 |
ໄພນໍ້າຖ້ວມຢູ່ແຂວງອັດຕະປຶ
ອີງຕາມຄຳແນະນຳ ກ່ຽວກັບການຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມ ປະຈຳປີ 2019 ສະບັບເລກທີ 0022/ກຜທ ຂອງກະຊວງແຜນການ ແລະ ການລົງທຶນ ໄດ້ໃຫ້ຮູ້ວ່າ: ໃນການຈັດຕັ້ງປະຕິບັດ ແຜນການລົງທຶນປະຈຳ ປີ 2019 ລັດຖະບານ ແຫ່ງ ສປປ ລາວ ໄດ້ອະນຸມັດງົບປະມານ 500 ຕື້ກີບ ໃນການຟື້ນຟູໄພພິບັດຫລັງນ້ຳຖ້ວມ ໂດຍໄດ້ແບ່ງຈາກງົບປະມານການລົງ ທຶນພາຍໃນປະເທດ, ເຊິ່ງມີບ້ວງລົງທຶນສະເພາະ ຈຳນວນ 850 ຕື້ກີບ.
ການນຳໃຊ້ທຶນຟື້ນຟູໄພພິບັດ ໃຫ້ປະຕິບັດດັ່ງ ນີ້: ໂຄງການຟື້ນຟູໄພພິບັດ ແມ່ນໂຄງການສ້ອມແປງຟື້ນຟູບັນດາພື້ນຖານໂຄງລ່າງ ເພື່ອຮັບໃຊ້ການຜະລິດ, ການບໍລິການພາກລັດ ແລະ ສິ່ງອຳ ນວຍຄວາມສະດວກຕ່າງໆ ທີ່ໄດ້ຮັບຜົນເສຍຫາຍຈາກໄພພິບັດໃນປີ 2018 ໃຫ້ຄືນສູ່ສະພາບປົກ ກະຕິ, ເພື່ອຮັບປະກັນໃນການສ້າງແຜນ ໂຄງການຟື້ນຟູຫລັງໄພພິບັດໃຫ້ທັນກຳນົດເວລາ ແລະ ນຳສະເໜີ ສະພາແຫ່ງຊາດຮັບຮອງ ໃນເງື່ອນໄຂງົບປະມານຈຳກັດ ໃຫ້ແຕ່ລະພາກສ່ວນ ຄົ້ນຄວ້າສັງລວມ ແລະ ຈັດລຽງບູລິມະສິດ ໂຄງການທີ່ຈຳເປັນແທ້ໆ ແລະ ໃຫ້ປະຕິບັດເງື່ອນໄຂ ຂອງໂຄງການທີ່ສະເໜີ ໃໝ່ ທີ່ກຳນົດໄວ້ໃນກົດໝາຍ ວ່າດ້ວຍການລົງທຶນຂອງລັດ ສະບັບເລກທີ 72/ສພຊ ໂດຍສະເພາະມາດຕາ 22 ເອກະສານການລົງທຶນຂອງລັດ ແລະ ມາດຕາ 34 ການປະເມີນ ແລະ ອົງການປະເມີນ ໂຄງການລົງທຶນຂອງລັດ; ການຢັ້ງຢືນບັນດາໂຄງການ ທີ່ເປັນໂຄງການຟື້ນຟູ ໂດຍສະເພາະໂຄງ ການພື້ນຖານໂຄງລ່າງ ຕ້ອງເປັນໂຄງການທີ່ໄດ້ຮັບ ຜົນກະທົບຈາກໄພພິບັດ ທຳມະຊາດ ໃນປີ 2018 ເທົ່ານັ້ນ ໂດຍມີການແຕ່ງຕັ້ງ ຄະນະທີ່ກ່ຽວຂ້ອງຢັ້ງຢືນ; ບັນດາໂຄງການທີ່ນຳສະເໜີ ເພື່ອຟື້ນຟູຕ້ອງເປັນ ໂຄງການທີ່ໄດ້ນຳໃຊ້ ແລະ ກໍ່ສ້າງສຳເລັດຜ່ານມາແລ້ວ, ມີການຢັ້ງຢືນຈາກຄະນະກຳມະການ ຈາກພາກສ່ວນກ່ຽວຂ້ອງ ສຳເລັດການມອບຮັບແລ້ວ ແລະ ໄດ້ນຳໃຊ້ແລ້ວ, ແຕ່ໄດ້ຮັບຜົນກະທົບຈາກໄພທຳມະຊາດ ທີ່ເກີດຂຶ້ນໃນປີ 2018; ສຳລັບໂຄງການຟື້ນຟູໄພພິບັດ ທີ່ໄດ້ກວດກາຄວາມຖືກຕ້ອງຊັດເຈນ ແລະ ຢັ້ງຢືນວ່າ ເປັນໂຄງການຟື້ນຟູໄພພິບັດໃນປີ 2018 ແລະ ເປັນໂຄງການທີ່ມີມູນຄ່າ ເສຍຫາຍໜ້ອຍກວ່າ ຫລື ເທົ່າກັບ 50 ລ້ານກີບ ໃຫ້ແກ້ໄຂຂາດຕົວ.
ພ້ອມນີ້, ໃຫ້ຫ້ອງການ ຫລື ກົມກອງທີ່ຮັບຜິດຊອບ ວຽກງານແຜນການຂອງບັນດາ ກະຊວງ ແລະ ອົງການລັດທຽບເທົ່າກະຊວງ ແລະ ພະແນກແຜນການ ແລະ ການລົງທຶນ ນະຄອນຫລວງວຽງຈັນ ແລະ ບັນດາແຂວງ ເປັນເຈົ້າການປະສານສົມທົບກັບກົມກອງ ແລະ ພະແນກການຕ່າງໆ ອ້ອມຂ້າງ ເພື່ອຄົ້ນຄວ້າສັງລວມ ແລະ ຈັດລຽງບູລິມະສິດ, ພ້ອມທັງຄົ້ນຄວ້າຈັດສັນທຶນ ໃສ່ບັນດາໂຄງ ການດັ່ງກ່າວ ໃຫ້ໄດ້ຕາມມາດຕາ 19 ຂອງກົດໝາຍວ່າດ້ວຍ ການລົງທຶນຂອງລັດ ແລ້ວນຳສະເໜີຄະ ນະນຳຂອງຕົນພິຈາລະນາຮັບຮອງ ແລະ ຢັ້ງຢືນເປັນທາງການ ແລ້ວນຳສົ່ງເຖິງກະຊວງແຜນການ ແລະ ການລົງທຶນ ເພື່ອຄົ້ນຄວ້ານຳສະເໜີ ລັດຖະບານພິຈາລະນາ ແລະ ນຳສະເໜີ ສະພາແຫ່ງຊາດຮັບຮອງ.
（ແຫຼ່ງຂໍ້ມູນ： ຂປລ）
