 |
ລາວ-ອາເມຣິກາ ຮ່ວມກັນສ້າງຄວາມເຂັ້ມແຂງການສະໜອງທຶນດ້ານການບິນ
ໃນວັນທີ 20 ກຸມພາ 2019 ທີ່ນະຄອນຫຼວງວຽງຈັນ ເຈົ້າໜ້າທີ່ຈາກລັດຖະບານ ສປປ ລາວ ລວມທັງສະຫະລັດອາເມຣິກາ ສສ ຫວຽດນາມ ແລະ ຜູ້ເຂົ້າຮ່ວມຈາກພາກສ່ວນຕ່າງໆປະມານ 40 ທ່ານ ໄດ້ເຂົ້າຮ່ວມງານສຳມະນາກ່ຽວກັບສົນທິສັນຍາເຄັບທາວ Cape Town Convention ເພື່ອປຶກສາຫາລືແນວທາງການປະຕິບັດທີ່ດີທີ່ສຸດເພື່ອສ້າງຄວາມເຂັ້ມແຂງໃຫ້ແກ່ບັນຍາກາດທາງດ້ານທຸລະກິດທີ່ກ່ຽວຂ້ອງກັບຜູ້ຖືກຳມະສິດເປັນເຈົ້າຂອງເຮືອບິນ ແລະ ການສະໜອງທຶນຢູ່ໃນ ສປປ ລາວ. ທ່ານນາງ ຣີນາ ບິດເຕີ ເອກອັກຄະລັດຖະທູດ ສະຫະລັດອາເມຣິກາ ປະຈຳ ສປປ ລາວ ແລະ ທ່ານ ສັນຕິສຸກ ສິມມະລາວົງ ຮອງລັດຖະມົນຕີ ກະຊວງໂຍທາທິການ ແລະ ຂົນສົ່ງ ໄດ້ໃຫ້ກຽດເປີດງານສຳມະນາຄັ້ງນີ້ເພື່ອສົ່ງເສີມໃຫ້ຜູ້ເຂົ້າຮ່ວມຈາກພາກລັດຖະບານ ຜູ້ຊ່ຽວຊານດ້ານກົດໝາຍ ແລະ ຜູ້ນຳດ້ານທຸລະກິດ ເພື່ອຍາດເອົາໂອກາດໃນການສ້າງຄວາມເຂັ້ມແຂງໃຫ້ແກ່ບັນຍາກາດທາງດ້ານທຸລະກິດ ແລະ ເພື່ອຂະຫຍາຍຄວາມເຕີບໂຕຂອງອຸດສາຫະກຳການບິນ ໃນ ສປປ ລາວ.
ທ່ານເອກອັກຄະລັດຖະທູດ ສະຫະລັດອາເມຣິກາ ກ່າວວ່າ: ສົນທິສັນຍາເຄັບທາວແມ່ນໃຫ້ຜົນປະໂຫຍດແກ່ທຸກໆຝ່າຍ ຜູ້ດຳເນີນການສາມາດຊື້ ຫຼື ເຊົ່າເຮືອບິນໃນລາຄາທີ່ຖືກລົງຫຼາຍ ນອກນີ້ ຜູ້ຜະລິດເຮືອບິນ ແລະ ຜູ້ໃຫ້ເຊົ່າ ຍັງສາມາດເຂົ້າເຖິງໂອກາດຂອງຕະຫຼາດໃໝ່ ໂດຍມີຄວາມສ່ຽງໜ້ອຍລົງ ທ່ານກ່າວຕື່ມອີກວ່າ: ການລົງນາມໃຫ້ສັດຕະຍາບັນໃນສົນທິສັນຍາເຄັບທາວແມ່ນຄວາມພະຍາຍາມ ແລະ ຫົນທາງທີ່ຖືກຕ້ອງ ສຳລັບບັນດາປະເທດໃນການເສີມຂະຫຍາຍຂະແໜງການບິນ ແລະ ຍັງເປັນການປະຢັດຄ່າໃຊ້ຈ່າຍນຳອີກ ພ້ອມນີ້ ຍັງເປັນການສົ່ງເສີມການທ່ອງທ່ຽວ ແລະ ສົ່ງເສີມການເຊື່ອມໂຍງໃນພາກພື້ນໃຫ້ຫຼາຍຂຶ້ນຍ້ອນເຫດຜົນດັ່ງກ່າວຈຶ່ງມີຫຼາຍກວ່າ 70 ປະເທດທີ່ເປັນພາຄີໃນສົນທິສັນຍາສະບັບນີ້ເຊິ່ງລວມເອົາເຖິງບັນດາປະເທດໃນອາຊຽນ ເຊັ່ນ: ມຽນມາ ສສ ຫວຽດນາມ ມາເລເຊຍ ສິງກະໂປ ແລະ ອິນໂດເນເຊຍ.
ນອກຈາກເຈົ້າໜ້າທີ່ຈາກພາກລັດແລ້ວຍັງມີບັນດາຜູ້ນຳທາງດ້ານທຸລະກິດຈາກຫຼາຍປະເທດໄດ້ເຂົ້າຮ່ວມ ເຊິ່ງລວມມີ 10 ພາກສ່ວນເອກະຊົນທີ່ເປັນສະມາຊິກຈາກ ສປປ ລາວ ເຊັ່ນ: ບັນດາທະນາຄານ ບໍລິສັດກົດໝາຍ ສະພາການຄ້າ ແລະ ອຸດສາຫະກຳແຫ່ງຊາດລາວ ນອກນັ້ນ ຍັງມີບັນດາຜູ້ບັນຍາຍທີ່ມາຈາກໜ່ວຍງານບໍລິຫານການບິນພົນລະເຮືອນຂອງສະຫະລັດອາເມຣິກາ U.S. Federal Aviation Administration (FAA) ການບິນພົນລະເຮືອນຈາກ ສສ ຫວຽດນາມ ຜູ້ຊ່ຽວຊານດ້ານກົດໝາຍ ບໍລິສັດກົດໝາຍສິງກະໂປ ແລະ ຜູ້ຊຳນານການສະເພາະດ້ານຈາກບໍລິສັດໂບອີ້ງ ແລະ ບໍລິສັດ GE ທ່ານ Jeffrey Wool ເລຂາທິການໃຫຍ່ຄະນະກຸ່ມເຮັດວຽກດ້ານການບິນພົນລະເຮືອນຍັງໄດ້ໂທເຂົ້າມາຮ່ວມສົນທະນາໃນງານໃນຄັ້ງນີ້ອີກດ້ວຍ.
（ແຫຼ່ງຂໍ້ມູນ： vientianemai.net）
