| ລັດຖະມົນຕີຕ່າງປະເທດ ເຂົ້າຮ່ວມກອງປະຊຸມລັດຖະມົນຕີຕ່າງປະເທດອາຊຽນ ແບບບໍ່ເປັນທາງການ | |
| ກະຊວງການຕ່າງປະເທດຫວຽດນາມ: ຫວຽດນາມ ພ້ອມແລ້ວທີ່ຈະປົກປ້ອງພົນລະເມືອງຫວຽດນາມ ຢູ່ມຽນມາ |
 |
| ທ່ານນາງເອກອັກຄະລັດຖະທູດ ຫວຽດນາມ ຫງວຽນເຟືອງງາ, ປະທານສະຫະພັນບັນດາອົງການມິດຕະພາບ ຫວຽດນາມ (VUFO) (ພາບ: baoquocte.vn) |
ເຂົ້າຮ່ວມກອງປະຊຸມມີທ່ານນາງເອກອັກຄະລັດຖະທູດ ຫວຽດນາມ ຫງວຽນເຟືອງງາ, ປະທານສະຫະພັນບັນດາອົງການມິດຕະພາບ ຫວຽດນາມ (VUFO); ທ່ານ ຈູກົງຟຸ່ງ ປະທານສະມາຄົມມິດຕະພາບຫວຽດນາມ-ມຽນມາ; ຜູ້ຕາງໜ້າຄະນະພົວພັນຕ່າງປະເທດສູນກາງ, ກະຊວງການຕ່າງປະເທດ, ກະຊວງພາຍໃນ, ສະຫະພັນບັນດາອົງການມິດຕະພາບນະຄອນໂຮ່ຈິມິນແລະ ບັນດາສະມາຊິກສະມາຄົມມິດຕະພາບ ຫວຽດນາມ - ມຽນມາ.
ບົດລາຍງານທີ່ກອງປະຊຸມສະແດງໃຫ້ເຫັນວ່າໃນໄລຍະຜ່ານມາ, ບົນພື້ນຖານແນວທາງການຕ່າງປະເທດຂອງພັກ ແລະ ລັດ, ພາຍໃຕ້ການຊີ້ນຳຂອງ VUFO, ສະມາຄົມມິດຕະພາບ ຫວຽດນາມ - ມຽນມາ ໄດ້ຈັດຕັ້ງຫຼາຍການເຄື່ອນໄຫວ, ປະກອບສ່ວນຢ່າງມີປະສິດທິຜົນເຂົ້າໃນການຊຸກຍູ້ການພົວພັນຄູ່ຮ່ວມມືຢ່າງຮອບດ້ານ, ເພີ່ມທະວີຄວາມເຂົ້າໃຈ ແລະ ມິດຕະພາບ ລະຫວ່າງ ປະຊາຊົນສອງປະເທດ.
ສະຫະພັນໄດ້ເສີມຂະຫຍາຍບົດບາດເປັນຂົວຕໍ່ໃນການຊຸກຍູ້ການຮ່ວມມືຫຼາຍດ້ານ, ພິເສດແມ່ນໃນຂົງເຂດເສດຖະກິດ, ການຄ້າ ແລະ ວັດທະນະທຳລະຫວ່າງສອງປະເທດ.
ສະມາຄົມໄດ້ຈັດຕັ້ງການໂອ້ລົມເຈລະຈາຢ່າງເປັນປະຈຳ ແລະ ແບ່ງປັນຂໍ້ມູນກ່ຽວກັບສະພາບການຮ່ວມມືຂອງ 2 ຝ່າຍ, ຜ່ານນັ້ນກໍ່ຊ່ວຍໃຫ້ວິສາຫະກິດມີຄວາມເຂົ້າໃຈເຖິງຄວາມສາມາດບົ່ມຊ້ອນ, ກາລະໂອກາດລົງທຶນ ແລະ ການຮ່ວມມືຢູ່ ມຽນມາ.
ໂດຍສົມທົບກັບສະຖານທູດ ຫວຽດນາມ ປະຈຳ Yangon, ສະມາຄົມມິດຕະພາບມຽນມາ - ຫວຽດນາມ ໄດ້ຈັດຕັ້ງພິທີສະເຫຼີມສະຫຼອງ 73 ປີແຫ່ງວັນຊາດ ຫວຽດນາມ ດ້ວຍຫົວຂໍ້ “ສີສັນຫວຽດນາມ” ຢູ່ນະຄອນ Yangon ແລະ ບັນດາລາຍການພົບປະແລກປ່ຽນວັດທະນະທຳ “ຫວຽດນາມ - ມຽນມາ: ແຜ່ນດິນທີ່ສວຍງາມ” ຢູ່ນະຄອນຫຼວງ Nay Pyi Taw.
ຕໍ່ກັບສະພາບການແຜ່ລະບາດທີ່ສັບສົນຂອງພະຍາດໂຄວິດ-19 ຢູ່ມຽນມາ, ເດືອນກັນຍາ 2020, ສະມາຄົມໄດ້ລະດົມບັນດາສະມາຊິກ, ວິສາຫະກິດ, ບຸກຄົນ ແລະ ພຸດທະສາສະນິກະຊົນເພື່ອບໍລິຈາກເງິນກວ່າ 540 ລ້ານດົ່ງ ແລະ ອຸປະກອນການແພດຈຳນວນໜຶ່ງ ປະກອບສ່ວນໜູນຊ່ວຍປະຊາຊົນ ມຽນມາ ຜ່ານຜ່າຄວາມຫຍຸ້ງຍາກໃນໄລຍະເກີດໂລກລະບາດໂຄວິດ - 19...
ທີ່ກອງປະຊຸມ, ບັນດາຜູ້ແທນໄດ້ປຶກສາຫາລື ແລະ ປະກອບຄຳເຫັນໃສ່ຮ່າງບົດລາຍງານສະຫຼຸບວຽກງານຂອງສະມາຄົມອາຍຸການທີ 1 (2014-2020) ແລະ ທິດທາງປະຕິບັດວຽກງານຂອງສະມາຄົມອາຍຸການທີ 2 (2021-2026).
ກອງປະຊຸມໃຫຍ່ໄດ້ປຶກສາຫາລື ແລະ ຮັບຮອງເອົາຂໍ້ກຳນົດກົດລະບຽບຂອງສະມາຄົມ; ເລືອກຕັ້ງກຳມະການຄະນະບໍລິຫານງານ 30 ທ່ານ; ກຳມະການ ປະຈຳຄະນະ 10 ທ່ານ ແລະ ກຳມະການຄະນະກວດກາ 3 ທ່ານ ດ້ວຍການປຶກສາຫາລື.
ພິເສດ, ກອງປະຊຸມໄດ້ເລືອກຕັ້ງທ່ານ ຈຸກົງຟຸ່ງ, ປະທານສະມາຄົມມິດຕະພາບຫວຽດນາມ - ມຽນມາອາຍຸການທີ I, ສືບຕໍ່ດຳລົງຕຳແໜ່ງປະທານສະມາຄົມອາຍຸການທີ 2.
ໃນໄລຍະ 2021-2026, ເປົ້າໝາຍຂອງສະມາຄົມແມ່ນເປັນເຈົ້າການ,ປະດິດຄິດສ້າງໃນບັນດາການເຄື່ອນໄຫວ, ປ່ຽນແປງໃໝ່ບັນດາເນື້ອໃນ ແລະ ວິທີການໃນສະພາບການໃໝ່ໃຫ້ຫຼາຍກວ່າອີກ ເພື່ອສືບຕໍ່ຍົກສູງປະສິດທິຜົນວຽກງານ, ປະກອບສ່ວນພັດທະນາການພົວພັນມິດຕະພາບທີ່ເປັນມູນເຊື້ອ ແລະ ການພົວພັນຮ່ວມມືລະຫວ່າງປະຊາຊົນສອງປະເທດ.
ກ່າວຄຳເຫັນທີ່ກອງປະຊຸມ, ທ່ານນາງ ຫງວຽນເຟືອງງາ ເອກອັກຄະລັດຖະທູດ ໄດ້ສະແດງຄວາມເຫັນດີເຫັນພ້ອມກັບທິດທາງ ແລະ ວຽກງານຂອງສະມາຄົມອາຍຸການ 2021-2026 ເຊິ່ງກອງປະຊຸມໄດ້ປຶກສາຫາລື ແລະ ຮັບຮອງເອົາ.
ໂດຍຮັບຮູ້ ແລະ ຕີລາຄາສູງບັນດາຄວາມມານະພະຍາຍາມອັນໃຫຍ່ຫຼວງຂອງຄະນະການນຳສະມາຄົມໃນໄລຍະທຳອິດ, ທ່ານເອກອັກຄະລັດຖະທູດ ຢືນຢັນວ່າ: ນັບແຕ່ວັນສ້າງຕັ້ງ, ສະມາຄົມມິດຕະພາບ ຫວຽດນາມ - ມຽນມາ ໄດ້ເປັນເຈົ້າການຄົ້ນຄວ້າ ແລະ ຕິດຕາມກວດກາສະພາບການພັດທະນາຂອງການພົວພັນລະຫວ່າງ 2 ປະເທດ, ຍົກອອກບັນດາທິດທາງການເຮັດວຽກສະເພາະ ແລະ ສົມທົບກັນຢ່າງແໜ້ນແຟ້ນກັບບັນດາຄູ່ຮ່ວມມື ເພື່ອດຳເນີນບັນດາການເຄື່ອນໄຫວທີ່ແທດຈິງຫຼາຍຢ່າງໃນຂົງເຂດການລົງທຶນ, ການຄ້າ, ວັດທະນະທຳ ແລະ ການສຶກສາ.
ທ່ານນາງຫງວຽນເຟືອງງາປະທານ VUFO ເນັ້ນໜັກວ່າ: ໃນໄລຍະຈະມາເຖິງ, ສະມາຄົມຕ້ອງເອົາໃຈໃສ່ ແລະ ສຸມໃສ່ 4 ເນື້ອໃນວຽກງານດັ່ງນີ້:
ກ່ອນອື່ນໝົດ, ສະມາຄົມຕ້ອງມານະພະຍາຍາມກວ່າອີກໃນການຮັກສາການພົວພັນກັບສະມາຄົມເພື່ອນມິດຢ່າງເປັນປະຈຳ, ຢ້ຽມຢາມ, ຊຸກຍູ້ ແລະ ແບ່ງປັນນ້ຳໃຈສາມັກຄີ, ມິດຕະພາບກັບການນຳ, ສະມາຊິກສະມາຄົມ ແລະ ປະຊາຊົນມຽນມາ.
ທີສອງ, ສະມາຄົມຕ້ອງເສີມຂະຫຍາຍບົດບາດເປັນຂົວຕໍ່, ສືບຕໍ່ຈັດຕັ້ງກອງບັນດາການໂອ້ລົມເຈລະຈາເພື່ອໃຫ້ບັນດາສະມາຊິກ ແລະ ບັນດາວິສາຫະກິດມີເງື່ອນໄຂເຂົ້າເຖິງຂໍ້ມູນຂ່າວສານກ່ຽວກັບສະພາບການຂອງມຽນມາ, ຍົກອອກບັນດາການກຳນົດທິດດຳເນີນງານໃຫ້ເໝາະສົມກັບສະພາບການປະຈຸບັນ, ຜ່ານຜ່າຄວາມຫຍຸ້ງຍາກ ແລະ ສິ່ງທ້າທາຍ, ຍາດແຍ່ງໂອກາດເພື່ອດຳເນີນການຮ່ວມມື ແລະ ການລົງທຶນຢູ່ມຽນມາ, ປະກອບສ່ວນຢ່າງຕັ້ງໜ້າເຂົ້າໃນການພັດທະນາເສດຖະກິດ - ສັງຄົມຂອງສອງປະເທດ.
ທີສາມ, ດ້ວຍກຳລັງແຮງ ຂອງບັນດາທ່ານເອກອັກຄະລັດຖະທູດ, ນັກຊ່ຽວຊານທີ່ມີຄວາມຮູ້ກ່ຽວກັບມຽນມາ ແລະ ພາກພື້ນ, ສະມາຊິກຫຼາຍຄົນໄດ້ມີການເຄື່ອນໄຫວຕົວຈິງຢູ່ມຽນມາ, ສະມາຄົມເພີ່ມທະວີການຄົ້ນຄວ້າກ່ຽວກັບມຽນມາ, ສະໜັບສະໜູນ VUFO ແລະ ບັນດາອົງການສະມາຊິກຕັ້ງໜ້າເຂົ້າຮ່ວມບັນດາເວທີປາໄສປະຊາຊົນໃນພາກພື້ນ, ປະກອບສ່ວນເພີ່ມທະວີຄວາມສາມັກຄີມິດຕະພາບກັບປະຊາຊົນບັນດາປະເທດໃນພາກພື້ນເວົ້າລວມແລະ ມຽນມາ ເວົ້າສະເພາະ ເພື່ອສ້າງປະຊາຄົມອາຊຽນໃຫ້ເຂັ້ມແຂງ ແລະ ວັດທະນາຖາວອນ, ມີປະຊາຊົນເປັນໃຈກາງ.
ທີສີ່, ສະມາຄົມສຸມໃສ່ກໍ່ສ້າງ ແລະ ພັດທະນາອົງການຈັດຕັ້ງ, ສືບຕໍ່ປະດິດສ້າງບັນດາວິທີການ ແລະ ການເຄື່ອນໄຫວເພື່ອດຶງດູດການເຂົ້າຮ່ວມຂອງຊາວໜຸ່ມ, ນັກທຸລະກິດ ແລະ ນັກສຶກສາຂອງ 2 ປະເທດ.
ທ່ານເອກອັກຄະລັດຖະທູດ ຫງວຽນເຟືອງງາ ເຊື່ອໝັ້ນວ່າ ຄະນະບໍລິຫານງານສະມາຄົມຊຸດໃໝ່, ພາຍໃຕ້ການຊີ້ນຳຂອງປະທານ ຈຸກົງຟຸ່ງ ຈະສືບຕໍ່ປະຕິບັດໜ້າທີ່ເປັນຢ່າງດີ, ນຳພາສະມາຄົມປະຕິບັດຫຼາຍກິດຈະກຳຢ່າງແທດຈິງ ແລະ ມີປະສິດທິຜົນ, ປະກອບສ່ວນນຳສາຍພົວພັນມິດຕະພາບ ແລະ ການຮ່ວມມືລະຫວ່າງສອງປະເທດເຂົ້າສູ່ລວງເລິກ.
ບຸນຄົງ
