 |
ທ່ານ ນາງປານີ ຢາທໍ່ຕູ້ ກ່າວສູນທອນພົດໄຂກອງປະຊຸມ.(ພາບ:ຫວາດ-ເກດ)
ທ່ານ ນາງປານີ ຢາທໍ່ຕູ້ ກ່າວສູນທອນພົດໄຂກອງປະຊຸມ ໂດຍລະບຸວ່າ: ກອງປະຊຸມຄັ້ງນີ້, ຈະໄດ້ຮັບຟັງ, ພິຈາລະນາ ແລະ ຮັບຮອງເອົາບັນຫາສໍາຄັນຕ່າງໆ ເປັນຕົ້ນແມ່ນການຈັດຕັ້ງປະຕິບັດວຽກງານທີ່ພົ້ນເດັ່ນປະຈຳປີ 2018 ແລະ ທິດທາງວຽກງານຈຸດສຸມໃນປີ 2019 ຂອງລັດຖະບານ; ສະພາບການຈັດຕັ້ງປະຕິບັດແຜນພັດ ທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ແຜນເງິນຕາປີ 2018, ທິດທາງແຜນການປີ 2019 ແລະ ບົດລາຍງານການສະຫລຸບຂາດຕົວ ການຈັດຕັ້ງປະຕິບັດແຜນງົບປະມານແຫ່ງລັດ ປະຈຳປີ 2017; ພິຈາລະນາ, ຮັບຮອງເອົາການຊີ້ແຈງຂອງກະຊວງໂຍທາທິການ ແລະ ຂົນສົ່ງ ກ່ຽວກັບສະພາບການກໍ່ສ້າງ ແລະ ສ້ອມແປງຖະໜົນຫົນທາງ ເພາະໃນໄລຍະຜ່ານມາເຫັນວ່າ ຄຸນນະພາບຂອງການກໍ່ສ້າງຕ່ຳ, ມູນຄ່າການກໍ່ສ້າງສູງ, ແກ່ຍາວເວລາກໍ່ສ້າງ ແລະ ການຊີ້ແຈງຂອງກະຊວງສາທາລະນະສຸກ ກ່ຽວກັບຄຸນນະພາບຂອງການບໍລິການ ການປິ່ນປົວຢູ່ໃນໂຮງໝໍ ແລະ ສຸກສາລາ.
 |
ກອງປະຊຸມ ຍັງຈະໄດ້ພິຈາລະນາ, ຮັບຟັງບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດມະຕິຂອງກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ VIII.(ພາບ:ຫວາດ-ເກດ)
ກອງປະຊຸມ ຍັງຈະໄດ້ພິຈາລະນາ, ຮັບຟັງບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດມະຕິຂອງກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ VIII ວ່າດ້ວຍການພັດທະນາຊົນນະບົດ ແລະ ລຶບລ້າງຄວາມທຸກຍາກ ຕິດພັນກັບເປົ້າໝາຍການພັດທະນາແບບຍືນຍົງ; ພິຈາລະນາ, ຮັບຮອງເອົາການແຕ່ງຕັ້ງ ຜູ້ວ່າການທະນາຄານ ແຫ່ງ ສປປ ລາວ ແລະ ພິຈາລະນາ, ຮັບຮອງກ່ຽວກັບການຄົ້ນຄວ້າຊື່ເອີ້ນຊົນເຜົ່າບຣູ. ພ້ອມນີ້, ຍັງພິຈາລະນາ ແລະ ຮັບຮອງເອົາບົດລາຍງານຂອງອົງການກວດສອບແຫ່ງລັດ ກ່ຽວກັບການຈັດຕັ້ງປະຕິບັດແຜນການ ເຄື່ອນໄຫວວຽກງານປະຈຳປີ 2018 ແລະ ທິດທາງແຜນການປະຈຳປີ 2019; ບົດລາຍງານຜົນການກວດສອບບົດສະຫລຸບຂາດຕົວ ການຈັດຕັ້ງປະຕິບັດແຜນງົບປະມານແຫ່ງລັດປະຈຳປີ 2017 ແລະ ບົດລາຍງານຂອງອົງການກວດກາລັດຖະບານ ກ່ຽວກັບການກວດກາຕາມ ຜົນການກວດສອບບົດສະຫລຸບຂາດຕົວ ການຈັດຕັ້ງປະຕິບັດແຜນງົບປະມານແຫ່ງລັດສົກປີ 2015-2016; ພິຈາລະນາ, ຮັບຮອງເອົາບົດລາຍງານຂອງໄອຍະການປະຊາຊົນສູງສຸດ ກ່ຽວກັບການຈັດຕັ້ງປະຕິບັດ ແຜນການເຄື່ອນໄຫວວຽກງານກາງສະໄໝ (2016-2018), ການເຄື່ອນໄຫວວຽກງານ 9 ເດືອນ ປະຈຳປີ 2018, ທິດທາງແຜນການຮອດປີ 2020 ແລະ ວຽກງານຈຸດສຸມ ປະຈຳປີ 2019; ພິຈາລະນາ, ຮັບຮອງເອົາບົດລາຍງານຂອງສານປະຊາຊົນສູງສຸດ ກ່ຽວກັບການຈັດຕັ້ງປະຕິບັດແຜນການເຄື່ອນ ໄຫວວຽກງານກາງສະໄໝ (2016-2018), ການເຄື່ອນໄຫວວຽກງານ 9 ເດືອນ ປະຈຳປີ 2018, ທິດທາງແຜນການຮອດ 2020 ແລະ ວຽກງານຈຸດສຸມປະຈຳປີ 2019 ແລະ ພິຈາລະນາ, ຮັບຮອງເອົາການຊີ້ແຈ້ງຂອງອົງ ການໄອຍະການປະຊາຊົນສູງສຸດ ກ່ຽວກັບການຈັດຕັ້ງປະຕິບັດພາລະບົດບາດ ໃນການຕິດຕາມກວດ ກາ ການລະເມີດສັນຍາກູ້ຢືມທີ່ມີຫລັກຊັບຄ້ຳປະກັນ ມາດຳເນີນຄະດີອາດຍາໃນຂໍ້ຫາສໍ້ໂກງຊັບຂອງພົນລະເມືອງ.
ກອງປະຊຸມ ຈະໄດ້ພິຈາລະນາ, ຮັບຮອງເອົາບົດລາຍງານ ກ່ຽວກັບການເຄື່ອນໄຫວວຽກງານຂອງສະພາແຫ່ງຊາດ ຊຸດທີ VIII ກາງສະໄໝ (2016-2018), ປະຈຳປີ 2018, ທິດທາງແຜນການແຕ່ ປີ 2019 ຮອດກອງປະຊຸມຄັ້ງປະຖົມມະລືກ ຂອງສະພາແຫ່ງຊາດຊຸດທີ IX ແລະ ແຜນວຽກຈຸດສຸມປະຈຳປີ 2019 ຂອງສະພາແຫ່ງຊາດ; ພິຈາລະນາ, ຮັບຮອງເອົາແຜນການສ້າງ ແລະ ປັບປຸງກົດໝາຍຂອງສະພາແຫ່ງຊາດ ປະຈຳປີ 2019 ແລະ ແຜນການຕິດຕາມກວດກາ ຂອງຄະນະປະຈຳສະພາແຫ່ງຊາດ ປະຈຳປີ 2019. ນອກນັ້ນ, ຈະໄດ້ພິຈາລະນາ ແລະ ຮັບຮອງ ການສ້າງ ແລະ ປັບປຸງຮ່າງກົດໝາຍ ຈຳນວນ 8 ສະບັບ ຄື: ຂົງເຂດເສດຖະກິດ 4 ສະບັບ, ວັດທະນະທຳ-ສັງຄົມ 2 ສະບັບ, ຂົງເຂດປົກຄອງ ແລະ ຍຸຕິທຳ 1 ສະບັບ ແລະ ຂົງເຂດຕ່າງປະເທດ 1 ສະບັບ.
ທ່ານ ນາງ ປານີ ຢາທໍ່ຕູ້ ກ່າວຕື່ມວ່າ: ບັນດາເນື້ອໃນ ທີ່ນຳມາພິຈາລະນາ ແລະ ຮັບຮອງ ໃນກອງປະຂຸມເທື່ອນີ້ ລ້ວນແຕ່ມີຄວາມສຳຄັນທີ່ເປັນພື້ນຖານຂອງຊາດໃນການສືບຕໍ່ຈັດຕັ້ງຜັນຂະ ຫຍາຍມະຕິ X ຂອງພັກ ກໍຄືແຜນພັດທະນາເສດຖະກິດ-ສັງຄົມ, ແຜນງົບປະມານ 5 ປີໃຫ້ເປັນແຜນລະອຽດສຳລັບປີ 2019.
（ແຫຼ່ງຂໍ້ມູນ： ຣາຊະວົງ/ຂປລ）
