| ຫວຽດນາມ ແລະ ສິງກະໂປ ເພີ່ມທະວີການຮ່ວມມືຕ້ານພະຍາດໂຄວິດ -19 | |
| ມຸ່ງໄປເຖິງການຮ່ວມມືກ່ຽວກັບພະລັງງານຜະລິດຄືນໃໝ່ ແລະ ພັດທະນາແບບຍືນຍົງ ລະຫວ່າງ ຫວຽດນາມ ແລະ ໂອຕາລິດ |
 |
| ທ່ານ ໂຕເລີມ, ລັດຖະມົນຕີກະຊວງຕຳຫຼວດຫວຽດນາມ. ພາບ: TTXVN |
ຕອນເຊົ້າວັນທີ 11 ຕຸລາ, ກ່າວຄຳເຫັນໃນກອງປະຊຸມທາງອອນໄລ ກັບ ທ່ານນາງ Josephine Teo, ລັດຖະມົນຕີກະຊວງການສື່ສານ ແລະ ຖະແຫຼງຂ່າວ ທັງເປັນລັດຖະມົນຕີຮັບຜິດຊອບຄວາມໝັ້ນຄົງທາງເຄືອຂ່າຍອີນເຕີເນັດ ຂອງສິງກະໂປ, ທ່ານ ໂຕເລີມ, ລັດຖະມົນຕີກະຊວງຕຳຫຼວດຫວຽດນາມ ສະເໜີໃຫ້ ສອງຝ່າຍຈົ່ງສືບຕໍ່ຊຸກຍູ້ຄວາມເປັນເອກະພາບກ່ຽວກັບການຮັບຮູ້ ແລະການກະທຳຂອງບັນດາປະເທດອາຊຽນ ສໍາລັບບັນຫາຄວາມໝັ້ນຄົງທາງເຄືອຂ່າຍອີນເຕີເນັດ, ກ້າວໄປສູ່ການສ້າງກອບນິຕິກຳລວມເພື່ອ ອຳນວຍຄວາມສະດວກໃຫ້ການປະສານງານ, ການຮ່ວມມືສາກົນໃນຂົງເຂດຄວາມໝັ້ນຄົງທາງເຄືອຂ່າຍອີນເຕີເນັດ; ປະສານງານຢ່າງແໜ້ນແຟ້ນໃນການສ້າງສູນຄວາມໝັ້ນຄົງທາງເຄືອຂ່າຍອີນເຕີເນັດ ຂອງສະມາຄົມບັນດາປະເທດອາຊີຕາເວັນອອກສ່ຽງໃຕ້ (ອາຊຽນ).
ທ່ານ ໂຕເລີມ, ລັດຖະມົນຕີກະຊວງຕຳຫຼວດຫວຽດນາມ ສະເໜີໃຫ້ສອງຝ່າຍສືບຕໍ່ຮັກສາ, ເປີດກວ້າງການເຄື່ອນໄຫວຮ່ວມມືສາກົນທາງເຄືອຂ່າຍອີນເຕີເນັດ ລະຫວ່າງ ສອງອົງການທີ່ມີໜ້າທີ່ຂອງສອງປະເທດ ເພື່ອແນໃສ່ຕອບສະໜອງຄວາມຕ້ອງການຕົວຈິງດ້ວຍຮູບການທີ່ມີໄຫວພິບ, ເໝາະສົມກັບສະພາບໂລກລະບາດໂຄວິດ-19.
ສ່ວນທ່ານນາງ Josephine Teo ໄດ້ເນັ້ນໜັກເຖິງການພົວພັນຮ່ວມມືອັນດີງາມໃນໄລຍະຜ່ານມາລະຫວ່າງບັນດາອົງການປະຕິບັດກົດໝາຍ ສິງກະໂປ ແລະ ກະຊວງຕຳຫຼວດ ຫວຽດນາມ, ພ້ອມກັນນັ້ນ ກໍ່ຢືນຢັນວ່າ ສິງກະໂປ ຈະສົ່ງເສີມ, ແລກປ່ຽນກັບບັນດາປະເທດໃຫຍ່, ມີທ່າແຮງດ້ານເຕັກໂນໂລຊີຄື: ອາເມລິກາ, ຍີ່ປຸ່ນ, ສ.ເກົາຫຼີ ເພື່ອໃຫ້ບັນດາປະເທດນັ້ນສະໜັບສະໜູນ, ອຸປະຖຳໃຫ້ບັນດາອົງການທີ່ມີໜ້າທີ່ກ່ຽວກັບຄວາມໝັ້ນຄົງທາງເຄືອຂ່າຍອີນເຕີເນັດໃນ ອາຊຽນ ໄດ້ສຳຜັດ ແລະ ນຳໃຊ້ເຂົ້າໃນວຽກງານຮັບປະກັນຄວາມໝັ້ນຄົງ, ຄວາມປອດໄພທາງເຄືອຂ່າຍອີນເຕີເນັດ ແນໃສ່ມຸ່ງໄປເຖິງ “ການສ້າງເຄືອຂ່າຍອີນເຕີເນັດທີ່ເຂັ້ມແຂງດ້ວຍຕົນເອງໃນ ອາຊຽນ”.
ໄຊພອນ
