 |
ທ່ານ ນາງ ແສງເດືອນ ຫລ້າຈັນທະບູນ ລັດຖະມົນຕີ ກະຊວງສຶກສາທິການ ແລະ ກິລາ .
ໃນຕອນບ່າຍວັນທີ 12 ມິຖຸນາ 2019, ກອງປະຊຸມ ສະໄໝສາມັນ ເທື່ອທີ 7 ຂອງສະພາແຫ່ງຊາດຊຸດທີ VIII ໄດ້ເຂົ້າສູ່ ວາລະການພິຈາລະນາ ແລະ ຮັບຮອງເອົາ ຮ່າງກົດໝາຍວ່າດ້ວຍອາຊີ ວະສຶກສາ ສະບັບປັບປຸງ ເພື່ອໃຫ້ບັນດາ ສະມາຊິກສະພາແຫ່ງຊາດ ທຸກເຂດເລືອກຕັ້ງ ໄດ້ປະກອບຄຳຄິດເຫັນຢ່າງກົງໄປກົງມາ ມີເນື້ອໃນຮັດກຸມ ແລະ ສາມາດນຳໃຊ້ໃຫ້ມີປະສິດທິພາບກວ່າເກົ່າ.
ທ່ານ ນາງ ແສງເດືອນ ຫລ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາ ລະບຸວ່າ: ກົດໝາຍ ວ່າດ້ວຍອາຊີວະສຶກສາ ສະບັບເດີມ ໄດ້ຖືກຮັບຮອງ ແລະ ປະກາດໃຊ້ ໃນປີ 2014, ລວມມີເນື້ອໃນທັງໝົດ 13 ພາກ, 18 ໝວດ, 107 ມາດຕາ. ພາຍຫລັງ ຖືກນຳໃຊ້ ມາເປັນເວລາ 5 ປີ ກວ່າ ໄດ້ເປັນບ່ອນອີງ ສຳຄັນ ໃຫ້ແກ່ການ ຄຸ້ມຄອງ-ບໍລິຫານ, ຈັດຕັ້ງປະຕິບັດ ແລະ ເຄື່ອນໄຫວ ວຽກງານ ອາຊີວະ, ໂດຍໄດ້ຜັນຂະຫຍາຍ ເປັນນິຕິກໍາ ລຸ່ມກົດໝາຍ 6 ສະບັບ ເພື່ອປະຕິບັດ ວຽກງານອາ ຊີວະສຶກສາ ແລະ ການຝຶກອົບຮົມ ວິຊາຊີບ ໃນທົ່ວປະເທດ. ນັບແຕ່ປີ 2014 ເປັນຕົ້ນມາ ວຽກງານ ອາຊີວະສຶກສາ ທັງພາກລັດ ແລະ ເອກະຊົນ ໄດ້ຮັບການ ປັບປຸງ ຍົກລະດັບ ຈາກໂຮງຮຽນ ເຕັກນິກວິຊາຊີບ ເປັນວິທະຍາໄລ 7 ແຫ່ງ, ຍົກລະດັບສູນ ແລະ ວິທະຍາໄລ ຂຶ້ນເປັນສະຖາບັນ 3 ແຫ່ງ. ສິ່ງສຳ ຄັນສັງຄົມ ເຫັນໄດ້ ຄວາມສຳຄັນ ແລະ ໃຫ້ການຮ່ວມມື ປະກອບສ່ວນ ໃນການພັດທະນາ ວຽກງານ ອາຊີ ວະສຶກສາ ແລະ ອົບຮົມ ວິຊາຊີບ ຫລາຍຂຶ້ນ, ພ້ອມທັງ ສົ່ງລູກຫລານ ມາຮຽນຫລາຍຂຶ້ນ. ຜູ້ປະກອບການ ຍັງໄດ້ປະກອບສ່ວນ ທຶນຮອນ, ທຶນການສຶກສາ ແລະ ວັດຖຸອຸປະກອນ, ມີການແລກປ່ຽນ ບົດຮຽນ, ປະສົບການ, ອຳນວຍ ສະຖານທີ່ ໃນການຮ່ຳຮຽນ ແລະ ຝຶກງານ. ປັດຈຸບັນ ມີຜູ້ເຂົ້າຮຽນ ໃນສະຖານ ອາຊີວະສຶກສາ ທີ່ຂຶ້ນກັບກະຊວງສຶກສາທິການ ແລະ ກິລາ ເພີ່ມຂຶ້ນ ຈາກ 23.500 ຄົນ ໃນສົກຮຽນ 2013-2014 ເປັນ 37.000 ຄົນ ໃນສົກຮຽນ 2017-2018; ສາຂາວິຊາຮຽນ ມີຫລາຍກວ່າ 80 ສາຂາວິຊາຊີບ ແລະ ຜູ້ຮຽນຈົບສ່ວນຫລາຍ ມີວຽກເຮັດງານທຳ ກວ່າ 80%. ຢ່າງໃດກໍຕາມ ເຖິງວ່າມີຜົນສຳ ເລັດຫລາຍດ້ານ ແຕ່ເຫັນວ່າເນື້ອໃນ ຈຳນວນໜຶ່ງ ຂອງກົດໝາຍ ວ່າດ້ວຍອາຊີວະ ສຶກສາ ມີເນື້ອໃນຊ້ຳຊ້ອນ ກັບກົດໝາຍແຮງງານ, ບໍ່ຊັດເຈນ, ບໍ່ຮັດກຸມ ແລະ ຍັງບໍ່ຕອບສະໜອງໄດ້ ນະໂຍບາຍການສົ່ງ ເສີມການລົງທຶນ ຂອງພາກທຸລະກິດ ເຂົ້າໃນວຽກງານ ອາຊີວະສຶກສາ, ການສົ່ງເສີມ ການຄົ້ນຄ້ວາ ວິທະຍາສາດ, ເຕັກໂນໂລຊີ ແລະ ນະວັດຕະກຳ, ລວມທັງ ນະໂຍບາຍ ສົ່ງເສີມຜູ້ຮຽນ, ຜູ້ດ້ອຍໂອກາດ ແລະ ຜູ້ຮຽນທີ່ມີບັນຫາ. ນອກຈາກນີ້, ຍັງບໍ່ສະໜອງ ຄວາມຮຽກຮ້ອງ ຕ້ອງການ ຂອງການພັດທະນາ ເສດຖະກິດ ສັງຄົມ ໃນໄລຍະໃໝ່.
ດ້ວຍເຫດນີ້, ທ່ານລັດຖະມົນຕີ ກະຊວງສຶກສາທິການ ແລະ ກິລາ ໄດ້ຊີ້ໃຫ້ເຫັນເຖິງ ເຫດຜົນ ແລະ ຄວາມຈຳເປັນ ໃນປັບປຸງ ກົດໝາຍວ່າດ້ວຍ ອາຊີວະສຶກສາຄັ້ງນີ້ ແມ່ນເພື່ອແກ້ໄຂ ບັນຫາຂ້າງເທິງ, ທັງແນໃສ່ ໃຫ້ມີເນື້ອໃນ ລະອຽດຊັດເຈນ ແລະ ສອດຄ່ອງກວ່າເກົ່າ ແນໃສ່ດຶງດູດ ການລົງທຶນທັງພາຍ ແລະ ຕ່າງປະເທດ ເຂົ້າໃນການ ພັດທະນາ ວຽກງານ ນີ້ຫລາຍຂຶ້ນ. ຮ່າງກົດໝາຍ ວ່າດ້ວຍອາຊີວະ ສຶກສາ ສະບັບປັບປຸງ ປະກອບມີ 14 ພາກ, 17 ໝວດ ແລະ 98 ມາດຕາ.
（ແຫຼ່ງຂໍ້ມູນ： ຂປລ）
