 |
ທ່ານ ທັນສະໄໝ ກົມມະສິດ ລັດຖະມົນຕີກະຊວງໄປສະນີ, ໂທລະຄົມມະນາຄົມ ແລະ ການສື່ສານ.
ທ່ານ ທັນສະໄໝ ກົມມະສິດ ລັດຖະມົນຕີກະຊວງໄປສະນີ, ໂທລະຄົມມະນາຄົມ ແລະ ການສື່ສານ ໄດ້ໃຫ້ຮູ້ ໃນກອງປະຊຸມ ສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ VIII ໃນວັນທີ 12 ທັນວາ 2018 ນີ້ວ່າ: ການສ້າງກົດໝາຍສະບັບນີ້ ແມ່ນມີຄວາມຈຳເປັນເພື່ອຄຸ້ມຄອງ, ເກັບກຳ ແລະ ສົ່ງເສີມການນຳໃຊ້ລາຍເຊັນເອເລັກໂຕຣນິກ, ເຮັດໃຫ້ການນຳໃຊ້ ແລະ ການບໍລິການມີຄວາມຖືກຕ້ອງ ແລະ ໄດ້ມາດຕະຖານ ແນໃສ່ສ້າງຄວາມສະດວກ, ວ່ອງໄວ, ທັນສະໄໝ, ໂປ່ງໃສ, ປອດໄພ ແລະ ຍຸຕິທໍາ ຕໍ່ຜູ້ບໍລິການ ແລະ ຜູ້ໃຊ້ບໍລິການໃນຂົງເຂດການຄ້າ, ການເງິນ ແລະ ບໍລິການທາງອິນເຕີເນັດອື່ນໆ, ທັງເປັນການ ຜັນຂະຫຍາຍ ແລະ ຮອງຮັບ ກົດໝາຍເຕັກໂນໂລຊີການສື່ສານຂໍ້ມູນຂ່າວສານ, ກົດໝາຍປົກປ້ອງຂໍ້ມູນຂ່າວສານຜ່ານອິນເຕີເນັດ ແລະ ດຳລັດວ່າດ້ວຍສູນຂໍ້ມູນຂ່າວສານຜ່ານອິນເຕີເນັດ ໃຫ້ສາມາດປະຕິບັດໄດ້ຢ່າງສະດວກ ແລະ ຮັບປະກັນຄວາມປອດໄພເປັນການຊຸກຍູ້ການຄ້າເອເລັກໂຕຣນິກ (e-Commerce) ໃຫ້ສາມາດຂະຫຍາຍຕົວ ແລະ ເຊື່ອມໂຍງກັບສາກົນໄດ້.
ສຳລັບຜົນປະໂຫຍດທີ່ຈະໄດ້ ຈາກກົດໝາຍດັ່ງກ່າວ ແມ່ນຮັບປະກັນຄວາມປອດໄພ ໃນການສົ່ງ-ຮັບເອກະສານຂອງພາກລັດ ແລະ ປະຊາຊົນ ໂດຍສະເພາະວຽກງານ ປກສ, ປກຊ, ວຽກງານການເງິນ, ທະນາຄານ, e-Passport, e-VISA ແລະ ອື່ນໆ; ອໍານວຍຄວາມສະດວກ ໃນເຮັດທຸລະກິດຜ່ານອິນເຕີເນັດ ໂດຍສະເພາະທຸລະກໍາການເງິນ, ການຄ້າທາງເອເລັກໂຕຣນິກໃຫ້ມີການຂະຫຍາຍ ຕົວຫລາຍຂຶ້ນ; ສ້າງຄວາມເຊື່ອໝັ້ນໃນການລົງທຶນຂອງນັກທຸລະກິດທັງພາຍໃນ ແລະ ຕ່າງປະເທດ; ປະຢັດງົບປະມານລາຍຈ່າຍສໍາລັບຜູ້ຊົມໃຊ້ ແລະ ສາມາດສ້າງລາຍຮັບເຂົ້າລັດ ແລະ ເຮັດໃຫ້ມີຄວາມໂປ່ງໃສ ກວດສອບໄດ້ ຊ່ວຍປ້ອງກັນການ ສໍ້ລາດບັງຫລວງ.
 |
ບັນຍາກາດກອງປະຊຸມປະກອບຄຳເຫັນເຂົ້າຮ່າງກົດໝາຍ ວ່າດ້ວຍລາຍເຊັນເອເລັກໂຕນິກ.
ໂອກາດນີ້, ທ່ານປະທານກອງປະຊຸມ ໄດ້ສະຫລຸບຄືນການປະກອບຄຳຄິດຄຳເຫັນເປັນເວລາ 1 ວັນເຕັມ ຂອງບັນດາ ສສຊ ເຊິ່ງໂດຍລວມແລ້ວແມ່ນເຫັນດີເປັນເອກະພາບເປັນພື້ນຖານ ທາງດ້ານໂຄງສ້າງ ແລະ ເນື້ອໃນ, ພ້ອມທັງໄດ້ສະເໜີໃຫ້ມີການປັບປຸງບາງເນື້ອໃນ, ບາງມາດຕາ ໂດຍສະເພາະການອະທິບາຍຄຳສັບ, ການປັບປຸງບາງໂຄງສ້າງຂອງກົດໝາຍ, ສິດ ແລະ ພັນທະຂອງຜູ້ອອກໃບອານຸມັດໃບຮັບຮອງລາຍເຊັນ, ການຮັບປະກັນຄວາມປອດໄພໃນການອານຸມັດລາຍເຊັນ, ການຄຸ້ມຄອງກວດກາວຽກງານລາຍເຊັນແບບເອເລັກໂຕນິກ ຄວນກຳນົດແຈ້ງວ່າມີຂົງເຂດໃດແດ່ທີ່ຈະຕິດຕາມກວດກາ, ການຮັບປະກັນໃນການຄຸ້ມຄອງ ແລະ ການນຳໃຊ້ລາຍເຊັນດັ່ງກ່າວ ແລະ ບັນຫາສຳຄັນອື່ນໆ ຈຳນວນໜຶ່ງ.
 |
ຜົນການລົງຄະແນນສ່ຽງ.
ພາຍຫລັງທີ່ ກົດໝາຍສະບັບນີ້ ໄດ້ຖືກຮັບຮອງ ແລະ ປະກາດໃຊ້ແລ້ວ, ກະຊວງໄປສະນີ, ໂທລະຄົມມະນາຄົມ ແລະ ການສື່ສານ ຈະມີບ່ອນອີງໃນການສ້າງເຄື່ອງມື ຈັດຕັ້ງປະຕິບັດການຄຸ້ມຄອງ ວຽກງານລາຍເຊັນເອເລັກໂຕຣນິກ ແລະ ສ້າງຜູ້ອອກໃບຮັບຮອງລາຍເຊັນເອເລັກໂຕຣນິກຢູ່ ສປປ ລາວ ເພື່ອໃຫ້ທຸກຂະແໜງການ ສາມາດນຳໃຊ້ລະບົບການຮັບຮອງລາຍເຊັນເອເລັກໂຕຣນິກ ທີ່ເປັນຂອງລາວ ແລະ ຕັ້ງຢູ່ລາວ, ເຊິ່ງຜົນປະໂຫຍດທີ່ຈະໄດ້ຈາກກົດໝາຍດັ່ງກ່າວ ແມ່ນຮັບປະກັນຄວາມປອດໄພ ໃນການສົ່ງ-ຮັບເອກະສານຂອງພາກລັດ ແລະ ປະຊາຊົນ ໂດຍສະເພາະວຽກງານປກສ, ປກຊ, ວຽກງານການເງິນ, ທະນາຄານ, e-Passport, e-VISA ແລະ ອື່ນໆ; ອຳນວຍຄວາມສະດວກ ໃນເຮັດທຸລະກິດຜ່ານອິນນເຕີເນັດ ໂດຍສະເພາະທຸລະກໍາການເງິນ, ການຄ້າທາງເອເລັກໂຕຣນິກໃຫ້ມີການຂະຫຍາຍຕົວຫລາຍຂຶ້ນ; ສ້າງຄວາມເຊື່ອໝັ້ນໃນການລົງທຶນຂອງນັກທຸລະກິດທັງພາຍໃນ ແລະ ຕ່າງປະເທດ, ທັງປະຢັດງົບປະມານລາຍຈ່າຍສໍາລັບຜູ້ຊົມໃຊ້ ແລະ ສາມາດສ້າງລາຍຮັບເຂົ້າລັດ ເຮັດໃຫ້ມີຄວາມໂປ່ງໃສ ກວດສອບໄດ້ ແລະ ຊ່ວຍປ້ອງກັນການສໍ້ລາດບັງຫລວງ.
（ແຫຼ່ງຂໍ້ມູນ： ຂປລ）
