 |
ກຽມຄັດເລືອກຜູ້ປະກອບການຂອງລາວ ເພື່ອຊີງລາງວັນ ທຸລະກິດດີເດັ່ນ ອາຊຽນ
ໃນວັນທີ 25 ມິຖຸນາຜ່ານມານີ້ ສະພາການຄ້າ ແລະອຸດສາຫະກໍາແຫ່ງຊາດລາວ ໄດ້ຈັດງານລ້ຽງພົບປະ ແລະ ໃຫ້ຂໍ້ມູນ ກ່ຽວກັບ "ງານຊີງລາງວັນທຸລະກິດດີເດັ່ນອາຊຽນ ແຫ່ງສປປ ລາວ 2019" ຂຶ້ນທີ່ໂຮງແຮມເສດຖາປຼາດ, ນະຄອນຫຼວງວຽງຈັນ ໂດຍມີທ່ານ ສະຫວັນຄອນ ຣາຊມຸນຕຣີ, ຮອງລັດຖະມົນຕີກະຊວງຖະແຫຼງຂ່າວວັດທະນະທໍາ ແລະ ທ່ອງທ່ຽວ, ທ່ານ ທະນົງສິນ ກັນລະຍາ, ຮອງປະທານສະພາການຄ້າແລະອຸດສາຫະກໍາແຫ່ງຊາດລາວ, ມີພາກສ່ວນກ່ຽວຂ້ອງເຂົ້າຮ່ວມ. ທ່ານ ທະນົງສິນ ກັນລະ ຍາ ກ່າວວ່າ: ຈຸດປະສົງຂອງງານລ້ຽງຄັ້ງນີ້ ແມ່ນເພື່ອຮັບຮູ້ຜູ້ປະກອບການດີເດັ່ນ ຂອງສປປ ລາວ ທີ່ມີຫົວຄິດປະດິດສ້າງ ແລະ ຕອບສະໜອງໄດ້ຕາມຄວາມຕ້ອງການຂອງຕະຫຼາດ; ບັນດາບໍລິສັດທີ່ເຂົ້າຮ່ວມແມ່ນກຽມພ້ອມເປັນຢ່າງດີເພື່ອແຂ່ງຂັນ ແລະ ສະແດງໃຫ້ເຫັນຜະລິດຕະພັນທີ່ດີທີ່ສຸດຂອງພວກເຂົາ, ການເຂົ້າຮ່ວມຊີງລາງວັນທຸລະກິດດີເດັ່ນອາ ຊຽນ ແມ່ນຈະເລີ່ມ ເປີດຮັບສະ ໝັກ ຈົນເຖິງວັນທີ 2 ສິງຫາ 2019 ນີ້ ແລະ ງານດັ່ງກ່າວ ຈະໄດ້ ຈັດຂຶ້ນໃນເດືອນພະຈິກ 2019 ທີ່ບາງກອກ ປະເທດໄທ.
ຊຶ່ງລາງວັນທຸລະກິດດີເດັ່ນອາຊຽນ ແມ່ນໄດ້ນໍາເອົານະວັດຕະກໍາ ແລະ ຕົວຂັບເຄື່ອນ ດ້ານຕະຫຼາດຂອງວິສາຫະກິດ SMEs ສະແດງໃຫ້ເຫັນຄວາມສາມາດທີ່ແທ້ຈິງ ຂອງການເປັນບໍລິສັດທີ່ໂດດເດັ່ນ ໃນພາກພື້ນ ເພື່ອເປັນແຮງຊຸກຍູ້ ແລະ ເປັນຕົວແທນເປີດກວ້າງເຄືອຂ່າຍທຸລະກິດອາຊຽນ ໄປພ້ອມກັບ ການແລກປ່ຽນຮຽນຮູ້ຊຶ່ງກັນ ແລະ ກັນ. ທ່ານ ເຈນສ ປີເຕີ ລູເກັນແຮັມ ເອກອັກຄະລັດຖະທູດ ເຢຍລະມັນ ປະຈຳລາວ ກ່າວ ວ່າ: ນີ້ ແມ່ນໂອກາດທີ່ດີ ສໍາລັບບໍລິສັດຂອງລາວ ທີ່ມີຄວາມຄິດສ້າງສັນ, ຄວາມເປັນຜູ້ນໍາທາງດ້ານທຸລະກິດແບບຫຼາກຫຼາຍ ແລະ ຜະລິດຕະພັນທີ່ດີເດັ່ນ ທີ່ເຕັມໄປດ້ວຍຄວາມມີຫົວຄິດປະດິດສ້າງໃນຕະຫຼາດທີ່ມີມູນຄ່າສູງ. ສຳລັບ ບັນດາວິສາຫະກິດທົ່ວປະເທດທີ່ລົງທະບຽນແລະ ດໍາເນີນທຸລະກິດຖືກຕ້ອງຕາມກົດໝາຍ ສປປລາວ ໄດ້ຖືກເຊີນເຂົ້າຮ່ວມຊີງລາງວັນໃນຄັ້ງນີ້ ແບບຟອມສະໝັກຊີງລາງວັນ ດາວໂຫຼດໄດ້ທີ່: www.lncci.la/aba 2019. ປິດຮັບສະໝັກ ວັນທີ 2 ສິງຫາ 2019. ລາຍຊື່ຜູ້ຊະນະເລີດຈະໄດ້ປະກາດ ໃນວັນທີ 20 ສິງຫາ 2019. ພິທີມອບລາງວັນ ABAL ຈະຈັດຂຶ້ນ 6 ກັນຍາ 2019 ທີ່ນະຄອນຫຼວງວຽງຈັນ. ສໍາລັບປີນີ້, ຫົວຂໍ້ແມ່ນ ABA ຂອງລາວ ໂດຍສອດຄ່ອງກັບຄວາມຕ້ອງການຂອງການແຂ່ງຂັນນັກທຸລະກິດດີເດັ່ນຂອງອາຊຽນ ຊຶ່ງຈະຈັດຂຶ້ນ ທີ່ບາງກອກ ປະເທດໄທ 2019 ຊຶ່ງມີ 25 ລາງວັນ ທີ່ຖືກຄາດຄະເນໄວ້ ໃນລະດັບການແຂ່ງຂັນ.
（ແຫຼ່ງຂໍ້ມູນ： pasaxon.org.la）
