| ຟື້ນຟູຂະແໜງທ່ອງທ່ຽວ, ເສດຖະກິດນະຄອນ ໂຮ່ຈີມິນ | |
| ນະຄອນ ດ່າໜັງ ຕ້ອນຮັບຖ້ຽວບິນທຳອິດ ນຳນັກທ່ອງທ່ຽວສາກົນ ມາຫວຽດນາມ |
 |
| ພາບປະກອບ: zingnews.vn |
ຕາມທ່ານ ເຈີ່ນວັນແທງ (ຫົວໜ້າພະແນກທ່ອງທ່ຽວບິ່ງດິ້ງ) ແລ້ວ, ນະຄອນ ບິ່ງດິ້ງ ແລະ ນະຄອນ ໂຮ່ຈີມິນ ໄດ້ເພີ່ມເຕີມເຂົ້າໃນລາຍຊື່ການທົດລອງຕ້ອນຮັບນັກທ່ອງທ່ຽວສາກົນແຕ່ຕົ້ນປີ 2022. ຈາກນີ້ຮອດເດືອນ ເມສາ, ແຕ່ລະອາທິດ ບິ່ງດິ່ງ ຈະຕ້ອນຮັບ 2 ຖ້ຽວບິນທີ່ມີແຂກປະມານ 2,000 ຄົນຈາກ ສ.ເກົາຫຼີ ແລະ ຍີ່ປຸ່ນ ໃນຖ້ຽວບິນ charter ໄປສະຫນາມບິນ ຟູ່ກາດ.
ປະຈຸບັນ, ບັນດາສະຖານທີ່ພັກເຊົາ, ວິສາຫະກິດທ່ອງທ່ຽວໄດ້ເປີດປະຕູ, ກະກຽມດ້ານພື້ນຖານໂຄງລ່າງ, ແຫຼ່ງຊັບພະຍາກອນມະນຸດເພື່ອຕ້ອນຮັບແຂກ. ບິ່ງດິ່ງ ສູ້ຊົນບັນລຸເກືອບ 3,4 ລ້ານເທື່ອຄົນໃນທ້າຍປີ 2022 ແລະ ຮອດທ້າຍປີ 2025 ຈະມີນັກທ່ອງທ່ຽວມາຢ້ຽມຢາມທ້ອງຖິ່ນ 8 ລ້ານເທື່ອຄົນ.
ຂະແໜງການທ່ອງທ່ຽວບິ່ງດິ່ງ ກໍ່ກຽມພ້ອມຫ້ອງພັກມາດຕະຖານ 5 ດາວ 2.000 ຫ້ອງຢູ່ແຫຼມ ເຟືອງມາຍ ເພື່ອທົດລອງຮັບແຂກສາກົນ. ຂະແໜງສາທາລະນະສຸກກໍໄດ້ສັກວັກຊິນປ້ອງກັນໂຄວິດ-19 ຢ່າງຄົບຖ້ວນໃຫ້ປະຊາຊົນຢູ່ທີ່ນີ້ 100%.
ຕາມກົມສະຖິຕິ, ນັກທ່ອງທ່ຽວສາກົນມາຫວຽດນາມ ໃນເດືອນ ທັນວາ 2021 ບັນລຸ 17.2000 ຄົນ, ເພີ່ມຂຶ້ນ 14,2% ເມື່ອທຽບໃສ່ເດືອນກ່ອນ. ນັກທ່ອງທ່ຽວສາກົນມາຫວຽດນາມ ເພີ່ມຂຶ້ນຢ່າງວ່ອງໄວ ຍ້ອນໂຄງການທົດລອງຕ້ອນຮັບນັກທ່ອງທ່ຽວສາກົນນັບແຕ່ເດືອນພະຈິກ 2021, ບັນດາຖ້ຽວບິນການຄ້າສາກົນເລີ່ມຟື້ນຟູຄືນໃໝ່.
ໃນປີ 2021, ນັກທ່ອງທ່ຽວສາກົນມາຫວຽດນາມ ຄາດວ່າຈະບັນລຸ 157.000 ກວ່າເທື່ອຄົນ, ຫຼຸດລົງເກືອບ 96% ເມື່ອທຽບໃສ່ປີກາຍ, ໃນນັ້ນມີນັກຊ່ຽວຊານ ແລະ ພະນັກງານວິຊາການຕ່າງປະເທດທີ່ເຮັດວຽກຢູ່ຫວຽດນາມ ເປັນຕົ້ນຕໍ.
ໄຊພອນ
