 |
ສ້າງຄວາມເຂັ້ມແຂງ ໃນການປະຕິບັດແຜນພັດທະນາເສດຖະກິດ-ສັງຄົມ ຂັ້ນທ້ອງຖິ່ນ
ໃນວັນທີ 12 ມີນາ 2019, ພະແນກແຜນການ ແລະ ການລົງທຶນ ແຂວງອັດຕະປື ໂດຍການສະໜັບສະໜູນ ຈາກອົງການສະຫະປະຊາຊາດສຳລັບເດັກ ໄດ້ຈັດກອງປະຊຸມສ້າງຄວາມເຂັ້ມແຂງ ໃນການວາງແຜນ,ຕິດຕາມ,ກົນໄກການປະສານງານ ແລະ ການລາຍງານ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂັ້ນທ້ອງຖິ່ນ ພາຍໃຕ້ການເປັນປະທານ, ໂດຍ ທ່ານ ພອນສະໄໝ ມຽງລາວັນ ຮອງເຈົ້າແຂວງອັດຕະປື ແລະ ທ່ານ ອົກຕາວຽນ ບີໂວນ ຜູ້ຕາງໜ້າອົງການສະຫະປະຊາຊາດ ສຳລັບເດັກ ປະຈຳ ສປປ ລາວ, ມີບັນດາພະແນກການທີ່ກ່ຽວຂ້ອງ, ກະຊວງຂະແໜງການທີ່ກ່ຽວຂ້ອງ ແລະ ບັນດາຫ້ອງການແຜນການເມືອງ ເຂົ້າຮ່ວມ.
ຈຸດປະສົງກອງປະຊຸມຄັ້ງນີ້, ແມ່ນເພື່ອສະເໜີແນວຄວາມຄິດ ກ່ຽວກັບການສ້າງຄວາມເຂັ້ມແຂງໃນການວາງແຜນຕິດຕາມ, ການລາຍງານ ແລະ ປະສານງານຂັ້ນທ້ອງຖິ່ນ ນໍາບັນດາອົງການຈັດຕັ້ງຂັ້ນແຂວງ ແລະ ບັນດາຂະແໜງການອ້ອມຂ້າງແຂວງທີ່ກ່ຽວຂ້ອງ, ລາຍງານກ່ຽວກັບສະພາບການຂອງເດັກ ໃນແຕ່ລະແຂວງອີງ ໃສ່ຂໍ້ມູນການສໍາຫລວດດັດຊະນີໝາຍສັງຄົມລາວ ຄັ້ງທີ 2 ແລະ ການວິໄຈຄວາມຂາດເຂີນຫລາຍມິຕິຂອງເດັກ ແລະ ເພື່ອປຶກສາຫາລື ແລະ ຕົກລົງ ກ່ຽວກັບວິທີການດໍາເນີນງານ, ເຊິ່ງກວມເອົາແຜນວຽກ, ຕົວຊີ້ບອກການປະຕິບັດແຜນງານ/ໂຄງການ ແລະ ຕິດຕາມປະເມີນຜົນ, ການລາຍງານ/ທົບທວນຄືນ ແລະ ການຕິດຕາມ ແລະ ເຊື່ອມສານງົບປະມານເຂົ້າໃນ ແຜນພັດທະນາເສດຖະກິດ-ສັງຄົມ ຂອງແຂວງ.
ໃນກອງປະຊຸມ ທ່ານ ສຸລິຈັນ ພອນແກ້ວ ຫົວໜ້າພະແນກແຜນການ ແລະ ການລົງທຶນ ແຂວງອັດຕະປື ໄດ້ລາຍງານຂັ້ນຕອນໃນການຂຶ້ນແຜນ, ການກຳນົດຕົວຊີ້ບອກ, ການຕິດຕາມ, ການລາຍງານຄວາມຄືບໜ້າ ແລະ ສິ່ງທ້າທາຍ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງແຂວງ ໂດຍສະເພາະວຽກງານ ທີ່ຕິດພັນກັບເດັກ ແລະ ການຂຶ້ນທຶນສົມທົບ ເຂົ້າໃນບັນດາແຜນງານ/ໂຄງການຊ່ວຍເຫລືອທາງການ ເພື່ອການພັດທະນາ (ຊກພ) ແລະ ອື່ນໆ.
（ແຫຼ່ງຂໍ້ມູນ： ຂປລ）
