ການສົ່ງອອກໄມ້ ແລະ ຜະລິດຕະພັນໄມ້ຂອງຫວຽດນາມ ສືບຕໍ່ສ້າງສະຖິຕິໃໝ່ໃນປີ 2021 ດ້ວຍວົງເງິນການຄ້າ 15,6 ຕື້ໂດລາສະຫະລັດ, ໃນນັ້ນ ອາເມລິກາ ແມ່ນຕະຫຼາດນຳເຂົ້າໄມ້ ແລະຜະລິດຕະພັນໄມ້ຂອງຫວຽດນາມ ໃຫຍ່ກວ່າໝູ່, ຄາດວ່າວົງເງິນການຄ້າປະມານ 9,1 ຕື້ໂດລາສະຫະລັດ.
 |
| ພາບປະກອບ: T.L |
ຕາມຄະນະກຳມະການການຄ້າສາກົນອາເມລິກາ (USITC), ໃນ 10 ເດືອນຂອງປີ 2021, ການນຳເຂົ້າເຄື່ອງເຟີນີເຈີໄມ້ຂອງ ອາເມລິກາ ບັນລຸ 20,4 ຕື້ ໂດລາສະຫະລັດ, ເພີ່ມຂຶ້ນ 37,8% ເມື່ອທຽບໃສ່ໄລຍະດຽວກັນຂອງປີ 2020. ຫວຽດນາມສືບຕໍ່ແມ່ນຕະຫຼາດສະໜອງເຄື່ອງເຟີນີເຈີໄມ້ໃຫ້ ອາເມລິກາ ໃຫຍ່ທີສຸດ ບັນລຸ 7,9 ຕື້ໂດລາສະຫະລັດ, ເພີ່ມຂຶ້ນ 44,5% ເມື່ອທຽບໃສ່ໄລຍະດຽວກັນ ຂອງປີ 2020; ຮອງລົງມາແມ່ນຈີນ ທີ່ມີມູນຄ່າ 4,3 ຕື້ໂດລາສະຫະລັດ.
ສິ່ງໜ້າທີ່ສົນໃຈ, ໃນ 5 ຕະຫຼາດສົ່ງອອກໄມ້ ແລະ ຜະລິດຕະພັນໄມ້ໃຫຍ່ທີ່ສຸດໄປຍັງ ອາເມລິກາ (ຫວຽດນາມ, ຈີນ, ເມັກຊິໂກ, ມາເລເຊຍ, ການາດາ), ອາເມລິກາ ພຽງແຕ່ເພີ່ມອັດຕາສ່ວນການນຳເຂົ້າຈາກ ຫວຽດນາມ ແລະ ເມັກຊິໂກ ເທົ່ານັ້ນ.
ຍອດມູນຄ່າການສົ່ງອອກຕັ່ງຂອບໄມ້ຂອງຫວຽດນາມ ໃນ 11 ເດືອນຕົ້ນປີ 2021 ຄາດວ່າບັນລຸ 3,2 ຕື້ໂດລາສະຫະລັດ, ເພີ່ມຂຶ້ນ 36,1% ເມື່ອທຽບໃສ່ໄລຍະດຽວກັນຂອງປີ 2020. ຄາດວ່າທັງປີ 2021 ຈະບັນລຸ 3,5 ຕື້ໂດລາສະຫະລັດ, ເພີ່ມຂຶ້ນ 30. 6% ເມື່ອທຽບໃສ່ປີ 2020.
ຕັ່ງຂອບໄມ້ທີ່ສົ່ງອອກໄປຍັງຕະຫຼາດອາເມລິກາ ໃນ 10 ເດືອນຕົ້ນປີ 2021 ບັນລຸ 2,9 ຕື້ໂດລາສະຫະລັດ, ເພີ່ມຂຶ້ນ 43,2% ເມື່ອທຽບໃສ່ໄລຍະດຽວກັນຂອງປີ 2020. ອັດຕາສ່ວນການສົ່ງອອກໄປຍັງອາເມລິກາ ກວມ 81,7% ຂອງມູນຄ່າການສົ່ງອອກຕັ່ງຂອບໄມ້ທັງໝົດ.
ບູນມີ
