 |
ກອງປະຊຸມລັດຖະບານ ສະໄໝສາມັນປະຈໍາເດືອນ ມິຖຸນາ ຮັບຮອງ 4 ບັນຫາສຳຄັນເພື່ອກະຕຸ້ນເສດຖະກິດ.
ກອງປະຊຸມລັດຖະບານ ສະໄໝສາມັນປະຈໍາເດືອນ ມິຖຸນາ 2018 ໄດ້ດໍາເນີນແຕ່ວັນທີ 25-26 ມິຖຸນາ 2018 ທີ່ສໍານັກງານນາຍົກລັດຖະມົນຕີ, ພາຍໃຕ້ການເປັນປະທານຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ ເຊິ່ງໄດ້ມີການປຶກສາຫາລື ແລະ ພິຈາລະນາຮັບຮອງເອົາ ບັນດາເອກະສານສໍາຄັນຈໍານວນ 4 ລາຍການ ເຊັ່ນ: ບົດລາຍງານກ່ຽວກັບການຄຸ້ມຄອງລາຄາສິນຄ້າ ແລະ ຄ່າບໍລິການ; ແຜນການຈັດຕັ້ງປະຕິບັດມາດຕະການ ໃນການກະຕຸ້ນເສດຖະກິດ ໃນໄລຍະ 6 ເດືອນທ້າຍປີ 2018; ນະໂຍບາຍຂອງລັດຖະບານ ກ່ຽວກັບການພັດທະນາລັດວິສາຫະກິດ ແລະ ການຜະລິດເປັນສິນຄ້າ ຂອງ ສະຫະກອນແບບໃໝ່; ບົດລາຍງານກ່ຽວກັບສະພາບການຈັດຕັ້ງ ປະຕິບັດ ການຜະລິດລະດູແລ້ງ ແລະ ແຜນການຊຸກຍູ້ການຜະລິດ ໃນລະດູຝົນ.
ຜ່ານການພິຈາລະນາຢ່າງເລິກເຊິ່ງ ກອງປະຊຸມໄດ້ຮັບຮອງ ແລະ ຊີ້ນໍາໃຫ້ບັນດາກະຊວງ ແລະ ອົງການລັດທຽບເທົ່າ ນໍາໄປປັບປຸງຕາມການປະກອບຄໍາເຫັນ ຂອງສະມາຊິກລັດຖະບານ ເປັນຕົ້ນ ແມ່ນ: ສຶບຕໍ່ເອົາໃຈໃສ່ຈັດຕັ້ງປະຕິບັດ ແຜນພັດທະນາເສດຖະກິດສັງຄົມແຫ່ງຊາດ ແລະ ແຜນ ງົບປະມານແຫ່ງລັດປະຈໍາປີ 2018; ບັນດາຄາດໝາຍ, ທິດທາງ ແລະ ວຽກຈຸດສຸມ ທີ່ກຳນົດ ໃນດຳລັດດັ່ງກ່າວ ໃຫ້ມີປະສິດທິຜົນ. ໃນນັ້ນ, ໄດ້ກໍານົດແຈ້ງບົດບາດໜ້າທີ່ ຂອງແຕ່ລະຂະແໜງ ທີ່ຈະເປັນເຈົ້າການຮັບຜິດຊອບ ຈັດຕັ້ງປະຕິບັດຢ່າງເອົາຈິງເອົາຈັງ; ລົງເລິກແກ້ໄຂບັນດາຂໍ້ຄົງຄ້າງ ແລະ ວຽກທີ່ຍັງຄ້າງຄາທີ່ຖອດຖອນໄດ້ໃນໄລຍະ 6 ເດືອນຕົ້ນປີ. ຈັດຕັ້ງປະຕິບັດ 8 ມາດຕະ ການກະຕູ້ນເສດຖະກິດ ກໍຄືການ ການສະກັດກັ້ນໄພເງິນເຟີ້ ແລະ ປັບປຸງນະໂຍບາຍເງິນຕາ; ປັບປຸງສະພາບແວດລ້ອມ ແລະ ອໍານວຍຄວາມສະດວກ ໃນການດຳເນີນທຸລະກິດ; ການສືບຕໍ່ ແກ້ໄຂໜີ້ສິນພາຍໃນ; ການເກັບລາຍຮັບ ແລະ ຄຸ້ມຄອງລາຍຈ່າຍ; ລວມທັງ ການພັດທະນາ ທຸລະກິດຂະໜາດນ້ອຍ ແລະ ຂະໜາດກາງ(SME) ແລະ ການສົ່ງເສີມການຜະລິດ, ການປັບປຸງໂຄງ ສ້າງການລົງທຶນ, ການຄຸ້ມຄອງທີ່ດິນ ແລະ ການເກັບລາຍຮັບຈາກທີ່ດິນ, ນະໂຍບາຍພັດທະນາ ລັດວິສາຫະກິດ ແລະ ສະຫະກອນຮູບແບບໃໝ່.
ການປະຕິບັດການຜະລິດລະດູແລ້ງ ແລະ ແຜນຊຸກຍູ້ການຜະລິດລະດູຝົນ ຍັງເປັນບັນຫາທີ່ສຳຄັນ ທີ່ລັດຖະບານໄດ້ມອບໃຫ້ກະຊວງກະສິກຳ ແລະ ປ່າໄມ້ ສືບຕໍ່ເປັນເຈົ້າການ ສົມທົບ ກັບພາກສ່ວນ ກ່ຽວຂ້ອງ ກວດຄືນບັນດານິຕິກໍາ, ກົນໄກ ຫລື ຂອດອຸດຕັນ ທີ່ສ້າງຄວາມຫຍຸ້ງຍາກ ຫລື ກີດຂວາງ ຕໍ່ປະສິດທິພາບຂອງການຜະລິດລະດູແລ້ງ ແລະ ລະດູຝົນ ໃນໄລຍະຜ່ານມາ ພ້ອມທັງຮີບຮ້ອນແກ້ໄຂ ໃຫ້ສໍາເລັດໂດຍໄວ ເປັນຕົ້ນ ລົງຊຸກຍູ້ສົງເສີມການຜະລິດລະດູຝົນ, ສົ່ງເສີມ ແລະ ດຶງດູດການລົງທຶນຈາກພາກເອກະຊົນ ພາຍໃນ ແລະ ຕ່າງປະເທດ ເຂົ້າມາໃນການຜະລິດ ປຸງແຕ່ງເປັນສິນຄ້າ. ຄຽງ ຄູ່ກັນນັ້ນ ໃຫ້ຊຸກຍູ້ປະຊາຊົນປູກເຂົ້າພັນພື້ນເມືອງ ຂອງທ້ອງຖິ່ນຕ່າງໆ ໃຫ້ສາມາດແຂ່ງຂັນກັບ ປະເທດ ອ້ອມຂ້າງ.
（ແຫຼ່ງຂໍ້ມູນ： ຂປລ）
