 |
ຮອງນາຍົກລັດຖະມົນຕີ ຕ້ອນຮັບຜູ້ຊ່ວຍ ເລຂາທິການໃຫຍ່ ສປຊ
ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ໄດ້ຕ້ອນຮັບການເຂົ້າຢ້ຽມຂໍ່່ານັບ ຂອງທ່ານ ນາງ ອາມິດາ ເຊລເຊຍ (Armida Salsiah Alisjahbana) ຜູ້ຊ່ວຍເລຂາທິການໃຫຍ່ ອົງການສະຫະປະຊາຊາດ (ສປຊ) ທັງເປັນເລຂາບໍລິຫານງານຂອງຄະນະກໍາມາທິການເສດຖະກິດ - ສັງຄົມ ສປຊ ປະຈໍາ ພາກພື້ນອາຊີ - ປາຊີຟິກ (UNESCAP) ໃນວັນທີ 22 ເມສານີ້ ທີ່ກະຊວງການເງິນ, ໃນໂອກາດ ທີ່ທ່ານ ພ້ອມຄະນະເດີນທາງມາຢ້ຽມຢາມ ສປປ ລາວ ຢ່າງເປັນທາງການ ໃນລະຫວ່າງວັນທີ 21 - 23 ເມສານີ້.
ໂອກາດດັ່ງກ່າວ ທ່ານ ຮອງນາຍົກລັດຖະມົນຕີ ໄດ້ກ່າວສະແດງຄວາມຕ້ອນຮັບຊົມເຊີຍ ແລະ ຕີລາຄາສູງ ຕໍ່ ທ່ານ ນາງ ອາມິດາ ເຊລເຊຍ ພ້ອມຄະນະທີ່ມາຢ້ຽມຢາມ ສປປ ລາວ ໃນຄັ້ງນີ້ ຊຶ່ງເປັນຂີດໝາຍສຳຄັນຕໍ່ສາຍພົວພັນການຮ່ວມມືລະຫວ່າງ ສປປ ລາວ ແລະ ອົງການ ສປຊ. ທ່ານຮອງນາຍົກລັດຖະມົນຕີ ຍັງໄດ້ກ່າວສະແດງຄວາມຂອບໃຈມາຍັງ UNESCAP ທີ່ໄດ້ປະກອບສ່ວນຊ່ວຍເຫຼືອທາງດ້ານເຕັກນິກວິຊາການ ແລະ ທຶນຮອນໃນການຍົກລະດັບບຸກຄະລາກອນຂອງລາວ ໃນຂົງເຂດການພັດທະນາເສດຖະກິດ - ສັງຄົມໃນດ້ານຕ່າງໆ ຂອງ ສປປ ລາວ ໂດຍສະເພາະ ກໍຄືການຈັດຕັ້ງປະຕິ ບັດແຜນພັດທະນາເສດຖະກິດ - ສັງຄົມ 5 ປີ ຄັ້ງທີ 8 (2016 - 2020), ວິໄສທັດ 2030 ແລະ ການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ ລວມທັງການຫຼຸດພົ້ນອອກຈາກສະຖານະພາບປະເທດດ້ອຍພັດທະນາ.
ໂອກາດດຽວກັນນີ້, ທ່ານ ນາງ ອາມິດາ ເຊລເຊຍ ກໍໄດ້ກ່າວສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ຂອງ ທ່ານຮອງນາຍົກລັດຖະມົນຕີ ພ້ອມແຈ້ງຈຸດປະສົງໃນການມາຢ້ຽມຢາມ ສປປ ລາວຢ່າງເປັນທາງການໃນຄັ້ງນີ້. ໃນຕອນເຊົ້າວັນດຽວກັນ, ທ່ານ ນາງ ອາມິດາ ເຊລເຊຍ ພ້ອມຄະນະ ຍັງໄດ້ເຂົ້າຢ້ຽມຂໍ່ານັບ ທ່ານ ສຸພັນ ແກ້ວມີໄຊ ລັດຖະມົນຕີກະຊວງແຜນການ ແລະ ການລົງທຶນ ແລະ ທ່ານ ສະເຫຼີມໄຊ ກົມມະສິດ ລັດຖະ ມົນຕີກະຊວງການຕ່າງປະເທດ ເພື່ອເປັນການຮັດແໜ້ນສາຍພົວພັນການຮ່ວມມືລະຫວ່າງ ສປປ ລາວ ແລະ UNESCAP ໃຫ້ແໜ້ນແຟ້ນຍິ່ງໆຂຶ້ນ.
（ແຫຼ່ງຂໍ້ມູນ： pasaxon.org.la）
