 |
| ທ່ານນາຍົກລັດຖະມົນຕີຫວຽດນາມ ຟ້າມມິງຈິງ ກ່າວຄຳເຫັນທີ່ກອງປະຊຸມ (ພາບ: TTXVN) |
ເມື່ອບໍ່ດົນມານີ້, ຢູ່ກອງປະຊຸມສຸດຍອດບັນດາການນຳໃນຂອບເຂດກອງປະຊຸມ ສປຊ ກ່ຽວກັບການປ່ຽນແປງຂອງດິນຟ້າອາກາດ ຄັ້ງທີ 26 (COP26), ທ່ານນາຍົກລັດຖະມົນຕີຫວຽດນາມ ຟ້າມມິງຈິງ ໄດ້ປະກາດບັນດາຄຳໝັ້ນສັນຍາຂອງຫວຽດນາມ ໃນວຽກງານຮັບມືກັບການປ່ຽນແປງຂອງດິນຟ້າອາກາດ.
ຕາມນັ້ນແລ້ວ, ຫວຽດນາມໃຫ້ຄຳໝັ້ນສັນຍາ ຈະຫຼຸດຜ່ອຍການປ່ອຍອາຍພິດເຮືອນແກ້ວລົງເປັນ 0 ໃນປີ 2050, ພ້ອມກັນນັ້ນ ກໍ່ເຫັນດີສະໜັບສະໜູນ ຖະແຫຼງການ ແລະ ຂໍ້ລິເລີ່ມສຳຄັນກ່ຽວກັບວຽກງານປົກປັກຮັກສາປ່າ, ຫັນເປັນນຳໃຊ້ພະລັງງານສາມາດຜະລິດຄືນໃໝ່ໄດ້, ໜູນຊ່ວຍການປັບຕົວໃຫ້ແທດເໝາະສຳລັບບັນດາປະຊາຄົມທ້ອງຖິ່ນ ແລະ ຫຼຸດຜ່ອນອາຍ ເມຕານ.
ຕາມການປະກາດຂອງ ສະຖານທູດ ອັງກິດ ປະຈຳ ຫວຽດນາມ ແລ້ວ, ທ່ານເອກອັກຄະລັດທະທູດອັງກິດປະຈຳຫວຽດນາມ Gareth Ward ໃຫ້ຮູ້ວ່າ: ລາຊະອານາຈັກອັງກິດມີຄວາມປະທັບໃຈທີ່ສຸດຕໍ່ ຄຳໝັ້ນສັນຍາຈະຫຼຸດຜ່ອນການປ່ອຍອາຍພິດເຮືອນແກ້ວລົງເປັນ 0ໃນປີ 2050 ຂອງຫວຽດນາມ. ເປົ້າໝາຍນີ້ສະແດງໃຫ້ເຫັນຄວາມຕັດສິນໃຈຂອງຫວຽດນາມ, ປະກອບສ່ວນໃຫ້ແກ່ຄວາມມານະພະຍາຍາມລວມ ເພື່ອສະກັດກັ້ນອຸນຫະພູມຂອງໜ່ວຍໂລກເພີ່ມຂື້ນບໍ່ເກີນ1,5 ອົງສາC ແລະ ສະກັດກັ້ນໜ່ວຍໂລກຮ້ອນຂື້ນ.
ກ່ອນໜ້ານັ້ນ, ກ່າວຄຳເຫັນທີ່ COP 26, ທ່ານນາຍົກລັດຖະມົນຕີ ຟ້າມມິງຈິງ ຢັ້ງຢືນວ່າ ຫວຽດນາມ ຈະສ້າງ ແລະ ຜັນຂະຫຍາຍບັນດາມາດຕະການຫຼຸດຜ່ອນການປ່ອຍອາຍພິດເຮືອນແກ້ວຢ່າງແຮງກ່ວາອີກ.
ຕາມທ່ານນາຍົກລັດຖະມົນຕີແລ້ວ, ບັນດາຜົນກະທົບຫຍໍ້ທໍ້ຈາກການປ່ຽນແປງຂອງດິນຟ້າອາກາດພວມກໍ່ຜົນສະທ້ອນຢ່າງຮ້າຍແຮງເຖິງຄວາມໝັ້ນຄົງດ້ານສະບຽງອາຫານ ແລະ ແຫຼ່ງນ້ຳ, ການພັດທະນາແບບຍືນຍົງ, ຊ້ຳບໍ່ໜຳແມ່ນນາບຂູ່ເຖິງຄວາມເປັນຕາຍຂອງຫຼາຍປະເທດ ແລະ ປະຊາຄົມ, ຮຽກຮ້ອງໃຫ້ປະຊາຄົມສາກົນ ຕ້ອງມີການກະທຳຢ່າງແຮງກ່ວາອີກ, ມີຄວາມີຮັບຜິດຊອບ ແລະ ບໍ່ຊັກຊ້າໃນຂອບເຂດທົ່ວໂລກ. ນີ້ແມ່ນບັນຫາທົ່ວໂລກ ດັ່ງນັ້ນຕ້ອງມີການສຳຜັດທົ່ວໂລກ, ນີ້ແມ່ນບັນຫາທີ່ສົ່ງຜົນສະທ້ອນເຖິງປະຊາຊົນໝົດທຸກຄົນ ດັ່ງນັ້ນ ຄວນມີວິທີການສຳຜັດກັບປະຊາຊົນໝົດທຸກຄົນ.
ມີຫຼາຍເພື່ອນມິດ, ຄູ່ຮ່ວມມືສາກົນ ຕີລາຄາສູງບົດກ່າວປາໄສຂອງທ່ານນາຍົກລັດຖະມົນຕີ, ພ້ອມທັງຢັ້ງຢືນພ້ອມແລ້ວທີ່ຈະຮ່ວມມືກັບ ຫວຽດນາມ ໃນການຜັນຂະຫຍາຍບັນດາມາດຕະການເພື່ອແນໃສ່ຊຸກຍູ້ການເຕີບໂຕສີຂຽວ, ເສດຖະກິດໝູນວຽນ ແລະ ໜູນຊ່ວຍບັນດາປະຊາຄົມ ເປັນຕົ້ນແມ່ນກຸ່ມຄົນທີ່ມີຄວາມສ່ຽງສູງ, ເພື່ອເພີ່ມຄວາມສາມາດໃນການຕ້ານທານ ແລະ ຮັບມືກັບບັນດາປະກົດການດິນຟ້າອາກາດທີ່ຜິດປົກກະຕິ ແລະ ຮ້າຍແຮງໂດຍການປ່ຽນແປງຂອງດິນຟ້າອາກາດ.
ບຸນຄົງ
