ນັກສຶກສາເກືອບພັນຄົນ ພາກັນໄປລຽນແຖວຖ້າຊື້ແບບຟອມສອບເສັງບັນຈຸເຂົ້າ ສະພາແຫ່ງຊາດ

ການປະກາດຮັບສະໝັກພະນັກງານປີນີ້ຂອງສະພາແຫ່ງຊາດຄືກຄັກຫຼາຍກວ່າທຸກປີ ເນື່ອງຈາກວ່າທຸກກະຊວງ, ອົງການແມ່ນມີໂກຕາຮັບພະນັກງານໜ້ອຍລົງ ໃນຂະນະທີ່ຈຳນວນຜູ້ຕ້ອງການຢາກສະໝັກມີຫຼາຍ ຈິ່ງບໍ່ແປກທີ່ຕ້ອງພາກັນມາຕໍ່ແຖວຍາວແຕ່ເຊົ້າໆຟ້າຍັງບໍ່ທັນແຈ້ງ.
ແນວໃດກໍ່ດີປະກົດວ່າຕາມແຈ້ງການການເປີດຂາຍແບບຟອມຂອງສະພາແຫ່ງຊາດແມ່ນມີເງື່ອນໄຂຮັບພຽງ 10 ສາຂາວິຊາເທົ່ານັ້ນ ເຊິ່ງບໍ່ໄດ້ລະບຸວ່າໃນ 10 ວິຊາຮຽນທີ່ຕ້ອງການນັ້ນຈະມີຈັກຕຳແໜ່ງງານ.

ການສະໝັກເຂົ້າເຮັດວຽກນຳລັດຫຼາຍຄົນເວົ້າຫຼາຍແນວ ບາງກໍວ່າບໍ່ສູ້ເສັ້ນສາຍ, ບາງກໍ່ວ່າບໍ່ສູ້ “ງ” ແຕ່ແອັດມິນເຊື່ອວ່າສະພາແຫ່ງຊາດຈະໃຫ້ຄວາມຍຸຕິທຳແກ່ທຸກຄົນ, ແນ່ນອນເພິ່ນຈະເລືອກເອົາບຸກຄົນທີ່ມີຄຸນນະພາບບັນຈຸເຂົ້າໃນຕຳແໜ່ງງານທີ່ວ່າງຢູ່ ເພື່ອສາມາດເຮັດວຽກຮັບໃຊ້ປະຊາຊົນຢ່າງແທ້ຈິງ.
ສ່ວນຜູ້ທີ່ໄປແລ້ວບໍ່ສົມຫວັງກໍ່ຈົ່ງຢ່າທໍ້ຖອຍ, ສິ່ງໜຶ່ງທີ່ແອັດຢາກຝາກໄວ້ໃຫ້ຜູ້ທີ່ຍັງວ່າງງານ ຫຼື ປັກໃຈຢາກເຮັດວຽກນຳລັດຢ່າງດຽວ ຂໍໃຫ້ເປີດໃຈໃຫ້ກວ້າງຂຶ້ນ ແລ້ວໄປເຮັດວຽກນຳບໍລິສັດນ້ອຍໃຫຍ່ທີ່ມີຢູ່ບາງທີອາດຊ່ວຍຕອບໂຈດທ່ານໄດ້ໃນວັນຂ້າງໜ້າໄດ້ດີກວ່າ. ຕ້ອງເຂົ້າໃຈວ່າ ທຸກວັນນີ້ລັດຖະບານແມ່ນຈຳກັດຈຳນວນຕົວເລກຮັບພະນັກງານໜ້ອຍລົງ, ຄົນທີ່ຈົບມາເພີ່ມຂຶ້ນໃນແຕ່ລະປີ ທຸກຄົນລ້ວນມີຄວາມຮູ້, ມີຈຸດເດັ່ນທີ່ແຕກຕ່າງກັນ ສະນັ້ນຈິ່ງບໍ່ຄວນປັກໃຈເຮັດວຽກນຳລັດຢ່າງດຽວ. ການຢູ່ກັບເອກະຊົນກໍ່ແມ່ນເຮັດໜ້າທີ່ຮັບໃຊ້ປະເທດຊາດຄືກັນ.

（ແຫຼ່ງ​ຂໍ້​ມູນ​： laoedaily.com.la）