| ທ່ານນາຍົກລັດຖະມົນຕີ ຫວຽດນາມ ຟ້າມມິນຈິງ ເດີນທາງໄປຢ້ຽມຢາມ ຍີ່ປຸ່ນ ຢ່າງເປັນທາງການ | |
| ທ່ານລັດຖະມົນຕີ ໂຕເລີມ ມີການເຈລະຈາ ກັບ ລັດຖະມົນຕີກະຊວງພາຍໃນອັງກິດ |
ທີ່ການພົບປະ, ທ່ານລັດຖະມົນຕີ ຫງວຽນຮົ່ງຢ່ຽນ ໄດ້ຕີລາຄາສູງວ່າ ເລື່ອງວົງເງິນການຄ້າລະຫວ່າງ 2 ປະເທດ ໄດ້ເພີ່ມຂຶ້ນຄືນ, ດ້ວຍລະດັບເຕີບໂຕ 6,4% ໃນ 10 ເດືອນຕົ້ນປີ 2021 ເມື່ອທຽບໃສ່ລະດັບຫຼຸດລົງເກືອບ 1% ຂອງປີ 2020; ດຸ່ນການຄ້າລະຫວ່າງຫວຽດນາມ - ຍີ່ປຸ່ນ ຍັງຄົງຮັກສາໄດ້ຢ່າງສົມດຸນ, ດ້ວຍຫຼາຍຜະລິດຕະພັນທີ່ມີລັກສະນະເພີ່ມເຕີມຊຶ່ງກັນແລະກັນ. ເພື່ອສືບຕໍ່ຮັກສາຄວາມດຸ່ນການຄ້າ, ທ່ານລັດຖະມົນຕີ ຫງວຽນຮົ່ງຢ່ຽນ ສະເໜີ ທ່ານລັດຖະມົນຕີ Hagiuda ເອົາໃຈໃສ່ ແລະ ໜູນຊ່ວຍການເຊື່ອມຕໍ່ ເພື່ອໃຫ້ສິນຄ້າຫວຽດນາມ ເຂົ້າຮ່ວມໃນລະບົບການຈຳໜ່າຍຢູ່ ຍີ່ປຸ່ນ ຫຼາຍກວ່າອີກ, ກໍ່ຄື ໜູນຊ່ວຍວິສາຫະກິດຫວຽດນາມ ມີສ່ວນຮ່ວມຢ່າງເລິກເຊິ່ງໃນຕ່ອງໂສ້ການສະໜອງຂອງວິສາຫະກິດຍີ່ປຸ່ນ.
 |
| ພາບປະກອບ: TTXVN |
ທ່ານລັດຖະມົນຕີ Haguida ຢືນຢັນວ່າ ລັດຖະບານ ແລະ ກະຊວງເສດຖະກິດ, ອຸດສາຫະກຳ ແລະ ການຄ້າ ຍີ່ປຸ່ນ ພ້ອມກັບບັນດາວິສາຫະກິດ ຍີ່ປຸ່ນ ຍາມໃດກໍ່ຖື ຫວຽດນາມ ແມ່ນຄູ່ຮ່ວມມືແຖວໜ້າຢູ່ ອາຊີ ແລະ ໃນໂລກ. ທ່ານລັດຖະມົນຕີ Haguida ໃຫ້ຮູ້ວ່າ: ໃນໄລຍະຜ່ານມາ, ບັນດາວິສາຫະກິດຍີ່ປຸ່ນ, ໂດຍສະເພາະແມ່ນບັນດາຂະແໜງການຜະລິດລົດຍົນ, ໄດ້ປະສົບກັບຜົນສະທ້ອນຫຍໍ້ທໍ້ ຍ້ອນການແຜ່ລະບາດຂອງພະຍາດ ໂຄວິດ-19. ທ່ານລັດຖະມົນຕີ Haguida ປາດຖະໜາວ່າ ກະຊວງອຸດສາຫະກຳ ແລະ ການຄ້າຫວຽດນາມ ຈະສືບຕໍ່ສົມທົບ ແລະ ໜູນຊ່ວຍບັນດາວິສາຫະກິດ ຍີ່ປຸ່ນ ລົງທຶນເຂົ້າ ຫວຽດນາມ ຜ່ານຜ່າຄວາມຫຍຸ້ງຍາກ, ຮັບປະກັນການຮັກສາຕ່ອງໂສ້ການສະໜອງ ເພື່ອຮັບໃຊ້ໃຫ້ແກ່ການຜະລິດ ແລະ ດຳເນີນທຸລະກິດຢ່າງດີທີ່ສຸດໃນສະພາບການທີ່ຍັງສັບສົນຂອງໂລກລະບາດໂຄວິດ-19.
ກ່ຽວກັບການຫັນປ່ຽນດ້ານພະລັງງານ, ທ່ານລັດຖະມົນຕີ ຫງວຽນຮົ່ງຢ່ຽນ ໃຫ້ຮູ້ວ່າ: ຫວຽດນາມ ໃຫ້ຄຳໝັ້ນສັນຍາປະຕິບັດການຫັນປ່ຽນພະລັງງານແນໃສ່ເຮັດໃຫ້ກາກບອນຢູ່ລະດັບກາງ ຮອດປີ 2050. ນີ້ກໍ່ແມ່ນເນື້ອໃນສຳຄັນ ໃນການພົບປະລະຫວ່າງທ່ານນາຍົກລັດຖະມົນຕີ ຟ້າມມິງຈິງ ແລະ ນາຍົກລັດຖະມົນຕີຍີ່ປຸ່ນ Kishida Fumio ໃນວັນທີ 24 ພະຈິກນີ້. ນອກຈາກນັ້ນ, ຍີ່ປຸ່ນ ຍັງເປັນຜູ້ນໍາ ໃນຂະບວນການຫັນປ່ຽນພະລັງງານຢູ່ອາຊີ ດ້ວຍຂໍ້ລິເລີ່ມການຫັນປ່ຽນພະລັງງານຂອງອາຊີ, ໃຫ້ຄໍາໝັ້ນສັນຍາໜູນຊ່ວຍ 10 ຕື້ USD ໃຫ້ແກ່ບັນດາປະເທດອາຊຽນ ເພື່ອບັນລຸເປົ້າໝາຍທີ່ເຮັດໃຫ້ກາກບອນຢູ່ລະດັບກາງ. ສະນັ້ນ, ທ່ານລັດຖະມົນຕີ ຫງວຽນຮົ່ງຢ່ຽນ ໄດ້ສະເໜີໃຫ້ 2 ຝ່າຍປຶກສາຫາລືຢ່າງລະອຽດ ເພື່ອລົງນາມໃນບົດບັນທຶກຊ່ວຍຈຳ ເພື່ອຫັນການໜູນຊ່ວຍຂອງຍີ່ປຸ່ນໃຫ້ແກ່ການຫັນປ່ຽນພະລັງງານຂອງຫວຽດນາມໃຫ້ເປັນອັນລະອຽດ.
ກ່ຽວກັບການພັດທະນາອຸດສາຫະກຳ ແລະ ເສດຖະກິດດີຈີຕອນ, ທ່ານລັດຖະມົນຕີ ຫງວຽນຮົ່ງຢ່ຽນ ໃຫ້ຮູ້ວ່າ: ຫວຽດນາມ ພວມປະຕິບັດຍຸດທະສາດຫັນເປັນດີຈີຕອນ ແລະ ສຸມໃສ່ພັດທະນາບັນດາພື້ນຖານໂຄງລ່າງ ແລະ ອຸດສາຫະກຳໜູນຊ່ວຍ. ຫວຽດນາມ ຖືວ່າ: ຍີ່ປຸ່ນ ແມ່ນປະເທດພັດທະນາແຖວໜ້າ, ມີປະສົບການຫຼາຍດ້ານໃນບັນດາຂົງເຂດດັ່ງກ່າວ. ທ່ານລັດຖະມົນຕີ ສະເໜີໃຫ້ ຍີ່ປຸ່ນ ສະຫງວນບັນດາບ້ວງໜູນຊ່ວຍ ODA ໃໝ່ໃຫ້ແກ່ ຫວຽດນາມ ຕື່ມອີກ ເພື່ອພັດທະນາພື້ນຖານໂຄງລ່າງເສດຖະກິດດີຈີຕອນທັງດ້ານຮາດແວ ແລະ ຊອບແວ, ໜູນຊ່ວຍການພັດທະນາພື້ນຖານໂຄງລ່າງ ແລະ ອຸດສາຫະກຳໜູນຊ່ວຍຂອງຫວຽດນາມ.
ທ່ານລັດຖະມົນຕີ Haguida ໄດ້ເຫັນດີກັບຂໍ້ສະເໜີຂອງທ່ານລັດຖະມົນຕີ ຫງວຽນຮົ່ງຢ່ຽນ ແລະ ເນັ້ນໜັກວ່າ: ຍີ່ປຸ່ນ ຈະສືບຕໍ່ຊຸກຍູ້ບັນດາການເຄື່ອນໄຫວຮ່ວມມືກັບ ຫວຽດນາມ ໃນຂົງເຂດຫັນເປັນດີຈີຕອນ. ໃນຂົງເຂດອຸດສາຫະກຳ, ຍີ່ປຸ່ນ ຈະເພີ່ມທະວີການຮ່ວມມືເພື່ອຍົກສູງກຳລັງແກ່ງແຍ້ງອຸດສາຫະກຳໃຫ້ຫວຽດນາມ ຜ່ານການຖ່າຍທອດເຕັກໂນໂລຢີ, ໃນນັ້ນມີການກໍ່ສ້າງ ແລະ ຈັດຕັ້ງປະຕິບັດຂໍ້ລິເລີ່ມ “ຄູ່ຮ່ວມມືປ່ຽນແປງໃໝ່ເຕັກໂນໂລຢີ ຫວຽດນາມ - ຍີ່ປຸ່ນ”.
ກ່ຽວກັບການຮ່ວມມືໃນຂອບເຂດຫຼາຍຝ່າຍ, ສອງລັດຖະມົນຕີໃຫ້ຄຳໝັ້ນສັນຍາສືບຕໍ່ສົມທົບກັນຢ່າງແໜ້ນແຟ້ນ ໃນການປະຕິບັດສັນຍາຄູ່ຮ່ວມມືຮອບດ້ານ ແລະ ກ້າວໜ້າຂ້າມປາຊີຟິກ (CPTPP). ໃນສະພາບການລັດທິອາລັກຂາພົ້ນເດັ່ນຂຶ້ນ, ເພີ່ມທະວີຄວາມເຄັ່ງຕຶງດ້ານການຄ້າ, ການຄ້າທົ່ວໂລກຫຼຸດລົງ, ວົງເງິນການຄ້າ 2 ຝ່າຍລະຫວ່າງ ຫວຽດນາມ - ຍີ່ປຸ່ນ ແລະ ຕະຫຼາດສະມາຊິກ CPTPP ຈຳນວນໜຶ່ງ ຍັງມີການເຕີບໂຕຢ່າງຕັ້ງໜ້າ. ຫວຽດນາມ ຢືນຢັນຈະມານະພະຍາຍາມຮ່ວມກັບ ຍີ່ປຸ່ນ ເພື່ອຊຸກຍູ້ບັນດາສະມາຊິກທີ່ຍັງເຫຼືອ ໃຫ້ສຳເລັດການໃຫ້ສັດຕະຍາບັນ ແລະ ປະຕິບັດ CPTPP ໂດຍໄວ (ປະກອບມີ ບຣູໄນ, ຈີເລ ແລະ ມາເລເຊຍ) ເພື່ອໃຫ້ສັນຍານຳມາເຊິ່ງຜົນປະໂຫຍດຢ່າງຄົບຖ້ວນ ໃຫ້ບັນດາປະເທດສະມາຊິກ.
ສິ້ນສຸດການພົບປະ, ທ່ານລັດຖະມົນຕີ ຫງວຽນຮົ່ງຢ່ຽນ ແລະ ທ່ານລັດຖະມົນຕີ Haguida ໄດ້ເປັນເອກະສັນກັນຢືນຢັນວ່າ ການພົວພັນຮ່ວມມືໃນຂົງເຂດການຄ້າ, ອຸດສາຫະກຳ ແລະ ພະລັງງານລະຫວ່າງ ຫວຽດນາມ - ຍີ່ປຸ່ນ ໃນໄລຍະຈະມາເຖິງ ຈະນັບມື້ນັບແໜ້ນແຟ້ນ, ມີປະສິດທິຜົນ, ສືບຕໍ່ປະກອບສ່ວນສຳຄັນເຂົ້າໃນການພັດທະນາອັນດີງາມຂອງການພົວພັນຄູ່ຮ່ວມມືຍຸດທະສາດຢ່າງເລິກເຊິ່ງກວ້າງຂວາງລະຫວ່າງສອງປະເທດ.
ຄຳຮຸ່ງ
