 |
ທ່ານ ພົນໂທ ແສງນວນ ໄຊຍະລາດ ເລຂາຄະນະພັກສະພາແຫ່ງຊາດ ຮອງປະທານສະພາແຫ່ງຊາດກ່າວຄຳເຫັນທີ່ກອງປະຊຸມ.
ພາຍຫຼັງບັນດາຜູ້ແທນທີ່ກອງປະຊຸມໄດ້ຂື້ນລາຍງານແລ້ວ ທ່ານ ພົນໂທ ແສງນວນ ໄຊຍະລາດ ໄດ້ຂຶ້ນມີຄຳເຫັນໂອລົມ, ໂດຍເນັ້ນໃຫ້ຄະນະພັກ, ການນຳຫລັກແຫລ່ງ ຂອງສະພາແຫ່ງຊາດ ເອົາໃຈໃສ່ ຈັດຕັ້ງປະຕິບັດມະຕິຂອງສູນກາງພັກ, ໂດຍສະເພາະ ບັນດາວຽກງານຈຸດສຸມຕ່າງໆ ໃຫ້ໄດ້ຮັບການຈັດຕັ້ງປະຕິບັດຢ່າງເປັນຮູບປະທຳ, ນຳເອົາຜົນປະໂຫຍດມາໃຫ້ປະເທດຊາດ ນັບມື້ນັບຫລາຍຂຶ້ນ, ຕັ້ງໜ້າເສີມຂະຫຍາຍມູນເຊື້ອປະຕິວັດ ອັນສະຫງ່າລາສີ ຂອງ ພັກ, ມີຄວາມສາມັກຄີ ເປັນເອກະພາບກັບຄະນະບໍລິຫານງານສູນກາງພັກ, ຢຶດໝັ້ນຫລັກການລວມສູນ ປະຊາທິປະໄຕ ນຳພາເປັນໝູ່ຄະນະ ແລະ ລະບຽບວິໄນ ຂອງພັກຢ່າງເຂັ້ມງວດ, ມີຄວາມ ຈົງຮັກ ພັກດີ ຕໍ່ຜົນປະໂຫຍດ ຂອງປະເທດຊາດ, ຂອງປະຊາຊົນ ແລະ ອື່ນໆ.
 |
ບັນຊາກາດກອງປະຊຸມ.
ໃນທີ່ປະຊຸມເຊື່ອມຊືມ ທ່ານ ນາງ ສີໃສ ລືເດດມູນສອນ ຮອງເລຂາຄະນະພັກສະພາແຫ່ງຊາດ, ຮອງປະທານສະພາແຫ່ງຊາດ ໄດ້ຂຶ້ນລາຍງານກ່ຽວກັບການຈັດຕັ້ງປະຕິບັດ ມະຕິກອງປະຊຸມຄົບຄະນະຂອງຄະນະ ບໍລິຫານງານສູນກາງພັກຄັ້ງທີ 5 ສະໄໝທີ X ແລະ ມະຕິກອງປະຊຸມໃຫຍ່ຄັ້ງທີ X ຂອງພັກ ໃນໄລຍະຜ່ານມາ ແລະ ໜ້າທີ່ຈຸດສຸມໃນຕໍ່ໜ້າ.
ຫລັງຈາກນັ້ນ, ທ່ານ ເອກສະຫວ່າງ ວົງວິຈິດ ຄະນະປະຈຳສະພາແຫ່ງຊາດ, ປະທານກຳມາທິການແຜນການ, ການເງິນ ແລະ ການກວດສອບ ກໍໄດ້ຂຶ້ນເຜີຍແຜ່ມະຕິກອງປະຊຸມຄົບຄະນະ ຂອງຄະນະບໍລິຫານງານສູນກາງພັກ ປະຊາຊົນ ປະຕິວັດລາວ ຄັ້ງທີ 6 ສະໄໝທີ X ແລະ ຮັບຟັງການເຜີຍມະຕິ ຂອງຄະນະບໍລິຫານງານສູນກາງພັກ ປະຊາຊົນ ປະຕິວັດລາວ ວ່າດ້ວຍການຍົກສູງປະສິດ ທິພາບການຄຸ້ມຄອງລັດ, ຄົມຄອງສັງຄົມດ້ວຍກົດໝາຍ. ທັງນີ້, ແນໃສ່ເຮັດໃຫ້ສະມາຊິກພັກ, ພະນັກງານ-ລັດຖະກອນ ພາຍໃນສະພາແຫ່ງຊາດເຊື່ອມຊຶມ, ກຳໄດ້ບັນດາເນື້ອໃນຈິດໃຈມະຕິ, ຄຳສັ່ງ ຂອງຄະນະບໍລິຫານງານສູນກາງພັກ ໂດຍສະເພາະມະຕິ 6 ສະໄໝທີ X ຂອງພັກ ແລະ ອື່ນໆ.
（ຫັດທະບູນ）
