 |
ພິທີລົງນາມສັນຍາ.(ພາບ:vientianemai.net)
ເຂົ້າຮ່ວມພິທີລົງນາມສັນຍາດັ່ງກ່າວມີ ທ່ານ ສະເຫຼີມ ຫານພານິດ ປະທານເຈົ້າໜ້າທີ່ບໍລິຫານບໍລິສັດບາງກອກ ອິນເຕີເນຊັນແນວ (ລາວ) ຈຳກັດ ແລະ ທ່ານ ພັດທະນະພົງ ຕັນສົມບູນ ປະທານສະພາບໍລິຫານທະນາຄານ ກະສິກອນໄທ ຈຳກັດ ໂດຍມີທ່ານ ອາລຸນແກ້ວ ກິດຕິຄຸນ ລັດຖະມົນຕີປະຈຳສຳນັກງານນາຍົກລັດຖະມົນຕີ ທ່ານ ບຸນໜັກ ໄຊະນະສົງຄາມ ຫົວໜ້າກົມປິ່ນປົວ ແລະ ຟື້ນຟູໜ້າທີ່ການ ແລະ ພາກສ່ວນກ່ຽວຂ້ອງເຂົ້າຮ່ວມ.
ການລົງທຶນໂຄງການກໍ່ສ້າງໂຮງໝໍກະເສມຣາດ ອິນເຕີເນຊັນແນວ ວຽງຈັນ ໃຊ້ງົບປະມານ 70 ລ້ານໂດລາສະຫະລັດ ຫຼື ປະມານ 610,44 ຕື້ກີບ ໂດຍໄລຍະທຳອິດ 50 ລ້ານໂດລາ ຫຼື ປະມານ 436,12 ຕື້ກີບ ການລົງທຶນຄັ້ງນີ້ແມ່ນສອດຄ່ອງກັບການຈະເລີນເຕີບໂຕຂອງຊຸມຊົນ ເສດຖະ ກິດ ແລະ ປະຊາກອນ ໂດຍບໍລິສັດຕັ້ງໃຈທີ່ຈະນຳສະເໜີບໍລິການທາງການແພດທີ່ທັນສະໄໝ ແລະ ຄຸນນະພາບມາດຕະຖານສາກົນ ໃຫ້ບໍລິການພາຍໃຕ້ຜະລິດຕະພັນຂອງໂຮງໝໍກະເສມຣາດ ອິນເຕີເນຊັ້ນແນວ ຮອງຮັບກຸ່ມຄົນເຈັບທົ່ວໄປ.
ເຄືອທະນາຄານກະສິກອນໄທ ມີຄວາມຕັ້ງໃຈທີ່ຈະພັດທະນາ ແລະ ສະໜັບສະໜຸນການເຕີບໃຫຍ່ທາງເສດຖະກິດຂອງປະເທດໃນພາກພື້ນອາຊຽນ ໂດຍສະເພາະປະເທດລາວ ເຊິ່ງທະນາຄານໄດ້ເລັງເຫັນໂອກາດ ແລະ ທ່າແຮງຂອງ ສປປ ລາວ ທີ່ເສດຖະກິດມີການຂະຫຍາຍຕົວຢ່າງໄວວາ ແລະ ຕໍ່ເນື່ອງໃນຫຼາຍພາກອຸດສາຫະກຳ ເຮັດໃຫ້ປະຊາກອນມີກຳລັງຊື້ສູງຂຶ້ນ ແລະ ຊອກຫາຜະລິດຕະພັນ ການບໍລິການທີ່ມີຄຸນນະພາບ ແລະ ມາດຕະຖານສູງຂຶ້ນ ໂດຍສະເພາະທຸລະກິດກ່ຽວກັບສຸຂະພາບ ແລະ ການບໍລິການທາງການແພດ ເຊິ່ງເປັນໜຶ່ງໃນທຸລະກິດສົ່ງເສີມຕາມນະໂຍບາຍຂອງພັກ ເຊິ່ງລັດຖະບານລາວເຫັນວ່າ ຄວາມຕ້ອງການເຂົ້າເຖິງບໍລິການທາງການແພດທີ່ມີມາດຕະຖານເພີ່ມສູງຂຶ້ນ ຕາມການເຕີບໃຫຍ່ຂອງປະຊາກອນໃນອະນາຄົດ ແລະ ໄດ້ເຮັດໃຫ້ທຸລະກິດກ່ຽວຂ້ອງກັບປັດໃຈພື້ນຖານ ໄດ້ຮັບຜົນປະໂຫຍດໄລຍະຍາວ.
（ແຫຼ່ງຂໍ້ມູນ： vientianemai.net）
