄດ້ນຳຫວຽດນາມ ເຊື່ອມໂຍງເຂົ້າກັບໂລກ ແລະ ພື້ນຖານເສດຖະກິດໂລກ. ເຖິງຢ່າງໃດກໍຕາມ, ຫວຽດນາມ ຍັງຕ້ອງມີຄວາມລະມັດລະວັງຕໍ່ຄວາມສ່ຽງທີ່ເກີດຈາກພື້ນຖານເສດຖະກິດໂລກ ແລະ ຫຼາຍປະເທດພວມປະເຊີນໜ້າຢູ່ໃນປະຈຸບັນ. ແຕ່ທ່ານ Gréga ເຊື່ອໝັ້ນວ່າ ເຄື່ອງມືທີ່ມີປະສິດທິຜົນຂອງຫວຽດນາມ ແມ່ນພື້ນຖານເສດຖະກິດສັງຄົມນິຍົມ, ມີໂຄງປະກອບຢ່າງດີ ແລະ ຮັກສາໄດ້ດີ.
ໃນຖານະທີ່ເປັນປະທານສະມາຄົມມິດຕະພາບແບນຊິກ-ຫວຽດນາມ, ທ່ານ Pierre Gréga ຢືນຢັນຈະສືບຕໍ່ເສີມຂະຫຍາຍບົດບາດເປັນຂົວຕໍ່ລະຫວ່າງຫວຽດນາມ ແລະ ແບນຊິກ, ສະໜັບສະໜູນຫວຽດນາມ ໃນດ້ານການເມືອງ ເພື່ອເພີ່ມທະວີການພົວພັນແລກປ່ຽນລະຫວ່າງລັດຖະສະພາ ແລະ ລັດຖະບານຂອງສອງປະເທດ ເພື່ອແນໃສ່ຊຸກຍູ້ການຮ່ວມມືລະຫວ່າງສອງປະເທດຢ່າງມີປະສິດທິຜົນທີ່ສຸດ. ປີ 2023 ແມ່ນຂີດໝາຍ 50 ປີແຫ່ງວັນສ້າງຕັ້ງການພົວພັນທາງການທູດ ຫວຽດນາມ - ແບນຊິກ ແລະ ສະມາຄົມມິດຕະພາບແບນຊິກ - ຫວຽດນາມ ພວມກະກຽມໃຫ້ແກ່ເຫດການນີ້. ສະມາຄົມກໍ່ສືບຕໍ່ຊຸກຍູ້ການພົວພັນທາງການທູດປະຊາຊົນ ເພື່ອແນໃສ່ເພີ່ມທະວີການພົວພັນມິດຕະພາບທີ່ເປັນມູນເຊື້ອລະຫວ່າງສະມາຄົມມິດຕະພາບແບນຊິກ - ຫວຽດນາມ ແລະ ສະມາຄົມມິດຕະພາບ ຫວຽດນາມ - ແບນຊິກ.
ບຸນຄົງ
