 |
ທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ.
ໂອກາດນີ້, ທ່ານປະທານກອງປະຊຸມ ໄດ້ສະຫລຸບຄືນການປະກອບຄຳຄິດຄຳເຫັນຂອງບັນດາ ສສຊ, ພ້ອມທັງສະເໜີໃຫ້ຄະນະຮັບຜິດຊອບຮ່າງກົດໝາຍສະບັບດັ່ງກ່າວນຳເອົາຄຳສະເໜີຂອງ ສສຊ ໄປພິຈາລະນາ ແລະ ປັບປຸງໃສ່ຮ່າງກົດໝາຍສະບັບນີ້ ໂດຍສະເພາະດ້ານໂຄງສ້າງ ແລະ ເນື້ອໃນບາງມາດຕາ ໃຫ້ມີຄວາມຊັດເຈນ, ຄົບຖ້ວນສົມບູນ, ສອດຄ່ອງກັບສະພາບຄວາມເປັນຈິງຂອງປະເທດເຮົາ ແລະ ສາມາດນຳໄປຈັດຕັ້ງປະຕິບັດຢ່າງມີປະສິດທິຜົນ. ເປັນຕົ້ນແມ່ນ ການໃຊ້ຄຳສັບ, ການອະທິບາຍສັບກ່ຽວກັບຄົນພິການ, ການຈຳແນກປະເພດຄົນພິການໃຫ້ຊັດເຈນ, ການມີສ່ວນຮ່ວມຂອງທຸກພາກສ່ວນໃນສັງຄົມ, ໃນການຊ່ວຍເຫລືອຄົນພິການ, ການຈັດລະດັບຂອງຄວາມພິການ, ຂໍ້ຫ້າມສຳລັບຄົນພິການ, ນະໂຍບາຍຂອງລັດຕໍ່ຄົນພິການບາງເນື້ອໃນຍັງບໍ່ລະອຽດ, ຄວນມີວິທີການຢ່າງຈະແຈ້ງໃນການເກັບກຳສະຖິຕິຄົນພິການ, ການເຂົ້າເຖິງການຂົນສົ່ງສາທາລະນະ ແມ່ນໃຫ້ກຳນົດຊັດເຈນຕື່ມກ່ຽວກັບຫາຍົກເວັ້ນຫລຸດລາຄາຄ່າໂດຍສານ ແລະ ຄ່າບໍລິການ, ໃຫ້ກຳນົດສິດ ແລະ ໜ້າທີ່ຂອງອົງການປົກຄອງບ້ານໃຫ້ເປັນມາດຕາສະເພາະ ເນື່ອງຈາກວ່າ ອົງການປົກຄອງທ້ອງຖິ່ນແມ່ນຕິດພັນກັບບັນຫາດັ່ງກ່າວໂດຍກົງ ແລະ ບັນຫາສຳຄັນອື່ນໆ.
 |
ຜົນການລົງຄະແນນສຽງ.
ການສ້າງ ກົດໝາຍວ່າດ້ວຍຄົນພິການນີ້, ເປັນການສ້າງຄັ້ງທຳອິດ ເພື່ອໃຫ້ສອດຄ່ອງກັບສະພາບຄວາມເປັນຈິງ ທາງດ້ານເສດຖະກິດ-ສັງຄົມ, ການເຊື່ອມໂຍງກັບພາກພື້ນ ແລະ ສາກົນ, ຄຸ້ມຄອງ ແລະ ພັດທະນາວຽກງານຄົນພິການແນໃສ່ເສີມສ້າງໃຫ້ຄົນພິການ ມີສ່ວນຮ່ວມຢ່າງເຕັມສ່ວນໃນສັງຄົມ ແລະ ມີຊີວິດການເປັນຢູ່ນັບມື້ດີຂຶ້ນເທື່ອລະກ້າວ.
ກ່ອນໜ້ານີ້ ທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີ ການສັງຄົມ ໄດ້ຜ່ານຮ່າງກົດໝາຍ ວ່າດ້ວຍຄົນພິການ ເຊິ່ງຮ່າງກົດໝາຍດັ່ງກ່າວ ປະກອບມີ 12 ພາກ, 15 ໝວດ ແລະ 91 ມາດຕາ.
 |
 |
ບັນດາສະມາຊິກສະພາແຫ່ງຊາດ ຮ່ວມປະກອບຄຳເຫັນໃສ່ ຮ່າງກົດໝາຍວ່າດ້ວຍຄົນພິການ.
ການສ້າງ ກົດໝາຍວ່າດ້ວຍຄົນພິການນີ້, ເປັນຄັ້ງທຳອິດ ເພື່ອໃຫ້ສອດຄ່ອງກັບສະພາບຄວາມເປັນຈິງ ທາງດ້ານເສດຖະກິດ-ສັງຄົມ, ການເຊື່ອມໂຍງກັບພາກພື້ນ ແລະ ສາກົນ, ຄຸ້ມຄອງ ແລະ ພັດ ທະນາວຽກງານຄົນພິການ, ແນໃສ່ເສີມສ້າງໃຫ້ຄົນພິການ ມີສ່ວນຮ່ວມຢ່າງເຕັມສ່ວນໃນສັງຄົມ ແລະ ມີຊີວິດການເປັນຢູ່ນັບມື້ດີຂຶ້ນເທື່ອລະກ້າວ.
ພາຍຫລັງທີ່ ທ່ານລັດຖະມົນຕີກະຂວງແຮງງານ ແລະ ສະຫວັດດີການສັງຄົມ ສະເໜີຮ່າງກົດໝາຍດັ່ງກ່າວແລ້ວ, ບັນດາສະມາຊິກສະພາແຫ່ງຊາດ ໄດ້ພ້ອມກັນສຸມໃສ່ ປະກອບຄຳຄິດຄຳເຫັນ ໃສ່ຮ່າງ ກົດໝາຍສະບັບນີ້ ໃຫ້ມີເນື້ອໃນຄົບຖ້ວນສົມບູນ, ທັງສາມາດຮັບຮອງ ແລະ ໄດ້ຮັບການຈັດຕັ້ງປະຕິບັດ ເພື່ອໃຫ້ຄົນພິການລາວ ໄດ້ມີກົດໝາຍຮັບຮອງ ແລະ ປົກປ້ອງຢ່າງເປັນທຳ.
ພາຍຫຼັງສະພາແຫ່ງຊາດໄດ້ປະກອບຄຳຄິດຄຳເຫັນ ໃສ່ຮ່າງກົດໝາຍສະບັບດັ່ງກ່າວ ໂດຍລວມ, ບັນດາ ສສຊ ໄດ້ເຫັນດີເປັນເອກະພາບເປັນພື້ນຖານ ທາງດ້ານໂຄງສ້າງ ແລະ ເນື້ອໃນ ແຕ່ຍັງມີ ສສຊ ບາງເຂດ ໄດ້ສະເໜີໃຫ້ມີການປັບປຸງ ຕັດອອກ, ເພີ່ມໃສ່ ບາງເນື້ອໃນບາງມາດຕາ ທີ່ເຫັນວ່າຍັງບໍ່ທັນສອດຄ່ອງ, ຖືກຕ້ອງ, ຊັດເຈນ ໂດຍສະເພາະ ມາຕາທີ 2 ນິຍາມກ່ຽວກັບຄົນພິການ ຍັງບໍ່ທັນມີຄວາມຊັດເຈນ, ສ່ວນ ມາດຕາທີ 16-17 ທີ່ເວົ້າກ່ຽວກັບການເກັບກຳສະຖິຕິຂອງຄົນພິການ ບັນດາ ສສຊ ໄດ້ສະເໜີໃຫ້ປັບປຸງບາງເນື້ອໃນເພີ່ມເຕີມ, ພ້ອມທັງສະເໜີໃຫ້ມີຜູ້ຮັບຜິດຊອບ ເກັບກຳສະຖິຕິຄົນພິການຢ່າງຄັກແນ່ ແນໃສ່ເຮັດໃຫ້ການເກັບກຳສະຖິຕິມີ ຄວາມຖືກຕ້ອງ, ຊັດເຈນ ແລະ ມາດຕາ 20 ຄວາມສະເໝີພາບທາງດ້ານການເມືອງ ຂອງຄົນພິການ ສສຊ ໄດ້ສະເໜີໃຫ້ມີການກຳນົດຢ່າງຈະແຈ້ງ ເປັນຕົ້ນ ຜູ້ພິການມີສິດສະໝັກເລືອກຕັ້ງ ໃຫ້ເບິ່ງຄືນວ່າເໝາະສົມຫລືບໍ່ ແລະ ໃຫ້ອະທິບາຍຢ່າງລະອຽດ. ນອກນັ້ນ, ມາດຕາທີ 28 ກ່ຽວກັບການແບ່ງແຍກປະເພດຄົນພິການ ສສຊ ສະເໜີໃຫ້ຄະນະຮັບຜິດຊອບເບິ່ງຄືນ ແລະ ປັບປຸງ ບໍ່ໃຫ້ມີການແບ່ງແຍງປະເພດຄົນພິການ.
ພ້ອມກັນນັ້ນ, ສສຊ ຍັງ ໄດ້ສະເໜີໃຫ້ເພີ່ມບາງມາດຕາ ທີ່ກ່ຽວກັບລະດັບຂອງຄົນພິການ ເພື່ອກຳນົດຜູ້ພິການຮ້າຍແຮງ, ພິການເບົາ ຈະໄດ້ຮັບການແກ້ໄຂ ແລະ ໃຫ້ການຊ່ວຍເຫລືອຄືແນວໃດ ແລະ ໄດ້ສະເໜີໃຫ້ມີຂໍ້ຫ້າມຕ່າງໆ ຕໍ່ກັບຄົນພິການ ຢ່າງຈະແຈ້ງ ແນໃສ່ຫລີກລ້ຽງການສວຍໃຊ້ຕ່າງໆ.
（ແຫຼ່ງຂໍ້ມູນ： ຂປລ）
