 |
ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ
ເຂົ້າຮ່ວມກອງປະຊຸມຄັ້ງນີ້ມີ ທ່ານ ສຸພັນ ແກ້ວມີໄຊ ລັດຖະມົນຕີກະຊວງແຜນການ ແລະ ການລົງທຶນ, ຮອງປະທານ ຄລທ.ສ ທັງເປັນຜູ້ປະຈຳການ; ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະ ການຄ້າ ຮອງປະທານ ຄລທ.ສ, ພ້ອມດ້ວຍບັນດາທ່ານຮອງລັດຖະມົນຕີ ທີ່ເປັນກຳມະການໃນ ຄລທ.ສ ແລະ ບັນດາທ່ານເຈົ້າແຂວງ ແລະ ຮອງເຈົ້າຄອງນະຄອນ. ໃນການເຄື່ອນໄຫວຂອງ ຄລທ.ສ ປີຜ່ານມາ ໄດ້ພິ ຈາລະນາອະນຸມັດກິດຈະການ ສໍາປະທານ ຈໍານວນ 43 ໂຄງ ການຄື: ຂະແໜງໄຟຟ້າ 14 ໂຄງການ, ໃນນັ້ນເຊັນບົດບັນທຶກຄວາມເຂົ້າໃຈ (MOU) ຈຳນວນ 10 ໂຄງການ, ເຊັນສັນຍາການພັດທະນາໂຄງການ (PDA) ຈຳນວນ 2 ຄັ້ງ, ສັນຍາສໍາປະທານ 2 ໂຄງການ; ຂະແໜງບໍ່ແຮ່ 15 ໂຄງການ, ໃນນັ້ນເຊັນສັນຍາຊອກຄົ້ນ ແລະ ສໍາຫຼວດ 12 ໂຄງການ, ເຊັນສັນຍາຂຸດຄົ້ນ ແລະ ປຸງແຕ່ງ 3 ໂຄງການ; ຂະແໜງກະສິກໍາ 5 ໂຄງການ, ໃນນັ້ນ ເຊັນ MOU 3ໂຄງການ, ສັນຍາສໍາປະທານ 2 ໂຄງການ; ຂະແໜງບໍລິການ 9 ໂຄງການ, ໃນນັ້ນ ເຊັນ MOU ສະໜາມບິນ 1 ໂຄງການ ແລະ ຂະແໜງທ່ອງທ່ຽວ 5 ໂຄງການ, ເຊັນ MOU ໂຄງການທາງດ່ວນ 1 ໂຄງການ ແລະ ໂຄງການໂຮງກັ່ນນຳ້ມັນເຊື້ອໄຟ 1 ໂຄງການ, ເຊັນສັນຍາກໍ່ສ້າງເສັ້ນທາງດ່ວນ (CA) ຈຳນວນ 1 ໂຄງການ. ສຳລັບວຽກງານການສົ່ງເສີມ ແລະ ຄຸ້ມຄອງ ເຂດເສດຖະກິດພິເສດ ມາຮອດປັດຈຸບັນໄດ້ມີບໍລິສັດເຂົ້າມາລົງທຶນ ຈົດທະບຽນໃນເຂດທັງໝົດ 593 ບໍລິສັດ ( ພາຍໃນ 89 ບໍລິສັດ, ຕ່າງປະເທດ 474 ບໍລິສັດ, ໃນນັ້ນ ແມ່ນພາຍໃນຮ່ວມກັບຕ່າງປະເທດ).
 |
ບັນດາຜູ້ແທນເຂົ້າຮ່ວມກອງປະຊຸມ
ໃນນີ້ເຂດທີ່ມີການລົງທຶນຫຼາຍກ່ວາໝູ່ແມ່ນ ຂສພ ສາມຫຼ່ຽມຄຳ ມີ 147 ບໍລິສັດ, ບໍ່ເຕ່ນແດນງາມ 128 ບໍລິສັດ, ຂສພ ສະຫວັນ - ເຊໂນ 117 ບໍລິສັດ, ເຂດກວມລວມໄຊເຊດຖາ 48 ບໍລິສັດ, ເຂດນິຄົມ ອຸດສາຫະກຳ ແລະ ການຄ້າວຽງຈັນ - ໂນນທອງ 47 ບໍລິສັດ, ຂສພ ຈໍາປາສັກ 33 ບໍລິສັດ ແລະ ຂສພ ອື່ນໆ 73 ບໍລິສັດ. ໃນດ້ານການປະຕິບັດພັນທະເຂົ້າງົບປະມານຂອງລັດ ໃນສົກປີ 2018 ເຂດເສດຖະກິດພິເສດປະຕິບັດການມອບພັນ ທະທັງໝົດ 13 ລ້ານກ່ວາໂດລາ ຊຶ່ງທຽບໃສ່ປີຜ່ານມາປະຕິບັດໄດ້ລື່ນ 3 ເທົ່າຕົວ. ສ່ວນດ້ານແຮງງານສຳລັບປີ 2018 ໄດ້ມີແຮງງານເຂົ້າໃໝ່ທັງ ໝົດ 8.105 ຄົນ. ດ້ານການນຳເຂົ້າ ແລະ ສົ່ງອອກສຳລັບປີ 2018 ໄດ້ນໍາເຂົ້າວັດຖຸດິບ, ເຄື່ອງກົນຈັກ ແລະ ອຸປະກອນ ເພື່ອມາຮັບໃຊ້ການຜະລິດ ແລະ ກໍ່ສ້າງພື້ນຖານໂຄງລ່າງມູນຄ່າທັງໝົດ 430 ລ້ານກ່ວາໂດລາ ເຂດທີ່ນຳເຂົ້າຫຼາຍກ່ວາໝູ່ແມ່ນເຂດສະຫວັນ - ເຊໂນ, ເຂດກວມລວມໄຊເຊດຖາ, ເຂດນິຄົມອຸດສາຫະກຳ ແລະ ການຄ້າວຽງຈັນ - ໂນນທອງ, ເຂດສາມຫຼ່ຽມຄຳ ແລະ ອື່ນໆ. ສ່ວນການສົ່ງອອກສິນຄ້າໄດ້ມີມູນຄ່າທັງໝົດ 249 ລ້ານກ່ວາໂດລາ ຊຶ່ງເຂດທີ່ມີການສົ່ງອອກຫຼາຍກ່ວາໝູ່ແມ່ນ ຂສພ ສະຫວັນ - ເຊໂນ, ເຂດນິຄົມອຸດສາຫະກໍາ ແລະ ການຄ້າວຽງຈັນ - ໂນນທອງ, ເຂດກວມລວມໄຊເຊດຖາ ແລະ ເຂດປາກເຊ - ຍີ່ປຸ່ນ SME ຂອງ ຂສພ ຈຳປາສັກ. ການສົ່ງອອກສ່ວນໃຫຍ່ແມ່ນເປັນສິນຄ້າປະເພດ ຊິ້ນສ່ວນ ເອເລັກໂຕຣນິກ, ເລນແວ່ນຕາ, ກ້ອງຖ່າຍຮູບ, ຜະລິດຕະພັນ ເຄື່ອງນຸ່ງຫົ່ມ, ວິກຜົມ, ເຄື່ອງຫຼິ້ນເດັກນ້ອຍ. ສຳລັບແຜນພັດທະນາເສດຖະກິດ - ສັງຄົມ ປີ 2019 ນີ້, ລັດຖະບານໄດ້ຄາດໝາຍສູ້ຊົນ ໂດຍກຳນົດລວມຍອດຜະລິດຕະພັນພາຍໃນ ( GDP ) ໃຫ້ຂະຫຍາຍຕົວ 6,5% ຂຶ້ນໄປ. ໃນນັ້ນ, ວຽກງານສົ່ງເສີມດຶງດູດການລົງທຶນຂອງພາກເອກະຊົນພາຍໃນ ແລະ ຕ່າງປະເທດ ຕ້ອງໃຫ້ບັນລຸ 23.086,13 ຕື້ກີບ, ກວມເອົາ 52,06% ຂອງທຶນລວມທັງໝົດ ( ຫຼື ເທົ່າກັບ 13,95% ຂອງ GDP ). ເຫັນໄດ້ວ່າວຽກງານດຶງດູດ ແລະ ການສົ່ງເສີມການລົງທຶນພາກເອກະຊົນພາຍໃນ ແລະ ຕ່າງປະເທດ ເປັນວຽກງານບຸລິມະສິດໜຶ່ງ ທີ່ມີຄວາມສຳຄັນຫຼາຍໃນການປະກອບສ່ວນເຂົ້າໃນການຈັດຕັ້ງປະຕິບັດ ແຜນພັດທະນາເສດຖະກິດ - ສັງຄົມໃນແຕ່ລະໄລຍະ ແລະ ເປັນຕົວຂັບເຄື່ອນເສດຖະກິດທີ່ສໍາຄັນຂອງ ສປປ ລາວ. ໃນນັ້ນ ການລົງທຶນຂອງພາກເອກະຊົນ ແລະ ການລົງທຶນຂອງເຂດເສດຖະກິດພິເສດ ແມ່ນ 1 ໃນ 4 ແຫຼ່ງທຶນຕົ້ນຕໍຂອງລັດຖະບານ. ເພື່ອໃຫ້ບັນລຸຄາດໝາຍທີ່ມີຄວາມສໍາຄັນດັ່ງກ່າວ ແລະ ປັບປຸງບັນຍາກາດການລົງທຶນ ໂດຍສະເພາະການແກ້ໄຂ 10 ຕົວຊີ້ວັດ ຂອງການດໍາເນີນທຸລະກິດໃຫ້ມີຄວາມສະດວກຢູ່ ສປປ ລາວ. ສະນັ້ນ, ໃນສົກປີ 2019 ລັດຖະບານໄດ້ວາງແຜນງານລະອຽດ ເພື່ອແກ້ໄຂຕົວຊີ້ວັດດັ່ງກ່າວ ເພື່ອໃຫ້ເປັນຮູບປະທຳໂດຍໄວ.
（ແຫຼ່ງຂໍ້ມູນ： pasaxon.org.la）
