 |
ພາບປະກອບ.
ກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ VIII ໄຂຂຶ້ນຢ່າງເປັນທາງການ ໃນຕອນເຊົ້າວັນທີ 5 ມິຖຸນາ 2018 ທີ່ຫ້ອງປະຊຸມສະພາແຫ່ງຊາດ (ຫລັກ 6) ນະຄອນ ຫລວງວຽງຈັນ, ໂດຍການເຂົ້າຮ່ວມຂອງການນໍາພັກ-ລັດຂັ້ນສູງ, ສະມາຊິກສະພາແຫ່ງຊາດທົ່ວປະເທດ ແລະ ພາກສ່ວນຕ່າງໆ ທີ່ກ່ຽວຂ້ອງ.
ພາຍຫລັງ ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ກ່າວສູນທອນພົດໄຂກອງປະຊຸມແລ້ວ, ບັນດາສະມາຊິກສະພາແຫ່ງຊາດ ແລະ ຜູ້ເຂົ້າຮ່ວມ ກໍຈະໄດ້ຮັບຟັງບົດລາຍງານຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ກ່ຽວກັບສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດປະຈໍາ 6 ເດືອນຕົ້ນປິີ 2018 ແລະ ທິດທາງວຽກງານຈຸດສຸມປະຈໍາ 6 ເດືອນທ້າຍປີ 2018, ມາດຕະການຊຸກຍູ້ ການຂະຫຍາຍຕົວຂອງເສດຖະກິດ, ການສົ່ງເສີມທຸລະກິດຂະໜາດນ້ອຍ-ຂະໜາດກາງ, ການສົ່ງເສີມການລົງທຶນພາຍໃນ ແລະ ຕ່າງປະເທດ, ການແກ້ໄຂບັນຫາໜີ້ສິນ, ການຈັດຕັ້ງປະຕິບັດມະຕິຂອງ ກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ VIII ຂໍ້ສະດວກ, ຂໍ້ຫຍຸ້ງຍາກ ແລະ ມາດຕະການແກ້ໄຂ ເພື່ອຮັບປະກັນ ໃຫ້ແກ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດປະຈໍາປີ 2018 ໃຫ້ບັນລຸຕາມຄາດໝາຍທີ່ວາງໄວ້, ຊຶ່ງຈະໄດ້ມີການຖ່າຍທອດສົດຜ່ານ ທາງສະຖາຍນີວິທະຍຸ ແລະ ໂທລະພາບ.
ຫລັງຈາກ ທ່ານ ນາຍົກລັດຖະມົນຕີລາຍງານແລ້ວ, ຕາງໜ້າຄະນະປະຈຳສະພາແຫ່ງຊາດ ກໍໄດ້ປະກອບຄຳເຫັນໃສ່ບົດລາຍງານດັ່ງກ່າວ, ຕໍ່ຈາກນັ້ນ ທ່ານປະທານກອງປະຊຸມ ກໍຈະມີຄໍາຖາມເຈາະຈີ້ມ ແລະ ໃຫ້ທິດຊີ້ນຳໃນການປະກອບຄໍາເຫັນ ຂອງບັນດາສະມາຊິກສະພາແຫ່ງຊາດ.
（ຫັດທະບູນ）
