ໂດຍປະຕິບັດຄໍາສັ່ງເລກທີ 04/CT-TW ລົງວັນທີ 6 ກໍລະກົດ 2011 ຂອງຄະນະ ເລຂາທິການສູນກາງພັກ (ຊຸດທີ XI) ວ່າດ້ວຍການສືບຕໍ່ປ່ຽນແປງໃໝ່, ຍົກສູງປະສິດທິຜົນວຽກງານການພົວພັນຕ່າງປະເທດປະຊາຊົນໃນສະພາບການໃໝ່, ດ້ວຍຄໍາຂວັນ “ເປັນເຈົ້າການ, ມີໄຫວພິບ, ປະດິດຄິດສ້າງ, ມີປະສິດທິຜົນ”.
ການພົວພັນຕ່າງປະເທດປະຊາຊົນໄດ້ຕັ້ງໜ້າປະຕິບັດແຜນນະໂຍບາຍຫັນການພົວພັນຕ່າງປະເທດເປັນຫຼາຍຮູບຫຼາຍແບບ, ຫຼາຍຝ່າຍ, ເພີ່ມທະວີການພົວພັນມິດຕະພາບທີ່ເປັນມູນເຊື້ອ ແລະ ຄວາມເຂົ້າໃຈເຊິ່ງກັນແລະກັນ, ຊຸກຍູ້ການພົວພັນຮ່ວມມືກັບປະຊາຊົນບັນດາປະເທດ. ແນວໂຮມປະເທດຊາດ ຫວຽດນາມ, ສະຫະພັນບັນດາອົງການຈັດຕັ້ງມິດຕະພາບ ແລະ ອົງການຈັດຕັ້ງປະຊາຊົນຫວຽດນາມ ໄດ້ສ້າງຕັ້ງການພົວພັນຮ່ວມມືກັບອົງການແຫ່ງຊາດ, ພາກພື້ນ ແລະ ສາກົນ ນັບຫຼາຍພັນແຫ່ງ, ເອົາໃຈໃສ່ໃສ່ປັບປຸງ ແລະ ພັດທະນາການພົວພັນກັບປະຊາຊົນບັນດາປະເທດບ້ານໃກ້ເຮືອນຄຽງ, ບັນດາຄູ່ຮ່ວມມືສຳຄັນ, ເພື່ອນມິດທີ່ເປັນມູນເຊື້ອຕາມລວງເລິກ ແລະ ເປີດກວ້າງການພົວພັນຮ່ວມມືກັບບັນດາຄູ່ຮ່ວມມືໃຫມ່.
 |
| ພິທີປະດັບຫຼຽນໄຊໂຮ່ຈິມິນ ໃຫ້ສະຫະພັນບັນດາອົງການຈັດຕັ້ງມິດຕິພາບຫວຽດນາມ. |
ດ້ວຍກຳລັງຫຼັກແຫຼ່ງແມ່ນສະຫະພັນບັນດາອົງການຈັດຕັ້ງມິດຕະພາບຫວຽດນາມ, ການພົວພັນຕ່າງປະເທດປະຊາຊົນໄດ້ຕັ້ງໜ້າເສີມຂະຫຍາຍບົດບາດ ແລະ ທັດສະນະຂອງຕົນໃນບັນດາກົນໄກຂອງສະຫະປະຊາຊາດ ແລະ ອາຊຽນ ເຊັ່ນ ສະພາເສດຖະກິດ ແລະ ສັງຄົມຂອງສະຫະປະຊາຊາດ (ECOSOC) ແລະ ຄະນະກຳມະການລະຫວ່າງລັດຖະບານອາຊຽນ ວ່າດ້ວຍສິດທິມະນຸດ (AICHR)…
ຄຽງຂ້າງການລະດົມຜັນຂະຫຍາຍ ແລະ ປະຕິບັດບັນດາໂຄງການ ແລະ ການໜູນຊ່ວຍມະນຸດສະທຳ, ການກຸສົນ, ແກ້ໄຂຜົນຮ້າຍຢ້ອນຫຼັງຈາກສົງຄາມ, ໜູນຊ່ວຍຜູ້ປະສົບເຄາະຮ້າຍຈາກທາດພິດສີສົ້ມ... ສະຫະພັນບັນດາອົງການມິດຕະພາບ ຫວຽດນາມ ໄດ້ຮັບປະກັນບົດບາດເປັນຜູ້ປະສານງານກ່ຽວກັບການພົວພັນ ແລະ ຂົນ ຂວາຍການອຸປະຖໍາທີ່ບໍ່ຂຶ້ນກັບລັດຖະບານຕ່າງປະເທດ, ພ້ອມທັງເປັນອົງການປະຈໍາການຂອງຄະນະກໍາມະການວຽກງານກ່ຽວກັບບັນດາອົງການບໍ່ຂຶ້ກັບລັດຖະບານຕ່າງປະເທດ. ປະຈຸບັນ, ຫວຽດນາມ ມີອົງການບໍ່ຂຶ້ກັບລັດຖະບານຕ່າງປະເທດ 500 ກວ່າແຫ່ງທີ່ມີການເຄື່ອນໄຫວເປັນປະຈຳ. ຍອດມູນຄ່າການອຸປະຖໍາອົງການບໍ່ຂຶ້ກັບລັດຖະບານຕ່າງປະເທດ ໃນ 5 ປີຜ່ານມາບັນລຸ 1,5 ຕື້ USD, ທຽບເທົ່າເກືອບ 300 ລ້ານ USD/ປີ, ດ້ວຍບັນດາໂຄງການທີ່ມີປະສິດທິຜົນ, ໄດ້ຜັນຂະຫຍາຍຢູ່ 63 ແຂວງ, ນະຄອນໃນທົ່ວປະເທດ, ເຊິ່ງໄດ້ປະກອບສ່ວນຢ່າງມີປະສິດທິຜົນເຂົ້າໃນການລົບລ້າງຄວາມອຶດຫິວ, ຫຼຸດຜ່ອນຄວາມທຸກຍາກ, ແກ້ໄຂຜົນຮ້າຍຢ້ອນຫຼັງຈາກສົງຄາມ, ໄພພິບັດທຳມະຊາດ ແລະ ການແກ້ໄຂບັນຫາສັງຄົມ, ພັດທະນາແຫຼ່ງຊັບພະຍາກອນມະນຸດ ແລະ ການເຊື່ອມໂຍງເຂົ້າກັບສາກົນຂອງຫວຽດນາມ.
ການພົວພັນຕ່າງປະເທດປະຊາຊົນໄດ້ຕັ້ງໜ້າເຂົ້າໃນການປົກປັກຮັກສາຜົນປະໂຫຍດແຫ່ງຊາດ ຜ່ານບັນດາການເຄື່ອນໄຫວຂົນຂວາຍ, ຕໍ່ສູ້ປະຕິເສດຂໍ້ມູນຂ່າວປອມກ່ຽວກັບສິດທິມະນຸດຢູ່ຫວຽດນາມ, ປະກອບສ່ວນຢ່າງຕັ້ງໜ້າເຂົ້າໃນການປົກປັກຮັກສາສິດທິມະນຸດຂອງສະພາສິດທິມະນຸດ ສປຊ ຢ່າງສຳເລັດຜົນ, ຂົນຂວາຍເພື່ອນມິດສາກົນ ສະໜັບສະໜູນສັນຕິພາບ ແລະ ສະຖຽນລະພາບຢູ່ທະເລຕາເວັນອອກ, ແຜນນະໂຍບາຍການແກ້ໄຂຄວາມຄັດແຍ້ງກັນໂດຍສັນຕິວິທີ, ບົນພື້ນຖານກົດໝາຍສາກົນ, ໃນນັ້ນມີສົນທິສັນຍາສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ 1982.
ວຽກງານຄົ້ນຄ້ວາ, ເປັນເສນາທິການ, ຂໍ້ມູນຂ່າວສານການຕ່າງປະເທດ ແລະ ຊາວຫວຽດນາມ ອາໄສຢູ່ຕ່າງປະເທດ ໄດ້ຮັບຄວາມສົນໃຈ ແລະ ຊຸກຍູ້. ກອງປະຊຸມສຳມະນາຫຼາຍຄັ້ງໂດຍສະຫະພັນບັນດາອົງການຈັດຕັ້ງມິດຕະພາບຫວຽດນາມ, ກອງທຶນເພື່ອສັນຕິພາບ ແລະ ພັດທະນາຫວຽດນາມ... ຈັດຕັ້ງໄດ້ສະໜອງຂໍ້ມູນທີ່ເປັນປະໂຫຍດຫຼາຍຢ່າງໃຫ້ແກ່ການຄົ້ນຄວ້າທິດສະດີ, ແຜນຜັງນະໂຍບາຍ ແລະ ການພົວພັນຕ່າງປະເທດປະຊາຊົນ. ວາລະສານຍຸກສະໄໝດ້ວຍ 5 ພາສາຕ່າງປະເທດຂອງສະຫະພັນບັນດາອົງການຈັດຕັ້ງມິດຕະພາບ ແລະ ບັນດາສື່ສິງພິມ, ເວັບໄຊ, ຂ່າວສານຂອງບັນດາອົງການຈັດຕັ້ງປະຊາຊົນ ໄດ້ໃຫ້ຂໍ້ມູນຂ່າວສານອັບເດດ, ສ່ອງແສງຫວຽດນາມ ຢ່າງມີຊີວິດຊີວາ, ເລິກເຊິ່ງ ແລະ ຮອບດ້ານ.
ການພັດທະນາໃໝ່ສະພາບການໃນໂລກ ແລະ ພາຍໃນປະເທດ ພວມເປີດໂອກາດ ແລະ ຄວາມສະດວກໃໝ່, ແຕ່ກໍ່ສ້າງສິ່ງທ້າທາຍຫຼາຍຢ່າງໃຫ້ປະເທດເຮົາ. ດ້ວຍຄວາມຕັດສິນໃຈປະຕິບັດຄວາມມຸ່ງມາດປາດຖະໜາ, ວິໄສທັດ ແລະ ເປົ້າໝາຍທີ່ວ່າ ໃນກາງສະຕະວັດນີ້, ຫວຽດນາມ ຈະກາຍເປັນປະເທດມີລາຍຮັບສູງຕາມການກຳນົດທິດສັງຄົມນິຍົມ, ກອງປະຊຸມໃຫຍ່ຄັ້ງທີ XIII ຂອງພັກ ໄດ້ເນັ້ນໜັກເຖິງແຜນນະໂຍບາຍ “ປະຕິບັດແນວທາງການພົວພັນຕ່າງປະເທດທີ່ເປັນເອກະລາດ, ປະຊາທິປະໄຕ, ສັນຕິພາບ, ມິດຕະພາບ, ການຮ່ວມມື ແລະການພັດທະນາຢ່າງສະເໝີຕົ້ນສະເໝີປາຍ, ຫັນການພົວພັນຕ່າງປະເທດເປັນຫຼາຍຮູບຫຼາຍແບບ ແລະ ຫຼາຍຝ່າຍ”.
ເປັນຄັ້ງທຳອິດ, ເອກະສານກອງປະຊຸມໃຫຍ່ໄດ້ຊີ້ໃຫ້ເຫັນຢ່າງຈະແຈ້ງວ່າ: “ກໍ່ສ້າງພື້ນຖານການທູດຮອບດ້ານ ແລະ ທັນສະໄໝ ດ້ວຍ 3 ເສົາຄ້ຳຄື: ການທູດຂອງພັກ, ການທູດຂອງລັດ ແລະການທູດປະຊາຊົນ”.
ອີງຕາມການກຳນົດທິດດັ່ງກ່າວ, ການພົວພັນຕ່າງປະເທດປະຊາຊົນຈະສຸມໃສ່ມະນະພະຍາຍາມ ປະຕິບັດບັນດາໜ້າທີ່ດັ່ງລຸ່ມນີ້ໃຫ້ສຳເລັດຜົນ ຄື:
ທີໜຶ່ງ, ຕັ້ງໜ້າປັບປຸງ ແລະ ເປີດກວ້າງຕາໜ່າງການພົວພັນຄູ່ຮ່ວມມືຍຸດທະສາດສາກົນ, ຍົກສູງປະສິດທິຜົນຂອງກົນໄກຮ່ວມມື, ປະດິດຄິດສ້າງປ່ຽນແປງໃໝ່ເນື້ອໃນ, ຂອບເຂດ ແລະ ວິທີການເຄື່ອນໄຫວສັນຕິພາບ, ສາມັກຄີ ແລະ ມິດຕະພາບ, ຍົກສູງປະສິດທິຜົນການຮ່ວມມືກັບບັນດາອົງການຈັດຕັ້ງບໍ່ຂຶ້ນກັບລັດຖະບານຕ່າງປະເທດ, ເພີ່ມທະວີການດຶງດູດການເຂົ້າຮ່ວມຂອງປະຊາຊົນທຸກຊັ້ນວັນນະ, ພິເສດແມ່ນໄວໜຸ່ມ, ນັກວິທະຍາສາດ... ເພື່ອເພີ່ມທະວີນໍ້າໃຈມິດຕະພາບ ແລະ ຍາດແຍ່ງແຫຼ່ງກຳລັງສາກົນເພື່ອຮັບໃຊ້ບັນດາເປົ້າໝາຍພັດທະນາແບບຍືນຍົງຂອງປະເທດຊາດຢ່າງມີປະສິດທິຜົນ, ປະກອບສ່ວນເຂົ້າໃນການພົວພັນລະຫວ່າງ ຫວຽດນາມ ກັບປະຊາຊົນບັນດາປະເທດ, ພິເສດແມ່ນບ້ານໃກ້ເຮືອນຄຽງ, ບັນດາປະເທດຄູ່ຮ່ວມມືຍຸດທະສາດ, ຄູ່ຮ່ວມມືຮອບດ້ານ, ເພື່ອນມິດທີ່ເປັນ ມູນເຊື້ອ ເຂົ້າສູ່ລວງເລິກ, ມີປະສິດທິຜົນ, ແທດຈິງ.
ທີສອງ, ຍົກສູງຄຸນນະພາບ ແລະ ປະສິດທິຜົນການເຂົ້າຮ່ວມຂອງບັນດາອົງການຈັດຕັ້ງປະຊາຊົນຫວຽດນາມ ໃນບັນດາເວທີປາໄສປະຊາຊົນຫຼາຍຝ່າຍໃນພາກພື້ນ ແລະ ສາກົນ, ວຽກງານຂ່າວສານຕ່າງປະເທດ, ການຄົ້ນຄວ້າ ແລະ ເປັນເສນາທິການ; ເພີ່ມທະວີການໂຄສະນາ ແລະ ແນະນຳປະເທດ, ປະຊາຊົນ, ວັດທະນະທຳ, ທ່າແຮງບົ່ມຊ້ອນ ແລະ ນະໂຍບາຍພັດທະນາຂອງຫວຽດນາມ ໃຫ້ແກ່ເພື່ອນມິດສາກົນ ແລະ ພໍ່ແມ່ປະຊາຊົນຊາວຫວຽດນາມ ອາໄສ ຢູ່ຕ່າງປະເທດ...
ທີສາມ, ສືບຕໍ່ຍົກສູງສະຕິຄວາມຮູ້ກ່ຽວກັບບົດບາດ, ໜ້າທີ່ວຽກງານການພົວພັນຕ່າງປະເທດປະຊາຊົນໃນສະພາບການໃໝ່, ປັບປຸງ, ບູລະນະການກົງຈັກ ຂອງກຳລັງສະເພາະກິດການພົວພັນຕ່າງປະເທດຕາມທິດກະທັດຮັດ, ມີປະສິດທິຜົນ, ເອົາໃຈໃສ່ກໍ່ສ້າງ, ບຳລຸງສ້າງຖັນແຖວພະນັກງານການພົວພັນຕ່າງປະເທດ ປະຊາຊົນທີ່ເປັນມືອາຊີບ, ມີຄຸນນະພາບ ແລະ ມີຄວາມສາມາດຕອບສະໜອງຄວາມຕ້ອງການຂອງໜ້າທີ່.
ການພົວພັນຕ່າງປະເທດປະຊາຊົນຈະມານະພະຍາຍາມເສີມຂະຫຍາຍມູນເຊື້ອ ອັນສະຫງ່າລາສີ, ມະນາພະຍາຍາມສ້າງຂົວແຫ່ງມິດຕະພາບ, ສະໜິດຕິິດພັນ, ສ້າງພື້ນຖານສັງຄົມແບບຍືນຍົງໃຫ້ແກ່ການພັດທະນາສາຍພົວພັນມິດຕະພາບ, ການຮ່ວມມືລະຫວ່າງຫວຽດນາມ ກັບປະເທດຕ່າງໆ ແລະ ປະກອບສ່ວນເພີ່ມ ພູນຄູນສ້າງ “ສັນຕິພາບ ແລະ ມິດຕະພາບລະຫວ່າງປະຊາຊົນທົ່ວໂລກ” ຕາມຄວາມມຸ່ງມາດປາດຖະໜາຂອງລຸງໂຮ່.
ບູນມີ
