 |
ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ເປັນປະທານ.(ພາບ: ເກດສະຫນາ)
ໃນວັນທີ 5 ກໍລະກົດ 2018 ຢູ່ໂຮງແຮມດອນຈັນພາເລດ ໄດ້ຈັດກອງປະຊຸມທຸລະກິດລາວ ເພື່ອເສີມຂະຫຍານການຮ່ວມມື ລະຫວ່າງ ພາກລັດ ແລະ ພາກທຸລະກິດ ຄັ້ງທີ 11 ຂຶ້ນ, ເປັນກຽດເຂົ້າຮ່ວມ ຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ, ໄດ້ຮັບກຽດເປັນປະທານຮ່ວມ, ໂດຍທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກຳ ແລະ ການຄ້າ ແລະ ທ່ານ ອຸເດດ ສຸວັນນະວົງ ປະທານ ສຄອຊ, ມີບັນດາລັດຖະມົນຕີ ແລະ ຮອງລັດຖະມົນຕີ, ຜູ້ຕາງໜ້າຈາກພາກລັດຖະບານ, ພາກທຸລະກິດ, ອົງການຈັດຕັ້ງ ແລະ ຄູ່ຮ່ວມພັດທະນາ ເຂົ້າຮ່ວມ ຫລາຍກ່າວ 400ຄົນ.
ທ່ານ ນາງ ເຂັມມະນີ ພົນເສນາ ກ່າວວ່າ: ການຈັດກອງປະຊຸມໃນຄັ້ງນີ້, ກໍເພື່ອປຶກສາຫາລື ກ່ຽວກັບຄວາມຄືບໜ້າ ໃນການແກ້ໄຂບັນຫາ ຂໍ້ຫຍຸ້ງຍາກຕ່າງໆ ທີ່ພາກທຸລະກິດໄດ້ປະເຊີນຢູ່ ແລະ ແຜນການຂອງລັດຖະບາ ໃນການປັບປຸງສະພາບແວດລ້ອມ ຂອງການດຳເນີນທຸລະກິດໃນລາວ, ການປັບປຸງກົດໝາຍ ແລະ ກົດລະບຽບຕ່າງໆ ເປັນພຽງສ່ວນໜຶ່ງທີ່ຈຳເປັນ ຕໍ່ການຂະຫຍາຍຕົວ ຂອງພາກທຸລະກິດເທົ່ານັ້ນ, ສິ່ງສຳຄັນ ແມ່ນຕ້ອງຮັບ ປະກັນວ່າກົດໝາຍ ແລະ ລະບຽບການຕ່າງໆ ແມ່ນຈະໄດ້ຈັດຕັ້ງປະຕິບັດ ຢ່າງມີປະສິດທິພາບໃນທຸກລະດັບ, ການຄຸ້ມຄອງບໍລິຫານຂອງພາກລັດ ແລະ ກົນໄກການປຶກສາຫາລື ພາຍໃຕ້ກອງປະຊຸມ ທຸລະກິດລາວໃນຄັ້ງທີ 11 ນີ ຈະເປັນເຄື່ອງມືທີ່ສຳຄັນອີກຄັ້ງໜຶ່ງ ໃນການຕິດຕາມກວດກາ ການຈັດຕັ້ງປະຕິບັດກົດໝາຍ ແລະ ລະບຽບການຕ່າງໆ.
ທ່ານ ອຸເດດ ສຸວັນນະວົງ ກ່າວວ່າ: ບົດບາດຄວາມສຳຄັນຂອງກອງປະຊຸມທຸລະກິດລາວ ໃນການປັບປຸງສະພາບແວດລ້ອມຂອງທຸລະກິດ ຕັ້ງແຕ່ຜົນສຳເລັດຂອງກອງປະຊຸມຄັ້ງຜ່ານມາ ເຫັນວ່າ ຂະບວນການປຶກ ສາຫາລື ລະຫວ່າງ ພາກລັດ ແລະ ພາກທຸລະກິດ ແມ່ນໄດ້ຮັບການປັງປຸງໃຫ້ດີຂຶ້ນໃນທຸລະດັບ, ເປັນຕົ້ນ ພາກລັດໄດ້ເອົາໃຈໃສ່ ໃນການແກ້ໄຂບັນຫາຂອງພາກທຸລະກິດ ຢ່າງເປັນຮູບປະທຳ ແລະ ມີ 4 ບັນຫາບູລິມະສິດ ທີ່ໄດ້ຮັບ ການແກ້ ໄຂເກືອບສົມບູນ ແລະ ແຕ່ລະບັນຫາໄດ້ມີຄວາມຄືບໜ້າທີ່ດີ.
ສຳລັບກອງປະຊຸມໃນຄັ້ງນີ້, ມີ 3 ບັນຫາໃຫຍ່ ທີ່ໄດ້ຍົກຂຶ້ນມາປຶກສາຫາລືກັນ ເຊັ່ນ ບັນຫາອາກອນສຳລັບທຸລະກິດ ມີ 2 ບັນຫາ ຄື: ບັນຫາການສົ່ງຄືນເງິນອາກອນເພີ່ມ ແລະ ບັນຫາອາກອນຊົມໃຊ້ອິນເຕີເນັດ, ບັນຫາການອຳນວຍຄວາມສະດວກດ້ານການຄ້າ ແລະ ການຂົນສົ່ງໃນສປປ ລາວ ມີ 4ບັນຫາ ຄື: ບັນຫາການນຳເຂົ້າສິນຄ້າ ແລະ ວັດຖຸດິບ ທີ່ໄດ້ຮັບການຍົກເວັ້ນພາສີ ແລະ ອາ ກອນມູນຄ່າເພີ່ມພາຍໃຕ້ກົດໝາຍສົ່ງ ເສີມການລົງທຶນ ທີ່ຕ້ອງຜ່ານຫລາຍຂອດ ຫລາຍຂັ້ນຕອນ ແລະ ໃຊ້ເວລາດົນ, ການນຳເຂົ້າສິນຄ້າຜ່ານດ່ານປະເພນີ ທີ່ມີລັກສະນະການຄ້າ, ລາຄາຂົນສົ່ງສິນຄ້າພາຍໃນ ແລະ ຕ່າງປະເທດແພງ, ຂັ້ນຕອນການຂໍອະນຸຍາດ ຂົນສົ່ງສຳລັບ ການຂົນສົ່ງສິນຄ້າຜ່ານແດນ ແລະ ບັນຫາອຸປະສັກ ຕໍ່ການພັດທະນາຂະແໜງການທ່ອງທ່ຽວ.
ໃນກອງປະຊຸມທຸລະກິດລາວຄັ້ງນີ້, ຍັງໄດ້ຮັບຟັງການໂອ້ລົມຈາກ ທ່ານ ທອງລຸນ ສີສຸລິດ ນາຍົກລັດຖະມົນຕີ, ໂດຍໄດ້ເນັ້ນເຖິງຄວາມຈຳເປັນ ໃນການສົ່ງເສີມການພັດທະນາ ພາກທຸລະກິດໃຫ້ມີຄວາມເຂັ້ມແຂງ, ໂດຍຜ່ານຂະບວນການປັງປຸງກອບກົດໝາຍ ແລະ ລະບຽບການຕ່າງໆ ທີ່ຕິດພັນກັບການດຳເນີນທຸລະກິດ ໃນ ສປປ ລາວ. ທັງນີ້, ກໍເພື່ອໃຫ້ບັນລຸເປົ້າໝາຍການ ພັດທະນາດ້ານເສດ ຖະກິດ-ສັງຄົມ ແລະ ຈະນຳໃຊ້ກອງ ປະຊຸມທຸລະກິດລາວນີ້, ເປັນເວທີປຶກສາຫາລື ລະຫວ່າງ ພາກລັດ ແລະ ພາກທຸລະກິດ, ພ້ອມທັງໝູນໃຊ້ກອງປະຊຸມດັ່ງກ່າວ, ໃຫ້ມີປະສິດທິພາບ ແລະ ປະສິດທິຜົນໃນການກຳນົດ ແລະ ແກ້ໄຂບັນຫາທີ່ກ່ຽວ ຂ້ອງກັບການ ສ້າງຕັ້ງທຸລະກິດ ແລະ ຂໍ້ຫຍຸ້ງຍາກທີ່ເປັນອຸປະສັກ ໃນການຂະຫຍາຍທຸລະກິດໃນ ສປປ ລາວ ໄປພິຈາລະນາຕໍ່ໄປໃນອະນາຄົດ.
ໜຶ່ງໃນນັ້ນ, ທ່ານ ປອ. ໄຊບັນດິດ ຣາຊະພົນ, ຄະນະບໍລິຫານງານ ສຄອ ແຫ່ງຊາດລາວ, ປະທານສະມາຄົມຕັດຫຍິບລາວ, ຜູ້ອຳ ນວຍການບໍລິສັດ ກິວິ ຈຳກັດ ໄດ້ສະເໜີບາງຕອນສຳຄັນວ່າ: ໂດຍລວມແລ້ວກໍຍັງມີຫຼາຍຂອດຂັ້ນທີ່ເປັນສິ່ງທ້າທາຍຢູ່ ຜ່ານການລົງເກັບກຳຂໍ້ມູນຕົວຈິງຈາກຕົວແທນສະມາຄົມຂົນ ສົ່ງລະຫວ່າງປະເທດລາວ, ສະມາຄົມຕັດຫຍິບລາວ ແລະ ຜູ້ປະກອບການອື່ນໆ ເຫັນວ່າບາງກໍລະນີແມ່ນຍັງໃຊ້ເວລາຫຼາຍສົມຄວນເຖິງແມ່ນວ່າຈະມີການປະກອບເອກະ ສານຄົບຖ້ວນແລ້ວກໍ່ຕາມ.
ໃນນີ້, ການນຳເຂົ້າສິນຄ້າທີ່ໄດ້ຮັບການຍົກເວັ້ນພາສີ ແລະ ອາກອນມູນຄ່າເພີ່ມ ພາຍໃຕ້ກົດໝາຍສົ່ງເສີມການລົງທຶນຜ່ານມາ ແມ່ນກົມພາສີເປັນຜູ້ຮັບຜິດຊອບຫຼັກໃນການຄົ້ນຄວ້າເອກະສານ ເຊິ່ງໂດຍລວມສະ ເລ່ຍແມ່ນໃຊ້ເວລາ 2 ອາທິດ. ໃນປີ 2017 ແມ່ນໄດ້ມີການມອບວຽກງານການຂໍອະນຸຍາດແຜນນຳເຂົ້າ ຫຼື Master List ລົງທຶນເປັນຜູ້ຄົ້ນຄວ້າອະນຸມັດຂໍ້ຕົກລົງແຜນນຳເຂົ້າ ແລະ ຫຼັງຈາກຂໍ້ຕົກລົງອະນຸມັດແລ້ວກົມພາສີຈະເປັນຜູ້ຄຸ້ມຄອງການຫຼັກລົບແຜນ.
ຈາກສະພາບການຈັດຕັ້ງປະຕິບັດຜ່ານມາ ເຫັນວ່າການອະນຸມັດຂໍ້ຕົກລົງແຜນນຳເຂົ້າໂດຍກົມສົ່ງເສີມການລົງທຶນແມ່ນໃຊ້ເວລາຂ້ອນຂ້າງຫຼາຍ ເຊິ່ງມີຫຼາຍກໍລະນີທີ່ໃຊ້ເວລາເຖິງ 3 ເດືອນ ຈຶ່ງຈະສຳເລັດ ແລະ ບາງກໍລະນີຍັງບໍ່ສຳເລັດ.
ສ່ວນຂໍ້ສະເໜີວິທີແກ້ໄຂ ແມ່ນສະເໜີໃຫ້ກະຊວງແຜນການ ແລະ ການລົງທຶນ ຮີບຮ້ອນອອກຄຳແນະນຳກ່ຽວກັບການຈັດຕັ້ງປະຕິບັດນະໂຍບາຍສົ່ງເສີມການລົງທຶນ ແລະ ບັນຊີກິດຈະການສົ່ງເສີມທີ່ລະອຽດ. ເຊິ່ງໃນນີ້, ສະເໜີໃຫ້ມີການພິຈາລະນາຍົກເລີກການລະບຸດ່ານນຳເຂົ້າໃສ່ແຜນ Master List, ມີການກຳນົດຂັ້ນຕອນການພິຈາລະນາ, ການອະນຸມັດແຜນນຳເຂົ້າທີ່ຊັດເຈນ, ກຳ ນົດໄລຍະເວລາທີ່ເໝາະສົມ ແລະ ຫຼຸດຂັ້ນຕອນທີ່ບໍ່ຈຳເປັນລົງ. ພ້ອມກັນນັ້ນ, ກໍ່ສະເໜີໃຫ້ມີການປຶກສາຫາລືກັບພາກທຸລະກິດກ່ອນຮັບຮອງ ແລະ ປະກາດນຳໃຊ້ຄຳແນະນຳດັ່ງກ່າວ.
ທ່ານ ທອງລຸນ ສີສຸລິດ ນາຍົກລັດຖະມົນຕີໄດ້ມີຄໍາເຫັນຕໍ່ກອງປະຊຸມທຸລະກິດລາວຄັ້ງທີ11 ປີ 2018. ໃນນັ້ນ, ທ່ານໄດ້ເນັ້ນ 3 ບັນຫາຄື: ຖືເອົາກອງປະຊຸມທຸລະກິດລາວເປັນກົນໄກໃນການປັບປຸງການດໍາເນີນທຸລະກິດ, ປັບປຸງສະພາການຄ້າ ແລະ ອຸດສາຫະກຳແຫ່ງຊາດລາວ (ສຄອຊ) ແລະ ສະພາການຄ້າ ແລະ ອຸດສາຫະກຳຂອງບັນດາແຂວງ ເປັນຂົວຕໍ່ໃນການຮ່ວມມືກັນຢ່າງໜັກແໜ້ນ ແລະ ກໍານົດເປົ້າໝາຍຊັດເຈນໃນການເຄື່ອນໄຫວຂອງ ສຄອຊ ຢູ່ຕ່າງປະເທດ ເພື່ອດຶງດູດການລົງທຶນ ເພື່ອຢາກເຮັດໃຫ້ແຜນພັດທະນາເສດຖະກິດຂອງລັດຖະບານ ແລະ ວຽກງານໄປລວງດຽວກັນ ດັ່ງນີ້:
1). ສຶບຕໍ່ກົນໄກປືກສາຫາລືລະຫວ່າງພາກລັດ - ທຸລະກິດ ໂດຍຜ່ານກົນໄກກອງປະຊຸມທຸລະກິດລາວ ກົນໄກການພົບປະລະຫວ່າງລັດຖະບານ - ຂະແໜງການ, ພົບປະລະຫວ່າງພາກທຸລະກິດ ເພື່ອເປີດໂອ ກາດໃຫ້ທຸກພາກສ່ວນສະເໜີບັນຫາ. ໃນນັ້ນ, ບາງບັນຫາບັນດາຂະແໜງການຕ້ອງໄດ້ສະເໜີໄປເປັນລາຍລັກອັກສອນເພື່ອນໍາເຂົ້າກອງປະຊຸມຄະນະລັດຖະ ບານແກ້ໄຂບັນຫາ.
2). ປັບປຸງ ສຄອຊ ຕື່ມອີກ ລວມທັງ ສຄອ ຂັ້ນທ້ອງຖິ່ນໃຫ້ເຂັ້ມແຂງຂຶ້ນສາມາດເຮັດບົດບາດເປັນຂົວຕໍ່ທີ່ໜັກແໜ້ນ ແລະ ມີປະສິດທິຜົນໃນການຮ່ວມມືກັນຂອງພາກລັດ - ທຸລະກິດຢ່າງແທ້ຈິງ.
3). ໃຫ້ບັນດາຂະແໜງການຂອງລັດຖະບານ ສຄອຊ ຮ່ວມມືກັນເພື່ອຍົກລະດັບການພັດທະນາການເຄື່ອນ ໄຫວຂອງ ສຄອຊ ທີ່ອອກເຄື່ອນໄຫວຢູ່ຕ່າງປະເທດໃຫ້ຫຼາຍຂຶ້ນ ແລະ ມີເປົ້າໝາຍ ເພື່ອເປັນການດຶງດູດເອົາການລົງທຶນຈາກຕ່າງປະເທດເຂົ້າມາລົງທຶນໃນປະເທດເຮົາພ້ອມທັງເປັນການນໍາເອົາບົດຮຽນ ແລະ ຄວາມຮູ້ໃໝ່ໆ.
（ຫັດທະບູນ）
