 |
| ກອງປະຊຸມ (ພາບ: dangcongsan.vn) |
ຜູ້ຕາງໜ້າສະຖານທູດ ບັນດາປະເທດ ອາເມລິກາ, ຝລັ່ງ, ອັງກິດ, ເຢຍລະມັນ, ສິງກະໂປ, ຜູ້ຕາງໜ້າອົງການຈັດຕັ້ງ IFC, ຜູ້ຕາງໜ້າສະຫະສະມາຄົມ ວິສາຫະກິດ Eurocham, ບັນດາວິສາຫະກິດ FDI ທີ່ພວມເຄື່ອນໄຫວໃນບໍລິເວນ ນະຄອນ ຮ່າໂນ້ຍ… ເຂົ້າຮ່ວມກອງປະຊຸມ.
ຢູ່ກອງປະຊຸມຄັ້ງນີ້ ນະຄອນຮ່າໂນ້ຍ ແຈ້ງໃຫ້ຊາບກ່ຽວກັບສະພາບການພັດທະນາເສດຖະກິດ ສັງຄົມ ແລະ ໝາກຜົນຂອງການແກ້ໄຂຄວາມຫຍຸ້ງຍາກໃຫ້ແກ່ວິສາຫະກິດໃນໄລຍະທີ່ຜ່ານມາ ພ້ອມທັງຈະສະໜອງຂໍ້ມູນກ່ຽວກັບວິທີການແກ້ໄຂຄວາມຫຍຸ້ງຍາກໃຫ້ແກ່ວິສາຫະກິດໃນໄລຍະຈະມາເຖິງ, ເປັນຕົ້ນແມ່ນໃນຂະນະທີ່ ຮ່າໂນ້ຍ ພວມກ້າວເຂົ້າສູ່ໄລຍະສະພາບປົກກະຕິໃໝ່” ພາຍຫຼັງຄວບຄຸມໂລກລະບາດໂຄວິດ - 19 ໄດ້.
ກອງປະຊຸມພ້ອມກັນແລກປ່ຽນ, ຖາມຕອບໂດຍກົງບັນດາຄວາມຫຍຸ້ງຍາກ, ສິ່ງຕິດຂັດທີ່ວິສາຫະກິດປະສົບໃນໄລຍະທຳການຜະລິດ, ດຳເນີນທຸລະກິດຄືບັນດາບັນຫາດ້ານພາສີ, ອາກອນ, ປະກັນສັງຄົມ, ວັກຊິນ, ການສະໜອງ ແລະ ຕໍ່ກຳນົດໃບອະນຸດຍາດການອອກແຮງງານຂອງນັກຊ່ຽວຊານ ແລະ ຜູ້ອອກແຮງງານຕ່າງປະເທດ, ຂໍ້ກຳນົດໃນການຈຳກັດການເຂົ້າອອກເມືອງ, ປະຕິບັດຂໍ້ກຳນົດໃນການປ້ອງກັນ, ຕ້ານໂລກລະບາດ ແລະ ບາງບັນຫາການແພດຂອງວິສາຫະກິດ, ບາງວິສາຫະກິດທີ່ມີລັກສະນະຈຳເພາະ (ຂົງເຂດການສຶກສາບຳລຸງສ້າງ) ທີ່ຍັງບໍ່ທັນສືບຕໍ່ເຄື່ອນໄຫວ.
ກ່າວຄຳເຫັນໄຂກອງປະຊຸມ, ທ່ານ ດິງຕຽນຢຸງ ເລຂາອົງຄະນະພັກນະຄອນຮ່າໂນ້ຍ ໃຫ້ຮູ້ວ່າ ດ້ວຍຄວາມຫວັງຢາກດຶງດູດແຫຼ່ງກຳລັງຫຼາຍຢ່າງເຂົ້າມາລົງທຶນຢູ່ນະຄອນຫຼວງ, ອຳນາດການປົກຄອງ ນະຄອນຮ່າໂນ້ຍ ໄດ້ ແລະ ພວມສຸມໃສ່ແກ້ໄຂ ຄວາມຫຍຸ້ງຍາກ, ສິ່ງຕິດຂັດໃຫ້ແກ່ນັກລົງທຶນ, ປະຕິຮູບລະບຽບການບໍລິຫານ, ປັບປຸງສະພາບແວດລ້ອມແຫ່ງການລົງທຶນດຳເນີນທຸລະກິດ ເພື່ອຍົກສູງກຳລັງຄວາມແກ້ງແຍ່ງຂອງນະຄອນ. ໄລ່ຮອດຈຸດເວລາປັດຈຸບັນ, ໃນບໍລິເວນນະຄອນ ດຶງດູດໄດ້ 6.625 ໂຄງການລົງທຶນຕ່າງປະທດ, ດ້ວຍຍອດທຶນຈົດທະບຽນປະມານ 48,7 ຕື້ USD. ໄລ່ສະເພາະໃນປີ 2018 ແລະ ປີ 2019, ນະຄອນຮ່າໂນ້ຍ ໄດ້ນຳໜ້າໃນທົ່ວປະເທດ ກ່ຽວກັບການດຶງດູດເງິນລົງທຶນຈາກຕ່າງປະເທດ, ດ້ວຍຍອດເງິນລົງທຶນ ປະມານ 7,5 ຕື້ USD ແລະ 8,67 ຕື້ USD, ປີ 2020, ນະຄອນຮ່າໂນ້ຍ ຢືນຢູ່ອັນດັບທີ 3 ໃນທົ່ວປະເທດ ດ້ວຍຍອດເງິນລົງທຶນ ແມ່ນ 3,83 ຕື້ USD.
ໃນ 9 ເດືອນຕົ້ນປີ 2021, ເຖິງວ່າ ຮ່າໂນ້ຍ ຖືກຜົນກະທົບຫຍໍ້ທໍ້ຫຼາຍຢ່າງຈາກໂລກລະບາດໂຄວິດ - 19, ແຕ່ບັນດານັກລົງທຶນຕ່າງປະເທດ ຍັງສືບຕໍ່ເຊື່ອໝັ້ນ, ມີຄວາມປະເອີບໃຈ ຕໍ່ສະພາບແວດລ້ອມແຫ່ງການລົງທຶນດຳເນີນທຸລະກິດຂອງ ນະຄອນ ທີ່ໄດ້ມາລົງທຶນເຂົ້າຮ່າໂນ້ຍ ດ້ວຍຍອດເງິນລົງທຶນແມ່ນ 1,28 ຕື້ USD, ຜ່ານນັ້ນ ກໍ່ໄດ້ປະກອບສ່ວນສຳຄັນເຂົ້າໝາກຜົນຂອງການພັດທະນາເສດຖະກິດສັງຄົມລວມຂອງນະຄອນ, ດ້ວຍປະມານ 10% ຍອດລາຍຮັບຂອງງົບປະມານ, 12,6% ເງິນລົງທຶນພັດທະນາ, 30% ຍອດວຽກເຮັດງານທຳ ແລະ 45% ຍອດວົງເງິນສົ່ງອອກນຳເຂົ້າຂອງທົ່ວນະຄອນ.
ທ່ານ ດິງຕຽນຢຸງ ເລຂາອົງຄະນະພັກນະຄອນໄດ້ຊີ້ແຈ້ງວ່າ ໂດຍເຂົ້າໃຈບັນດາຄວາມຫຍຸ້ງຍາກຍ້ອນໂລກລະບາດໂຄວິດ - 19, ຮ່າໂນ້ຍໄດ້ ແລະ ພວມມານະພະຍາຍາມຈົນສຸດຄວາມສາມາດຂອງຕົນ, ປະຕິບັດຫຼາຍມາດຕະການເພື່ອຄວບຄຸມໂລກລະບາດໂດຍໄວທີ່ສຸດ. ພ້ອມທັງສຸມໃສ່ໜູນຊ່ວຍບັນດາວິສາຫະກິດ, ບັນດານັກລົງທຶນຕ່າງປະເທດຜ່ານຜ່າຄວາມຫຍຸ້ງຍາກ ເພື່ອຮັກສາ ແລະ ຟື້ນຟູການຜະລິດດຳເນີນທຸລະກິດ.
ທາງນະຄອນໄດ້ຊີ້ນຳກົມພາສາອາກອນ ຮ່າໂນ້ຍ ປະຕິບັດການຕໍ່ກຳນົດເວລາເກັບພາສີມູນຄ່າເພີ່ມ, ພາສີລາຍຮັບວິສາຫະກິດ, ພາສີລາຍຮັບສ່ວນຕົວ ແລະ ພາສີທີ່ດິນໃນປີ 2021 ໃຫ້ແກ່ຜູ້ເສຍພາສີ 31.000 ຄົນໂດຍໄວ, ດ້ວຍຍອດຈຳນວນເງິນເກັບພາສີ ແລະ ເງິນເຊົ່າທີ່ດິນ ທີ່ໄດ້ຕໍ່ກຳນົດ ປະມານ 22.000 ຕື້ດົ່ງ ຕາມຂໍ້ກຳນົດຂອງມະຕິເລກທີ 52 ຂອງ ລັດຖະບານ. ປະຕິບັດການຫຼຸດຜ່ອນ 30% ຄ່າເຊົ່າທີ່ດິນ ທີ່ຕ້ອງຈ່າຍໃຫ້ແກ່ຜູ້ເກັບພາສີ 650 ຄົນ, ດ້ວຍຈຳນວນເງິນເຊົ່າທີ່ດິນໄດ້ຫຼຸດລົງປະມານ 250 ຕື້ດົ່ງ ຕາມຂໍ້ກຳນົດຢູ່ມະຕິເລກທີ 27 ຂອງ ນາຍົກລັດຖະມົນຕີ.
ປັດຈຸບັນ, ຮ່າໂນ້ຍ ແມ່ນທ້ອງຖິ່ນຢືນອັນດັບທີ 3 ໃນທົ່ວໂລກ ກ່ຽວກັບຍອດຈຳນວນເງິນລົງທຶນຈາກຈ່າງປະເທດ. ເງິນລົງທຶນຈາກຕ່າງປະເທດ ຢູ່ ຮ່າໂນ້ຍ ນັບແຕ່ຕົ້ນປີ ມາຮອດປັດຈຸບັນບັນລຸ 1,28 ຕຶ້ USD. ໃນນັ້ນ ການຈົດທະບຽນໃໝ່ 256 ໂຄງການດ້ວຍຍອດເງິນລົງທຶນ ແມ່ນ 144 ລ້ານ USD, ເພີ່ມຂຶ້ນ 93 ໂຄງການ ຕື່ມອີກ 686 ລ້ານ USD ແລະ 346 ນັກລົງທຶນຕ່າງປະເທດ ໄດ້ຈົດທະບຽນປະກອບທຶນຊື້ຫຸ້ນ ດ້ວຍຈຳນວນທຶນ 450 ລ້ານ USD.
ການດຶງດູດເງິນລົງທຶນພາຍໃນປະເທດ ໃນໄລຍະ 9 ເດືອນຕົ້ນປີ ບັນລຸ 9.650 ຕື້ດົ່ງ, ລວມມີ 12 ໂຄງການໃໝ່ ດ້ວຍຍອດເງິນລົງທຶນ 1.799 ຕື້ດົ່ງ ແລະ 59 ໂຄງການເພີ່ມທຶນ 7.852 ຕື້ດົ່ງ. ຈຳນວນວິສາຫະກິດ ສ້າງຕັ້ງໃໝ່ໃນ 9 ເດືອນບັນລຸ 17.328 ແຫ່ງ ດ້ວຍຈຳນວນທຶນຈົດທະບຽນແມ່ນ 232,3 ພັນຕື້ດົ່ງ, ມີວິສາຫະກິດ 8.310 ແຫ່ງທີ່ມີການເຄື່ອນໄຫວຄືນ, ເພີ່ມຂຶ້ນ 77% ເມື່ອທຽບໃສ່ກັບໄລຍະດຽວກັນຂອງປີກາຍ. ໄລ່ຮອດໝົດເດືອນກັນຍາ ປີ 2021, ໃນບໍລິເວນນະຄອນ ມີວິສາຫະກິດ ລວມທັງໝົດ 318.789 ແຫ່ງ.
ບຸນຄົງ
