ທ່ານ ພົນໂທ ຟານ ວັນ ຢາງ

ຄະນະຜູ້ແທນການທະຫານຂັ້ນສູງກອງທັບປະຊາຊົນ ຫວຽດນາມ ໂດຍ ທ່ານ ພົນໂທ ຟານ ວັນ ຢາງ ເສນາທິການໃຫຍ່ກອງທັບປະຊາຊົນ ຫວຽດນາມ, ຮອງລັດຖະມົນຕີກະຊວງປ້ອງກັນປະເທດ ຫວຽດນາມ ເປັນຫົວໜ້າຄະນະ ເຂົ້າຮ່ວມກອງປະຊຸມ ACDFM-16.

ຄະນະຜູ້ແທນກອງທັບຂັ້ນສູງຫວຽດນາມ

ACDFM-16 ຄັ້ງນີ້ທີ່ມີຫົວຂໍ້ວ່າ: “ຄວາມໝັ້ນຄົງແບບຍືນຍົງ”. ກ່າວຄຳເຫັນທີ່ກອງປະຊຸມ, ທ່ານ ພົນໂທ ຟານ ວັນ ຢາງ ໄດ້ຕີລາຄາສູງຕໍ່ຫົວຂໍ້ວ່າ: “ຄວາມໝັ້ນຄົງແບບຍືນຍົງ” ຂອງ ACDFM-16 ຄັ້ງນີ້, ຫົວຂໍ້ຂອງກອງປະຊຸມດັ່ງກ່າວໄດ້ສ່ອງແສງໃຫ້ເຫັນຄວາມປາຖະຫນາການເພີ່ມທະວີໃນການຮ່ວມມື ແລະ ຊຸກຍູ້ການຮ່ວມມືທີ່ເຂັ້ມແຂງລະຫວ່າງກໍາລັງທະຫານຂອງອາຊຽນ, ຄໍາໝັ້ນສັນຍາຂອງບັນດາປະເທດສະມາຊິກທັງຫມົດໃນການແກ້ໄຂບັນດາບັນຫາດ້ານຄວາມປອດໄພຢູ່ໃນພາກພື້ນ; ຮ່ວມກັນກ້າວສູ່ອະນາຄົດເຊິ່ງໃນນັ້ນຖືປະຊາຊົນເປັນສູນກາງ.

ບັນຍາກາດກອງປະຊຸມ

ທ່ານ ພົນໂທ ຟານ ວັນ ຢາງ ສະແດງຄວາມກັງວົນກ່ຽວກັບໄພຂົ່ມຂູ່ດ້ານຄວາມປອດໄພທີ່ສືບຕໍ່ມີຄວາມສັບສົນ, ລວມທັງບັນຫາຕ່າງໆເຊັ່ນ: ການກໍ່ການຮ້າຍ, ຄວາມສ່ຽງຕໍ່ຄວາມຂັດແຍ່ງດ້ານຊົນເຜົ່າ ແລະ ສາສະຫນາ; ຄວາມປອດໄພດ້ານເຄືອຂ່າຍອິນເຕີແນດ; ອາຊະຍາກໍາຂ້າມຊາດ; ການປ່ຽນແປງຂອງດິນຟ້າອາກາດຍັງເປັນສິ່ງທ້າທາຍສໍາລັບຄວາມປອດໄພຂອງໂລກ ແລະ ແຕ່ລະພາກພື້ນ, ນອກເຫນືອຈາກຄວາມສາມາດຂອງແຕ່ລະປະເທດທີ່ຈະແກ້ໄຂ.

ເຖິງວ່າກໍ່ມີຄວາມຄືບໜ້າຢ່າງຕັ້ງໜ້າຈໍານວນໜຶ່ງກໍ່ຕາມ, ແຕ່ສິ່ງທ້າທາຍດ້ານຄວາມປອດໄພທາງທະເລເຊັ່ນ: ຄວາມຂັດແຍ່ງກ່ຽວກັບອະທິປະໄຕ, ຄວາມຂັດແຍ່ງດ້ານຊັບພະຍາກອນ, ອາຊະຍາກໍາຢູ່ທະເລ ... ຈະສືບຕໍ່ເປັນໄພຂົ່ມຂູ່ຕໍ່ຄວາມປອດໄພທາງທະເລໃນອາຊີຕາເວັນອອກສຽງໃຕ້.

ບັນດາຄະນະຜູ້ແທນກອງທັບຂັ້ນສູງຂອງບັນດາປະເທດອາຊຽນ

ທ່ານ ພົນໂທ ຟານ ວັນ ຢາງ ໄດ້ສະແດງເຫັນດີ ແລະ ຕີລາຄາສູງ ຕໍ່ຮ່າງຖະແຫຼງການຮ່ວມຂອງກອງປະຊຸມ ACDFM ຄັ້ງນີ້, ໃນນັ້ນ ໄດ້ເນັ້ນໜັກເຖິງຄວາມສຳຄັນຂອງທະເລຕາເວັນອອກ ແລະ ຄຳໝັ້ນສັນຍາຂອງບັນດາປະເທດໃນການສືບຕໍ່ຮັກສາຄວາມເສລີໃນການເດີນທະເລ, ການບິນຢູ່ເຂດທະເລຕາເວັນອອກ, ເໝາະສົມກັບກົດໝາຍສາກົນ.

ຄຽງຄູ່ກັນນັ້ນ, ທ່ານ ພົນໂທ ຟານ ວັນ ຢາງ ກໍ່ສະເໜີໃຫ້ກຳລັງປະຕິບັດກົດໝາຍຢູ່ທະເລ ແລະ ເຫຼົ່າທັບເຮືອຂອງບັນດາຝ່າຍທີ່ກ່ຽວຂ້ອງຕ້ອງເພີ່ມທະວີການຮ່ວມມື, ແລກປ່ຽນຂໍ້ມູນຂ່າວສານເພື່ອແກ້ໄຂບັນດາບັນຫາຢູ່ທະເລ, ໂດຍສະເພາະແມ່ນຊາວປະມົງຢ່າງວ່ອງໄວ, ມີປະສິດທິຜົນບົນຈິດໃຈມະນຸດສະທຳ, ປະກອບສ່ວນໃນການຮັກສາສັນຕິພາບ, ສະຖຽນລະພາບຢູ່ເຂດທະເລໃນພາກພື້ນ.

ພິທີມອບທຸງປະທານ ACDFM ໃຫ້ແກ່ຫວຽດນາມ

ທ່ານ ພົນໂທ ຟານ ວັນ ຢາງ ກໍ່ໄດ້ເນັ້ນຫນັກວ່າ, ໃນປີທີ່ຜ່ານມາ, ດ້ວຍນະໂຍບາຍການມີສ່ວນຮ່ວມຢ່າງຕັ້ງຫນ້າ, ເປັນເຈົ້າການ ແລະ ມີຄວາມຮັບຜິດຊອບ, ກອງທັບປະຊາຊົນຫວຽດນາມໄດ້ສົ່ງກໍາລັງເຂົ້າຮ່ວມໃນກິດຈະກໍາທົ່ວໄປທັງຫມົດພາຍໃນຂອບການຮ່ວມມືຂອງອາຊຽນ; ໃນເວລາຕໍ່ມາ, ຫວຽດນາມຍັງຈະສືບຕໍ່ສົ່ງກໍາລັງ ແລະ ພາຫະນະທີ່ເຫມາະສົມໃນການເຂົ້າຮ່ວມບັນດາບັ້ນຊ້ອມຮົບທາງການທະຫານ. 
  
ບົດຖະແຫຼງການຂອງທ່ານ ພົນໂທ ຟານ ວັນ ຢາງ ໄດ້ຮັບຄວາມສົນໃຈ ແລະ ຕີລາຄາສູງຂອງບັນດາຄະນະຜູ້ແທນການທະຫານຂັ້ນສູງຂອງບັນດາປະເທດຕ່າງໆ.  ກອງປະຊຸມ ACDFM ຄັ້ງນີ້ ໄດ້ອອກຖະແຫຼງການຮ່ວມ, ພ້ອມກັນນັ້ນກໍ່ໄດ້ຈັດພິທີມອບທຸງປະທານ ACDFM ໃຫ້ແກ່ຫວຽດນາມ, ເປັນປະເທດປະທານໝູນວຽນຂອງອາຊຽນ ປີ 2020.
  

（ໄຊພອນ）