ການພົວພັນລະຫວ່າງ ຫວຽດນາມ - ຍີ່ປຸ່ນ ແມ່ນຄວາມໄວ້ເນື້ອເຊື່ອໃຈ ແລະ ຈິງໃຈ

ຍສໝ - ໂດຍໄດ້ຮັບຄຳເຊື້ອເຊີນຂອງທ່ານນາຍົກລັດຖະມົນຕີ ຍີ່ປຸ່ນ Kishida Fumio, ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ໄດ້ໄປຢ້ຽມຢາມຍີ່ປຸ່ນ ຢ່າງເປັນທາງການນັບແຕ່ວັນທີ 22 – 25 ພະຈິກ. ເນື່ອງໃນໂອກາດນີ້, ນັກຂ່າວ VOV ຈະສຳພາດທ່ານ Asano Katsuhito, ອະດີດຮອງລັດຖະມົນຕີການຕ່າງປະເທດ, ອະດີດຮອງລັດຖະມົນກະຊວງປ້ອງກັນ ຍີ່ປຸ່ນ ກ່ຽວກັບການພົວພັນລະຫວ່າງ ຫວຽດນາມ ແລະ ຍີ່ປຸ່ນ.

	ທ່ານນາຍົກລັດຖະມົນຕີ ຟ໋າມມິງຈີງ ຕ້ອນຮັບ ປະທານອົງການຮ່ວມມືສາກົນຍີ່ປຸ່ນ
	ທ່ານນາຍົກລັດຖະມົນຕີ ຫວຽດນາມ ຟ້ານມິງຈິງ ພົບປະກັບຜູ້ຕາງໜ້າປັນຍາຊົນ ຫວຽດນາມ ຢູ່ ຍີ່ປຸ່ນ

ການພົວພັນລະຫວ່າງ ຫວຽດນາມ - ຍີ່ປຸ່ນ ແມ່ນຄວາມໄວ້ເນື້ອເຊື່ອໃຈ ແລະ ຈິງໃຈ

ທ່ານ Asano Katsuhito, ອະດີດຮອງລັດຖະມົນຕີການຕ່າງປະເທດ, ອະດີດຮອງລັດຖະມົນກະຊວງປ້ອງກັນ ຍີ່ປຸ່ນ (ພາບ: vov.vn)

ນັກຂ່າວ: ຮຽນທ່ານ, ທ່ານຕີລາຄາແນວໃດກ່ຽວກັບການຢ້ຽມຢາມຂອງທ່ານນາຍົກລັດຖະມົນຕີ ຫວຽດນາມ ໄປຍັງຍີ່ປຸ່ນຄັ້ງນີ້?

ທ່ານ Asano Katsuhito: ຕາມຂ້າພະເຈົ້າ, ນີ້ແມ່ນການຢ້ຽມຢາມ ໂດຍສືບຕໍ່ການໄປຢ້ຽມຢາມ ຍີ່ປຸ່ນ ຂອງການນຳຂັ້ນສູງສຸດຂອງຫວຽດນາມເມື່ອບໍ່ດົນມານີ້, ໂດຍໄດ້ດຳເນີນໃນສະພາບການທີ່ ຍີ່ປຸ່ນ ຫາກໍ່ສ້າງຕັ້ງລັດຖະບານຊຸດໃໝ່ສຳເລັດ. ໃນ 5 ປີຜ່ານມາ, ການນຳຂັ້ນສູງຂອງຫວຽດນາມເກືອບທັງໝົດ ໄດ້ໄປຢ້ຽມຢາມ ຍີ່ປຸ່ນ, ໃນນັ້ນມີ ທ່ານເລຂາທິການໃຫຍ່ຫວຽດນາມ ຫງວຽນຟູ໋ຈ້ອງ ໄດ້ດຳເນີນການຢ້ຽມຢາມໃນປີ 2015. ໃນໄລຍະຜ່ານມາ, ທ່ານນາຍົກລັດຖະມົນຕີ ຍີ່ປຸ່ນ Abe Shinzo ແລະ ທ່ານນາຍົກລັດຖະມົນຕີ Suga Yoshihide ລ້ວນແຕ່ເລືອກເອົາ ຫວຽດນາມ ແມ່ນສະຖານທີ່ນັດພົບທຳອິດ ພາຍຫຼັງເຂົ້າຮັບດຳລົງຕຳແໜ່ງ. ສິ່ງດັ່ງກ່າວສະແດງໃຫ້ເຫັນຄວາມໄວ້ເນື້ອເຊື່ອໃຈສູງຕໍ່ການພົວພັນດ້ານການເມືອງຂອງສອງປະເທດ.

ແລະໃນຄັ້ງນີ້, ທັງທ່ານນາຍົກລັດຖະມົນຕີ ຍີ່ປຸ່ນ Kishida Fumio ແລະ ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ກໍ່ພວມຢູ່ໃນໄລຍະຕົ້ນອາຍຸການ, ສະນັ້ນ ການຢ້ຽມຢາມ ຍີ່ປຸ່ນ ຢ່າງເປັນທາງການ ຂອງທ່ານນາຍົກລັດຖະມົນຕີ ຫວຽດນາມ ຈະປະກອບສ່ວນຊຸກຍູ້ການຜັນຂະຫຍາຍການປະຕິບັດ ແລະ ຫັນບັນດາບັນຫາທີ່ສອງຝ່າຍໄດ້ລົງນາມໃຫ້ປະກົດຜົນເປັນຈິງ. ໂດຍສະເພາະໃນໄລຍະຜ່ານມາ, ເພາະວ່າໂລກລະບາດໂຄວິດ-19 ໄດ້ສົ່ງຜົນສະທ້ອນເຖິງການທ່ອງທ່ຽວ, ການສົ່ງອອກແຮງງານ, ການປະຕິບັດບັນດາໂຄງການລົງທຶນແລະອື່ນໆ, ນີ້ແມ່ນໂອກາດທີ່ດີເພື່ອຊຸກຍູ້ການຜັນຂະຫຍາຍໃນໄລຍະຈະມາເຖິງ. ຂ້າພະເຈົ້າຮູ້ວ່າ: ກ່ອນໜ້ານີ້ ທ່ານນາຍົກລັດຖະມົນຕີ ຟ້າມມິງຈິງ ມີການຢ້ຽມຢາມຍີ່ປຸ່ນ ຫຼາຍຄັ້ງໃນຫຼາຍຕຳແໜ່ງ, ສະນັ້ນ ທ່ານໄດ້ກາຍເປັນເພື່ອນມິດທີ່ສະໜິດສະໜົມຂອງຍີ່ປຸ່ນ.

ນັກຂ່າວ: ທ່ານຄິດວ່າ ສອງຝ່າຍຕ້ອງຫັນການຮ່ວມມືຢູ່ຂະແໜງໃດເປັນລະອຽດ?

ທ່ານ Asano Katsuhito: ຫວຽດນາມ ແລະ ຍີ່ປຸ່ນ ຍັງຄົງຊຸກຍູ້ຂໍ້ລິເລີ່ມລວມ ຫວຽດນາມ - ຍີ່ປຸ່ນ ຢ່າງມີປະສິດທິຜົນ. ຄຽງຄູ່ກັນນັ້ນ, ສອງປະເທດລ້ວນແຕ່ເປັນສະມາຊິກຂອງສັນຍາເສດຖະກິດໃຫຍ່ຄື: ສັນຍາຄູ່ຮ່ວມມືຂ້າມປາຊີຟິກ (CPTPP), ສັນຍາຄູ່ຮ່ວມມືເສດຖະກິດຮອບດ້ານພາກພື້ນ (RCEP) ແລະ ອື່ນໆ, ສະນັ້ນ ມີຫຼາຍເງື່ອນໄຂເພື່ອເຮັດໃຫ້ການລົງທຶນ ແລະ ການເຄື່ອນໄຫວການຄ້ານຳມາເຊິ່ງຜົນປະໂຫຍດທີ່ແທດຈິງທີ່ສຸດ. ຍົກຕົວຢ່າງ, ຍີ່ປຸ່ນເປັນປະເທດທີ່ມີເຕັກໂນໂລຊີກ່ຽວກັບການຫາປາ ແລະປຸງແຕ່ງປາທູນ່າ.

ໃນຂະນະນັ້ນ, ຫວຽດນາມ ແມ່ນໜຶ່ງໃນຈຳນວນບໍ່ເທົ່າໃດປະເທດທີ່ມີປາທູໃຫຍ່ ແລະ ພວມສົ່ງອອກໄປຍັງຍີ່ປຸ່ນ. ການສົ່ງອອກແນ່ນອນວ່າມີຜົນດີ, ແຕ່ຖ້າສອງຝ່າຍສາມາດຮ່ວມມືກໍ່ສ້າງໂຮງງານປຸງແຕ່ງອາຫານທະເລຂະໜາດໃຫຍ່ຢູ່ບັນດາແຂວງແຄມທະເລຂອງຫວຽດນາມເຊັ່ນ ແຂວງຟູອຽນ, ໂຮງງານແຫ່ງນີ້ຈະຊົມໃຊ້ແຫຼ່ງປາທູນ່າ ແລະ ຜະລິດຕະພັນສິນທະເລຫຼາຍຊະນິດເປັນຕົ້ນຕໍ. ສິ່ງສໍາຄັນນັ້ນແມ່ນ ຈະໄດ້ຮັບການປຸງແຕ່ງຢູ່ກັບທີ່ ມູນຄ່າຂອງປາທູນາ 1 ກິໂລ ສາມາດເພີ່ມຂຶ້ນເຖິງ 10 ເທົ່າ. ຈາກນັ້ນ, ຫວຽດນາມແນ່ນອນວ່າຈະມີຕະຫຼາດບໍ່ພຽງແຕ່ຢູ່ຍີ່ປຸ່ນເທົ່ານັ້ນ, ຫາກຍັງຢູ່ອາຊີຕາເວັນອອກສ່ຽງໃຕ້ອີກດ້ວຍ...

ນອກນີ້, ຍີ່ປຸ່ນຍັງເປັນປະເທດທີ່ຂາດແຄນຊັບພະຍາກອນມະນຸດຫຼາຍໃນດ້ານພະຍາບານ. ພຽງແຕ່ໃນຂົງເຂດພະຍາບານ, ຍີ່ປຸ່ນຕ້ອງການປະມານ 35,000 ຄົນ. ປະຈຸບັນ, ຫວຽດນາມ ແມ່ນຕະຫຼາດແຮງງານຫຼາຍ ຖັດຈາກຈີນ, ສະນັ້ນ, ນີ້ກໍ່ແມ່ນກາລະໂອກາດຮ່ວມມືລະຫວ່າງສອງຝ່າຍ, ພິເສດແມ່ນເມື່ອຍີ່ປຸ່ນ ແລະ ຫຼາຍປະເທດໃນໂລກ ໃນນັ້ນມີ ຫວຽດນາມ ພວມດຳລົງຊີວິດຢູ່ຮ່ວມກັບໂລກລະບາດ ແລະ ພາຍຫຼັງໂລກລະບາດ, ຄວາມຕ້ອງການດ້ານຊັບພະຍາກອນມະນຸດຈະເພີ່ມຂຶ້ນລະດັບສູງ.

ຂ້າພະເຈົ້າຢາກເນັ້ນໜັກວ່າ ຄວາມໄວ້ເນື້ອເຊື່ອໃຈ ແລະ ຄວາມຈິງໃຈໃນການພົວພັນ 2 ຝ່າຍແມ່ນປັດໄຈສຳຄັນເພື່ອໃຫ້ສາຍພົວພັນນີ້ຮັກສາຢູ່ລະດັບດີທີ່ສຸດ, ການລົງທຶນ ແລະ ການພັດທະນາການຄ້າກໍ່ແມ່ນສິ່ງສຳຄັນ.

ນັກຂ່າວ: ດັ່ງນັ້ນ, ໃນບັນດາເວທີປາໄສສາກົນຈະເປັນແນວໃດ, ຮຽນທ່ານ?

ທ່ານ Asano Katsuhito: ດີຫຼາຍ! ເປັນຫຍັງຂ້າພະເຈົ້າຈິ່ງຢັ້ງຢືນແນວນັ້ນ? ຍ້ອນວ່າ: ຜ່ານບັນດາສິ່ງທີ່ຂ້າພະເຈົ້າຕິດຕາມ, ຍີ່ປຸ່ນ ແລະ ຫວຽດນາມ ລ້ວນແຕ່ເຫັນດີເປັນເອກະພາບໃນບັນດາບັນຫາສາກົນລວມ. ໝາຍຄວາມວ່າ, ຍີ່ປຸ່ນ ສະໜັບສະໜູນ ຫວຽດນາມ ແລະ ກົງກັນຂ້າມ ຫວຽດນາມ ຍາມໃດກໍ່ຖື ຍີ່ປຸ່ນ ເປັນສຳຄັນ. ໃນເວທີປາໄສທີ່ມີການເຂົ້າຮ່ວມຂອງ 2 ປະເທດ, ການນຳສອງປະເທດມີການພົບປະຢູ່ນອກຮອບເປັນປະຈຳ, ໂດຍໄດ້ປຶກສາຫາລືຢ່າງເປີດເຜີຍ, ຕັດສິນບັນດາບັນຫາທີ່ກ່ຽວຂ້ອງ. ຍົກຕົວຢ່າງຄື: ຢູ່ກອງປະຊຸມສຸດຍອດກ່ຽວກັບການປ່ຽນແປງຂອງດິນຟ້າອາກາດ ທີ່ຫາກໍ່ດຳເນີນຢູ່ ອັງກິດ, ທ່ານນາຍົກລັດຖະມົນຕີ Kishida Fumio ກໍ່ມີການພົບປະເປັນເວລາສັ້ນໆກັບທ່ານນາຍົກລັດຖະມົນຕີ ຫວຽດນາມ. ບັນດການພົບປະຄືດັ່ງກ່າວ ເຖິງວ່າ ເວລາບໍ່ຫຼາຍ, ແຕ່ກໍ່ມີປະສິດທິຜົນຫຼາຍຢ່າງ. ຂ້າພະເຈົ້າຄາດວ່າ ການຢ້ຽມຢາມຄັ້ງນີ້ຂອງທ່ານນາຍົກລັດຖະມົນຕີ ຟ້າມມິຈິງ ຈະໄດ້ຮັບການຊຸກຍູ້ຢ່າງແຮງ ກໍ່ຍ້ອນມີປັດໄຈທີ່ມາຈາກການພົບປະຄັ້ງນີ້.

ຍີ່ປຸ່ນພວມມານະພະຍາຍາມທີ່ສຸດ, ເອົາໃຈໃສ່ເຖິງການຮ່ວມມືກັບບັນດາປະເທດ ອາຊີຕາເວັນອອກສ່ຽງໃຕ້ ໃນນັ້ນມີ ຫວຽດນາມ, ກຳນົດ ຫວຽດນາມ ມີບົດບາດສຳຄັນໃນພາກພື້ນນີ້. ຍີ່ປຸ່ນເຄົາລົບການຕັດສິນຂອງ ຫວຽດນາມ, ສະໜັບສະໜູນ ຫວຽດນາມ ແກ້ໄຂບັນດາສິ່ງຕິດຂັດໂດຍອີງໃສ່ກົດໝາຍສາກົນ ເພື່ອສັນຕິພາບ, ສະຖຽນລະພາບຂອງພາກພື້ນ ແລະ ໃນໂລກ. ຂ້າພະເຈົ້າເຊື່ອໝັ້ນວ່າ, ຫວຽດນາມ ແລະ ຍີ່ປຸ່ນ ຈະມີການຮ່ວມມືຢ່າງດີງາມທັງຢູ່ໃນການພົວພັນລະຫວ່າງ ສອງປະເທດ ກໍ່ຄືການພົວພັນຢູ່ສາກົນ ເພື່ອຜົນປະໂຫຍດຂອງປະຊາຊົນສອງປະເທດ.

ນັກຂ່າວ: ຂໍຂອບໃຈທ່ານ.

ບຸນຄົງ