 |
ທ່ານ ສະເຫຼີມໄຊ ກົມມະສິດ ແລະ ທ່ານນາງ ອີ່ງ ອີລິກເຊັນ ຊໍເລນ
ໃນວັນທີ 28 ມິຖຸນາ 2019, ທ່ານ ສະເຫຼີມໄຊ ກົມມະສິດ ໄດ້ພົບປະສອງຝ່າຍກັບ ທ່ານ ນາງ ອີ່ງ ອີລິກເຊັນ ຊໍເລນ ພາຍໃຕ້ບັນຍາກາດອັນສ້າງສັນ ແລະ ກົງໄປກົງມາ, ຊຶ່ງໃນການພົບປະຄັ້ງນີ້ ທ່ານ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕາງໜ້າໃຫ້ລັດຖະບານສະແດງຄວາມຂອບໃຈ ແລະ ຕີລາຄາສູງຕໍ່ການຊ່ວຍເຫຼືອຂອງລັດຖະບານ ແລະ ປະຊາຊົນ ນອກແວ ໃຫ້ແກ່ ສປປ ລາວ ໃນໄລຍະຜ່ານມາ ເປັນຕົ້ນໃນໂຄງການໄຟຟ້ານໍ້າຕົກ, ຂະແໜງກົດໝາຍ, ການສຶກສາ, ສາທາລະນະສຸກຂັ້ນພື້ນຖານ, ການຄຸ້ມຄອງຊັບພະຍາກອນທຳມະຊາດ ແລະ ສິ່ງແວດລ້ອມ, ການພັດທະນາຊັບພະຍາກອນມະນຸດ, ສ້າງຄວາມສາມາດໃຫ້ແກ່ໂຄງການນໍ້າປະປາ ແລະ ການສະໜັບສະໜູນພາກລັດ, ໂດຍສະເພາະແມ່ນການໃຫ້ຄວາມຊ່ວຍເຫຼືອໃນການເກັບກູ້ລະ ເບີດບໍ່ທັນແຕກຢູ່ ສປປ ລາວ ນັບແຕ່ປີ 1996-2018 ລວມມູນຄ່າ ຫຼາຍກວ່າ 30 ລ້ານໂດລາ, ຊຶ່ງມາໃນໄລຍະປີ 2018-2020 ມີມູນຄ່າ 400.000 ໂດລາຕໍ່ປີ, ໂດຍໄດ້ສຸມໃສ່ໂຄງການເກັບກູ້ລະເບີດບໍ່ທັນແຕກ ຢູ່ ແຂວງຫຼວງພະບາງ ແລະ ຊຽງຂວາງ ລວມທັງການຮ່ວມມືກັນໃນຂອບຂອງສົນທິສັນຍາລະເບີດລູກຫວ່ານ.
ນອກນັ້ນ, ນອກແວ ຍັງຈະສືບຕໍ່ໃຫ້ການຊ່ວຍເຫຼືອແກ່ໂຄງການເກັບກູ້ລະເບີດບໍ່ທັນແຕກຢູ່ ສປປ ລາວ ລວມທັງການເປັນຄູ່ຮ່ວມມືໃນຂະແໜງການອາຊຽນ ຊຶ່ງໄດ້ມີການເຄື່ອນໄຫວຢ່າງຕັ້ງໜ້າເພື່ອເປົ້າໝາຍການພັດທະນາແບບຍືນຍົງ, ການພັດທະນາພະລັງງານສະອາດ, ການຄ້າ, ການປ່ຽນແປງດິນຟ້າອາກາດ ແລະ ການປົກປ້ອງສິ່ງແວດລ້ອມ. ໃນຕອນທ້າຍຂອງການພົບປະ, ທັງສອງຝ່າຍຍັງໄດ້ແລກປ່ຽນຄໍາຄິດຄໍາເຫັນຕໍ່ສະ ພາບການພົ້ນເດັ່ນໃນພາກພື້ນ ແລະ ສາກົນ ທີ່ຕ່າງຝ່າຍຕ່າງມີຄວາມສົນໃຈ.
ຫຼັງຈາກນັ້ນ, ທ່ານ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ຍັງໄດ້ພົບປະກັບ ທ່ານ ດັກອິນ ອຸນສະເຕນ ລັດຖະມົນຕີພັດທະນາສາກົນຂອງ ນອກແວ, ຊຶ່ງສອງຝ່າຍໄດ້ທົບທວນ ແລະ ຕີລາຄາການຊ່ວຍເຫຼືອຂອງ ນອກແວ ຕໍ່ ສປປ ລາວ ໃນຫຼາຍໆຂະແໜງການທັງພາກລັດ ແລະ ເອກະຊົນ ທີ່ໄດ້ຮັບຜົນສຳເລັດເປັນຢ່າງດີ ພ້ອມທັງໄດ້ສະເໜີໃຫ້ຝ່າຍນອກແວສືບຕໍ່ໃຫ້ການຊ່ວຍເຫຼືອແກ່ ສປປ ລາວ ໃນໂຄງການເກັບກູ້ລະເບີດບໍ່ທັນແຕກໃຫ້ມີປະສິດທິຜົນຕໍ່ໆໄປ. ຈາກນັ້ນ ທ່ານ ລັດຖະມົນຕີ ສະເຫຼີມໄຊ ກົມມະສິດ ພ້ອມດ້ວຍຄະນະໄດ້ພົບປະກັບ ຄະນະຮັບຜິດຊອບອົງການຊ່ວຍເຫຼືອຂອງປະຊາຊົນ ນອກແວ ແລະ ພົບປະກັບຄະນະຂອງສະຖາບັນການເງິນຊ່ວຍເຫຼືອຂອງນອກແວ ແລະ ໄດ້ຢ້ຽມຊົມສະຖານທີທ່ອງທ່ຽວວັດທະນະທຳຕ່າງໆ ຂອງປະເທດນອກແວ. ຄຽງຄູ່ກັບການຢ້ຽມຢາມດັ່ງກ່າວ, ສອງຝ່າຍກໍ່ມີການພົບປະປຶກສາຫາລືດ້ານການເມືອງ ລະຫວ່າງ ສອງກະຊວງການຕ່າງປະເທດ ລາວ-ນອກແວ ຄັ້ງທີ 2 ໃນລະດັບຫົວໜ້າກົມ ຊຶ່ງໄດ້ດຳເນີນໄປດ້ວຍບັນຍາ ກາດອັນສ້າງສັນ ແລະ ເຂົ້າອົກເຂົ້າໃຈຊຶ່ງກັນ ແລະ ກັນ ແຕ່ຕົ້ນຕະຫຼອດປາຍ.
（ແຫຼ່ງຂໍ້ມູນ： pasaxon.org.la）
