ກະຊວງການຕ່າງປະເທດ ເພີ່ມຄວາມເຂົ້າໃຈ ວັນສາກົນ ຢຸດຕິການໃຊ້ຄວາມຮຸນແຮງ ຕໍ່ແມ່ຍິງ

ຄະນະຜູ້ແທນຮ່ວມຖ່າຍຮູບເປັນທີ່ລະນຶກ.

ກອງປະຊຸມໃນຄັ້ງນີ້, ມີຈຸດປະສົງເພື່ອເປັນການໂຄສະນາເຜີຍແຜ່ ໃຫ້ພະນັກງານ-ລັດຖະກອນ ກະຊວງການຕ່າງປະເທດ ໃຫ້ຮັບຮູ້ ແລະ ເຂົ້າໃຈ ກ່ຽວກັບແນວທາງນະໂຍບາຍຂອງພັກ ໃນການສົ່ງເສີມສິດສະເໝີພາບ ຍິງ-ຊາຍ, ການຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ, ທັງເປັນການສ້າງຈິດສໍານຶກ ໃຫ້ມີຄວາມຮັບຮູ້ ແລະ ເຂົ້າໃຈຢ່າງຖືກຕ້ອງ ວ່າການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ ເປັນສິ່ງທີ່ຮັັບບໍ່ໄດ້ ແລະ ເປັນການລ່ວງລະເມີດສິດທິຂອງແມ່ຍິງ ແລະ ເດັກຍິງໃນສັງຄົມ.
ທ່ານ ແສງເພັດ ຮຸ່ງບຸນຍວງ ກ່າວວ່າ: ວັນທີ 25 ພະຈິກ ຖືເປັນວັນສາກົນ ຢຸດຕິການໃຊ້ຄວາມຮຸນແຮງຕໍ່ແມ່ຍິງ ແລະ ໄດ້ຖືກຮັບຮອງເອົາຢ່າງເປັນທາງການ ຕາມມະຕິຕົກລົງຂອງອົງການສະຫະປະຊາຊາດ ໃນປີ 2000. ນັບແຕ່ນັ້ນມາ ວັນທີ 25 ພະຈິກ ຂອງທຸກປີ ໄດ້ກາຍເປັນສັນຍາລັກຂອງການຢຸດຕິຄວາມຮຸນແຮງຕໍ່ແມ່ຍິງ ແລະ ເດັກຍິງ ເພື່ອເຮັດໃຫ້ບັນດາປະເທດຕ່າງໆໃນທົ່ວໂລກ ໄດ້ພ້ອມກັນລະນຶກເຖິງເຫດການຄວາມຮຸນແຮງຕໍ່ແມ່ຍິງທີ່ເກີດຂຶ້ນ. ທ່ານ ແສງເພັດ ຮຸ່ງບຸນຍວງ ຍັງໄດ້ເນັ້ນໜັກຕື່ມວ່າ ພາຍໃຕ້ຫົວຂໍ້ '' ຮັບຟັງຂ້ອຍແດ່ '' '' Hear me too '' ທີ່ສື່ສານສຳຄັນເຖິງຄວາມຕ້ອງການຂອງແມ່ຍິງ ແລະ ເດັກຍິງ ຜູ້ຖືກເຄາະຮ້າຍ ຈາກຄວາມຮຸນແຮງໃນຄອບຄົວ ກໍຄື ໃນສັງຄົມ. ການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ ໃນປັດຈຸບັນ ກຳລັງແຜ່ລາມຫລາຍຮູບແບບໃນທົ່ວໂລກ ແລະ ສົ່ງຜົນກະທົບຕໍ່ການພັດທະນາເສດຖະກິດ-ສັງຄົມ ແຫ່ງ ສປປ ລາວ ເວົ້າລວມ, ເວົ້າສະເພາະ ກະທົບຕໍ່ກະໂຕຂອງແມ່ຍິງເອງທາງດ້ານຈິດໃຈ, ຮ່າງກາຍຕະຫລອດຮອດຊັບສິນ ສາເຫດຕົ້ນຕໍ ແມ່ນຍ້ອນຮີດຄອງປະເພນີອັນຫລ້າຫລັງ, ການເຊື່ອຖືແບບງົມງວາຍ, ຄວາມທຸກຍາກຂາດເຂີນ, ລະດັບການສຶກສາຕ່ຳ ແລະ ສິ່ງຫຍໍ້ທໍ້ອື່ນໆ ທີ່ມີຕໍ່ແມ່ຍິງໃນສັງຄົມ.
ເພື່ອເປັນການປຸກລະດົມປູກຈິດສຳນຶກ ໃຫ້ແກ່ພະນັກງານ-ລັດຖະກອນ ຂອງກະຊວງການຕ່າງປະເທດ ກໍຄື ສັງຄົມ ໃຫ້ດັດປັບອັກຄະຕິ ເພື່ອລຶບລ້າງທຸກຮູບການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ ຢ່າງສິີ້ນເຊິງ, ຄະນະກຳມາທິການເພື່ອຄວາມກ້າວໜ້າຂອງແມ່ຍິງ ແລະ ແມ່ - ເດັກ ກະຊວງການຕ່າງປະເທດ ຈຶ່ງໄດ້ຈັດກອງປະຊຸມດັ່ງກ່າວຂຶ້ນ ໃຫ້ຜູ້ເຂົ້າຮ່ວມໄດ້ຮັບຟັງການເຜີຍແຜ່ເອກະສານທີ່ສຳຄັນ ຄື: ປະຫວັດຄວາມເປັນມາ ກ່ຽວກັບວັນສາກົນຢຸດຕິຄວາມຮຸນແຮງຕໍ່ແມ່ຍິງ 25 ພະຈິກ, ບົດສຶກສາການຄາດຄະເນໃຊ້ຈ່າຍທີ່ຈຳເປັນ ຂອງຫລາຍພາກສ່ວນໃນການຊ່ວຍເຫລືອຜູ້ຖືກເຄາະຮ້າຍຈາກຄວາມຮຸນແຮງຕໍ່ແມ່ຍິງ ແລະ ເດັກ, ຂໍ້ສະດວກ ແລະ ສີ່ງທ້າທາຍຂອງ ສປປ ລາວ ໃນການປະຕິບັດສົນທິສັນຍາດ້ານສິດທິມະນຸດ ລວມທັງ CEDAW ແລະ CRC ແລະ ສົນທິສັນຍາວ່າດ້ວຍການລຶບລ້າງທຸກຮູບການຈຳແນກຕໍ່ແມ່ຍິງ.

（ແຫຼ່ງ​ຂໍ້​ມູນ​： KPL）