 |
ທ່ານ ທອງລຸນ ສີສຸລິດ ກຳມະການກົມການເມືອງສູນກາງພັກ ນາຍົກລັດຖະມົນຕີແຫ່ງ ສປປ ລາວ
ໂດຍເຂົ້າຮ່ວມເປັນກຽດຂອງທ່ານ ທອງລຸນ ສີສຸລິດ ກຳມະການກົມການເມືອງສູນກາງພັກ ນາຍົກລັດຖະມົນຕີແຫ່ງ ສປປ ລາວ, ມີບັນດາຮອງລັດຖະມົນຕີ, ຮອງເຈົ້າແຂວງ, ຮອງເຈົ້າຄອງນະຄອນຫຼວງ, ຫົວໜ້າກົມ, ຮອງກົມ, ຫົວໜ້າພະແນກ, ແຂກຖືກເຊີນທີ່ກ່ຽວຂ້ອງຈາກສູນກາງ-ແຂວງເຂົ້າຮ່ວມ. ທ່ານ ບຸນກອງ ສີຫາວົງ ກ່າວວ່າ: ຈຸດປະສົງຂອງກອງປະຊຸມຄັ້ງນີ້ແມ່ນເພື່ອເປັນການສະຫຼຸບຕີລາຄາຜົນສຳເລັດ, ບັນຫາຄົງຄ້າງ, ທ້າທາຍໃນການຈັດຕັ້ງປະຕິບັດແຜນພັດ ທະນາສາທາລະນະສຸກ ປະຈຳ ປີ 2018 ແລະ ສະເໜີທິດທາງແຜນພັດທະນາສາທາລະນະສຸກ ສໍາລັບປີ 2019 ທີ່ມີຈຸດປະສົງເລັ່ງໃສ່ການບັນລຸ 10 ຕົວຊີ້ວັດທີ່ສະພາແຫ່ງຊາດໄດ້ຮັບຮອງໃຫ້ກະຊວງສາທາລະນະສຸກຈັດຕັ້ງປະຕິບັດ, ການປັບປຸງຄຸນນະພາບ, ການບໍລິການດ້ານສາທາລະນະສຸກ, ການສ້າງຄວາມເຂັ້ມແຂງດ້ານການເງິນສາທາລະນະສຸກ ແລະ ກອງທຶນປະກັນສຸຂະພາບແຫ່ງຊາດຕາມກອບຍຸດທະສາດປະຕິຮູບສາທາລະນະສຸກໄລຍະ 2 ( 2016-2020 ), ເພື່ອແລກປ່ຽນບົດຮຽນການຈັດຕັ້ງປະຕິບັດວຽກງານສັກຢາກັນພະຍາດ, ການຈັດຕັ້ງປະຕິບັດກອງທຶນປະກັນສຸຂະພາບແຫ່ງ ຊາດກ່ຽວກັບການປັບປຸງຄຸນນະພາບ, ການບໍລິການປິ່ນປົວຂອງໂຮງໝໍ ແລະ ສຸກສາລາ, ການຈັດຕັ້ງປະຕິບັດນະໂຍບາຍ 5 ດີ, 1 ພໍໃຈ ແລະ ການປະຕິບັດດຳລັດ 349/ລບ ວ່າ ດ້ວຍການນະໂຍບາຍຈູງໃຈແກ່ພະນັກງານແພດໝໍ, ເພື່ອປຶກສາຫາລື ແລະ ແລກປ່ຽນແນວຄວາມຄິດເບື້ອງຕົ້ນໃນການຫັນໂຮງໝໍໃຫ້ກຸ້ມຕົນເອງເທື່ອລະກ້າວ, ສະເໜີຮ່າງແຜນພັດທະນາສາທາລະນະສຸກປະຈຳປີ 2020 ແລະ ຮ່າງແຜນພັດທະນາສາທາລະນະສຸກ 5 ປີ ຄັ້ງທີ 10 ( 2021-2025).
 |
ບັນດາຜູ້ແທນເຂົ້າຮ່ວມກອງປະຊຸມ
ໃນໂອກາດດັ່ງກ່າວທ່ານ ທອງລຸນ ສີສຸລິດ ໄດ້ໃຫ້ກຽດໂອ້ລົມເພື່ອເປັນເຂັມຊີ້ທິດເຍືອງທາງຕໍ່ທີ່ປະຊຸມຊຶ່ງກ່ອນອື່ນທ່ານໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນງານທີ່ກະຊວງສາທາລະນະສຸກຍາດ ມາໄດ້ໃນໄລຍະທີ່ຜ່ານມາ ພ້ອມດຽວກັນນັ້ນທ່ານຍັງໄດ້ ເນັ້ນໜັກໃຫ້ກະຊວງສາທາ ລະນະສຸກເອົາໃຈໃສ່ບາງບັນຫາ ຊຶ່ງກ່ອນອື່ນໝົດຕ້ອງໄດ້ປັບປຸງພື້ນຖານໂຄງລ່າງ, ອຸປະກອນການແພດ ແລະ ການບໍລິການຂອງໂຮງໝໍສູນກາງ, ໂຮງໝໍແຂວງ ແລະ ສາທາລະນະສຸກຈຳນວນໜຶ່ງໃຫ້ມີຄຸນນະພາບ ແລະ ທັນສະໃໝຂຶ້ນກວ່າເກົ່າ, ເອົາໃຈໃສ່ປ້ອງກັນ ແລະ ຄວບຄຸມພະຍາດທີ່ຮ້າຍແຮງເຊັ່ນ, ໄຂ້ຍຸງລາຍ, ຖອກທ້ອງ ແລະ ອັກເສບລະບົບຫາຍໃຈຮຸນແຮງ ແລະ ພະຍາດຕິດຕໍ່ອື່ນໆ, ຂະຫຍາຍຕາໜ່າງການບໍລິການສາທາລະນະສຸກຮອດທ້ອງຖິ່ນຮາກຖານຊົນນະບົດ ແລະ ຫ່າງໄກສອກ ຫຼີກ, ປະຕິບັດນະໂຍບາຍ 5 ດີ, 1 ພໍໃຈ ( 5 ດີ. ສະດວກດີ, ຮັບຕ້ອນດີ, ສະອາດດີ, ບົ່ງມະຕິດີ, ປິ່ນປົວດີ ແລະ 1 ພໍໃຈ ຜູ້ມາຮັບບໍລິການພໍໃຈຢ່າງມີປະສິດທິຜົນ, ເຮັດໃຫ້ສາມາດແກ້ໄຂບັນຫາຫາງສຽງສັງຄົມໃຫ້ຫຼຸດລົງ, ເອົາໃຈໃສ່ຈັດຕັ້ງປະຕິບັດຍຸດທະສາດແມ່ ແລະ ເດັກແບບເຊື່ອມສານ ແລະ ປະຕິບັດນະໂຍບາຍເກີດລູກ, ປິ່ນປົວເດັກນ້ອຍລຸ່ມ 5 ປີບໍ່ເສຍຄ່າເຮັດໃຫ້ອັດຕາການຕາຍຂອງແມ່, ເດັກນ້ອຍລຸ່ມ 1 ປີ ຫຼຸດລົງ, ອັດຕາການນຳໃຊ້ນໍ້າສະອາດເພີ່ມຂຶ້ນ 83,9% ແລະ ວິດຖ່າຍເພີ່ມຂຶ້ນ 73% , ອັດຕາເດັກຂາດສານອາຫານຊໍາເຮື້ອຫຼຸດລົງຍັງເຫຼືອ 33% ສະຫຼຸບແລ້ວ 10 ຄາດໝາຍທີ່ສະພາແຫ່ງຊາດຮັບຮອງກໍໄດ້ຮັບການເອົາໃຈໃສ່ຈັດຕັ້ງປະຕິບັດເປັນຢ່າງດີ ແລະ ຫຼາຍຄາດໝາຍກໍໄດ້ບັນລຸ. ຜົນສຳເລັດກອງປະຊຸມເທື່ອນີ້ບັນດາສະຫາຍໄດ້ມາປຶກສາຫາລືກັນເພື່ອຊອກໃຫ້ເຫັນບັນຫາຄົງຄ້າງຜ່ານມາເພື່ອພ້ອມກັນແກ້ໄຂ 10 ຕົວຊີ້ວັດທີ່ຍັງເຫັນວ່າເຮັດບໍ່ທັນໄດ້ຕ້ອງໄດ້ເອົາໃຈໃສ່ຕື່ມ, ສຸຂະພາບເຂັ້ມແຂງແມ່ນຄວາມຕ້ອງການທີ່ທຸກຄົນປາຖະໜາຢາກໄດ້ຢາກມີເໜືອສິ່ງອື່ນໃດ, ສຳລັບການຂະຫຍາຍຕາໜ່າງຂອງຂະແໜງສາທາລະນະສຸກແມ່ນໃຫ້ເອົາມາດຕະການປ້ອງກັນໄປກ່ອນ ແລະ ເອົາການປິ່ນປົວຮັກສາໄປນໍາ ຖືເປັນການຍົກລະດັບຄວາມຮູ້-ຄວາມສາມາດໃຫ້ພະນັກງານແພດໝໍ ເພື່ອເປັນການສ້າງຄົນ, ສ້າງນາຍແພດ, ສ້າງພະຍາບານໃຫ້ດີຂຶ້ນນີ້ແມ່ນຄວາມຈໍາເປັນ, ຢາກປ້ອງກັນໄດ້ອີກອັນໜຶ່ງຕ້ອງອົບຮົມຄວາມຮູ້ໃຫ້ແກ່ປະຊາຊົນໃຫ້ເຂົ້າໃຈເລື່ອງສຸຂະພາບໃຫ້ເລິກເຊິ່ງກວ້າງຂວາງ ນອກຈາກນັ້ນພວກເຮົາຕ້ອງຍາດແຍ່ງເອົາຄວາມຮູ້-ບົດຮຽນ, ເອົາການຊ່ວຍເຫຼືອຈາກຕ່າງປະເທດໃຫ້ຫຼາຍ, ຢາກໃຫ້ມີການກວດກາຄືນ 5 ດີເຮົາສາມາດເຮັດໄດ້ຈັກຂໍ້ແລ້ວ, ເຮົາຈະປັບປຸງສຸກສາລາ, ໂຮງໝໍເມືອງ-ແຂວງເຮົາແນວໃດເພື່ອເຮັດໜ້າທີ່ບໍລິການປິ່ນປົວໃຫ້ມັນດີຂຶ້ນ, ສ້າງຈັນຍາບັນ, ຈັນຍາທຳໃຫ້ພະນັກງານແພດໝໍໃຫ້ດີຂຶ້ນ ແລະ ເປັນທີ່ຍອມຮັບຂອງປະຊາຊົນໃຫ້ເອົາໃຈໃສ່ແທ້ເລື່ອງການອົບຮົມຈັນຍາບັນ-ຈັນຍາທຳຂອງພະນັກງານແພດໝໍໃຫ້ດີຂຶ້ນເພື່ອຫຼຸດຜ່ອນການໄປປິ່ນປົວຢູ່ຕ່າງປະເທດ, ກວດກາຄືນການປິ່ນປົວໂດຍບໍ່ເສຍຄ່າບັນດາໂຮງໝໍລັດ, ພ້ອມນັ້ນສືບຕໍ່ສ້າງໃຫ້ຕົນເອງກຸ້ມຕົນເອງເພິ່ງຕົນເອງເທື່ອລະກ້າວເພື່ອບັນລຸເປົ້າໝາຍທີ່ວາງໄວ້.
（ແຫຼ່ງຂໍ້ມູນ： pasaxon.org.la）
