 |
ໂຄງການກໍ່ສ້າງເສັ້ນທາງລົດໄຟ ລາວ-ຈີນ ກຳລັງເດີນໜ້າຕາມລຳດັບ.
ທ່ານ ກອງສີ ແສງມະນີ ຮອງລັດຖະມົນຕີ ກະຊວງສຶກສາທິການ ແລະ ກີລາ ໃຫ້ສຳພາດ ວັນທີ 3 ກໍລະກົດ 2019 ວ່າ: ວຽກງານອາຊີວະສຶກສາເປັນວຽກງານໜຶ່ງທີ່ພັກລັດຖະບານ ໄດ້ເອົາໃຈໃສ່ມາໂດຍຕະຫຼອດ ໃນການຍົກລະດັບວິຊາຊີບໃນລະດັບຕົ້ນ ກາງ ສູງ ໃນການສ້າງນາຍຊ່າງກຳມະກອນສີມືທີ່ມີເຕັກນິກ ເພື່ອຮັບໃຊ້ໃຫ້ແກ່ການພັດທະນາເສດຖະກິດ-ສັງຄົມຂອງຊາດ ນັບແຕ່ກອງປະຊຸມໃຫຍ່ ຄັ້ງທີ VII ຂອງພັກເປັນຕົ້ນມາ (2005-2010) ໄດ້ເອົາໃຈໃສ່ເປັນພິເສດໃນການກໍ່ສ້າງນັກວິຊາການໃນລະດັບຕົ້ນ ສ້າງຄົນໃຫ້ເປັນລັກຊະນະຮູບທາດ ສ້າງນາຍຊ່າງສີມືເປັນຜູ້ຜະລິດ ເຊິ່ງໄດ້ຮັບການສະໜັບສະໜູນທຶນຮອນຈາກລັດ ແລະ ບັນດາປະເທດຄູ່ຮ່ວມພັດທະນາ ເລີ່ມແຕ່ປີ 2003 ພວກເຮົາໄດ້ຕັ້ງເປົ້າໃນທົ່ວປະເທດຕ້ອງມີໂຮງຮຽນວິຊາຊີບໝົດທຸກແຂວງ ແລະ ເປົ້າໝາຍນີ້ໄດ້ສຳເລັດ ໃນປີ 2008-2009 ມີການຂະຫຍາຍໂຮງຮຽນອາຊີວະສຶກສາໃນທົ່ວປະເທດ ໃນນັ້ນ ມີການຊ່ວຍເຫຼືອຈາກປະເທດເພື່ອນມິດ ອົງການຈັດຕັ້ງສາກົນ ສະຖາບັນທະນາຄານ ຫຼັກໆແມ່ນໄດ້ຮັບການຊ່ວຍເຫຼືອຈາກລັດຖະບານເຢຍລະມັນ ໃນເປົ້າໝາຍການສ້າງນາຍຊ່າງກຳມະກອນໃນອາຊີບຕ່າງໆ ເພື່ອຮັບໃຊ້ໃຫ້ແກ່ການພັດທະນາເສດຖະກິດ-ສັງຄົມໃນແຕ່ລະທ້ອງຖິ່ນ.
ໂຄງການລົດໄຟ ລາວ – ຈີນ ໄດ້ວາງສິລາເລິກ ແລະ ເລີ່ມກໍ່ສ້າງ ໂຄງການໃນວັນທີ 2 ທັນວາ 2015 ເຊິ່ງເປັນຜົນງານອັນຍິ່ງໃຫຍ່ຂອງລັດຖະບານ, ໂດຍປະຕິບັດຕາມບົດຮຽນຂອງສາກົນ ທີ່ລະບຸໄວ້ໃນສັນຍາສອງຝ່າຍ ລາວ-ຈີນ.ໂຄງການລົດໄຟ ລາວ – ຈີນ ແມ່ນ ຄວາມຫວັງສຳຄັນທາງດ້ານເສດຖະກິດ, ການຂົນສົ່ງ, ການທ່ອງທ່ຽວຂອງ ສປປ ລາວ ທີ່ຈະສາມາດເຊື່ອມຈອດກັບປະເທດທີ່ມີຊາຍແດນຕິດຈອດກັບທະເລ ເຊັ່ນ: ທາງລົດໄຟປະເທດໄທ, ມາເລເຊຍ ແລະ ປະເທດອື່ນໆ ຄາດກັນວ່າໂຄງການດັ່ງກ່າວຈະຊ່ວຍຍົກລະດັບ GDP ຂອງລາວໃຫ້ເຕີບໂຕ ແລະ ເຮັດໃຫ້ຄວາມບອບບາງຂອງເສດຖະກິດລາວ ໃຫ້ມີຄວາມເຂັ້ມແຂງຂຶ້ນ.
ໂຄງການກໍ່ສ້າງທາງລົດໄຟ ລາວ – ຈີນ ລັດຖະບານລາວ ຖືຫຸ້ນ 30% ແລະ ລັດຖະບານຈີນ 70% ມີຄວາມຍາວທັງໝົດ 409 ກິໂລແມັດ ເລີ່ມລົງມືກໍ່ສ້າງມາແຕ່ປີ 2015 ເຊິ່ງມີເສັ້ນທາງຕັດຜ່ານ 4 ແຂວງ ແລະ 1 ນະຄອນຫຼວງ ໂດຍນັບຈາກແຂວງຫຼວງນ້ຳທາ ມີຄວາມຍາວປະມານລົດໄຟຕັດຜ່ານ 16,9 ກິໂລແມັດ ສຳເລັດການໄກ່ເກ່ຍ ແລະ ດຳເນີນການກໍ່ສ້າງແລ້ວ 97,04%, ອຸດົມໄຊ 126,6 ກິໂລແມັດ ຄືບໜ້າເທົ່າກັບ 99,3%, ຫຼວງພະບາງ 80 ກິໂລແມັດ ຄືບໜ້າ 95,3%, ແຂວງວຽງຈັນ 145 ກິໂລແມັດ ຄືບໜ້າ 95,5% ແລະ ນະຄອນຫຼວງວຽງຈັນ 40 ກິໂລແມັດ ສໍາເລັດການໄກ່ເກ່ຍແລ້ວ 74% ສ່ວນທີ່ເຫຼືອແມ່ນພື້ນທີ່ປຸກສ້າງ.
ເພື່ອຮອງຮັບດ້ານບຸຄະລາກອນໃຫ້ແກ່ໂຄງການທາງລົດໄຟ ລາວ-ຈີນ ກະຊວງກຳລັງຈະສ້າງວິທະຍາໄລການລົດໄຟ ທີ່ເປັນການຊ່ວຍເຫຼືອລ້າຈາກລັດຖະບານຈີນ ປັດຈຸບັນ ກຳລັງສົ່ງຄູໄປເຝິກອົບຮົມວິຊາຊີບຊ່າງໄຟຟ້າ ສັນຍານ ສ້ອມແປງກົນຈັກພາກບໍລິການພາຍໃນການບໍລິການພາຍນອກ ແລະ ບັນຊາລົດໄຟ (ຂັບລົດໄຟ) ເຊິ່ງສາມາດຮັບນັກຮຽນເຂົ້າຮຽນໄລຍະ 3 ປີ ຈຳນວນ 1.000 ຄົນ ຈະຮັບເຂົ້າຮຽນປີລະ 300 ຄົນ ໃຊ້ໄລຍະເວລາໃນການຮຽນ 3 ປີ ຈົບຫຼັກສູດ ເປັນອີກວິຊາຊີບໃໝ່ທີ່ຈະມີຂຶ້ນໃນເວລາອັນໃກ້ນີ້ ດັ່ງນັ້ນ ຈຶ່ງຮຽກຮ້ອງມາຍັງຜູ້ປົກຄອງຈົ່ງຊ່ວຍຊຸກຍູ້ລູກຫຼານຂອງຕົນ ຫັນມາສົນໃຈເຂົ້າຮຽນອາຊີວະສຶກສາໃຫ້ຫຼາຍຂຶ້ນ ເພາະເປັນວິຊາຮຽນທີ່ຮຽນຈົບແລ້ວຈະມີໂອກາດ ມີວິຊາອາຊີບ ເຊິ່ງສ່ວນໃຫຍ່ໃນປັດຈຸບັນນັກຮຽນມັກແລ່ນຕາມກະແສສັງຄົມຫຼາຍກວ່າ ເພື່ອຮຽນປະກອບອາຊີບຕໍ່ກັບວຽກງານອາຊີວະສຶກສາ ເປັນວຽກງານພື້ນຖານຈຳເປັນໃນການພັດທະນາເສດຖະກິດ-ສັງຄົມ ເພາະສະນັ້ນທຸກພາກສ່ວນຕ້ອງມີສ່ວນຮ່ວມໃນການຊຸກຍູ້ວຽກງານດັ່ງກ່າວ ເພື່ອໃຫ້ໄດ້ຮັບການພັດທະນາ ໄປພ້ອມກັບການພັດທະນາເສດຖະກິດ-ສັງຄົມຂອງປະເທດລາວ.
（ແຫຼ່ງຂໍ້ມູນ： vientianemai.net）
