 |
ກອງປະຊຸມເຜີຍແຜ່ແນະນຳຂໍ້ຕົກລົງ ວ່າດ້ວຍການຂຶ້ນທະບຽນວິສາຫະກິດຢູ່ທົ່ວນະຄອນຫຼວງວຽງຈັນ
ກອງປະຊຸມເຜີຍແຜ່ແນະນຳຂໍ້ຕົກລົງວ່າດ້ວຍການຂຶ້ນທະບຽນວິສາຫະກິດຢູ່ທົ່ວນະຄອນຫຼວງວຽງຈັນໄດ້ຈັດຂຶ້ນໂດຍເປັນປະທານຂອງທ່ານ ເບີລິນ ເພັດຈັນທະຣາດ ຫົວໜ້າພະແນກ ອຄ ນວ ມີທ່ານ ແກ້ວພິລາວັນ ອາໄພລາດ ຮອງເຈົ້າຄອງ ນວ ທ່ານ ພັນທອງ ພິດທຸມມາ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ບັນດາຮອງເຈົ້າເມືອງ ຫົວໜ້າຫ້ອງການ ອຄ ເມືອງ ແລະ ພະນັກງານວິຊາການເຂົ້າຮ່ວມ.
ເພື່ອເຮັດໃຫ້ການດຳເນີນທຸລະກິດມີຄວາມສະດວກ ແລະ ເອື້ອອຳນວຍແກ່ການຜະລິດທຸລະກິດ ພັກ ແລະ ລັດຖະບານ ໄດ້ໃຫ້ຄວາມສຳຄັນເປັນຢ່າງຍິ່ງ ເຊິ່ງການດຳເນີນທຸລະກິດທີ່ດີ ເປັນປັດໄຈພື້ນຖານໃນການສ້າງປະຊາກອນທຸລະກິດໃຫ້ເຕີບໃຫຍ່ເຂັ້ມແຂງດຶງດູດການລົງທຶນເຂົ້າໃນການພັດທະນາເສດຖະກິດຂອງປະເທດໃຫ້ມີຄວາມເຂັ້ມແຂງຍືນຍົງດ້ວຍຄວາມມຸ່ງໝັ້ນໃນການສ້າງບາດກ້າວບຸກທະລຸທັບມ້າງສິ່ງອັດຕັນຂັ້ນຂອດທີ່ເປັນອຸປະສັກກີດຂວາງກົດໜ່ວງສ້າງຄວາມລຳຄານແກ່ການປະກອບອາຊີບຂອງປະຊາຊົນບັນດາເຜົ່າແນໃສ່ພັດທະນາເສດຖະກິດໃຫ້ມີບາດກ້າວໃໝ່ທີ່ເປັນຮູບປະທຳຢ່າງແທ້ຈິງລັດຖະບານຈຶ່ງໄດ້ອອກຄຳສັ່ງເພື່ອປັບປຸງບັນດາລະບຽບການ ແລະ ກົນໄກປະສານງານໃນການດຳເນີນທຸລະກິດຢູ່ລາວທີ່ປະກອບດ້ວຍ 10 ຕົວຊີ້ວັດ (ຕາມມາດຕະຖານສາກົນ) ໃຫ້ດີຂຶ້ນເພື່ອສ້າງຄວາມສະດວກໃນການດຳເນີນທຸລະກິດຂອງປະເທດເຮົາໃຫ້ສາມາດເລື່ອນລະດັບຈາກ 3 ຕົວເລກໃນປັດຈຸບັນມາຢູ່ອັນດັບ 2 ຕົວເລກ ໜຶ່ງໃນ 10 ຕົວຊີ້ວັດທີ່ລະບຸໃນຄຳສັ່ງຂອງນາຍົກລັດຖະມົນຕີມີຕົວຊີ້ວັດກ່ຽວກັບ “ການເລີ່ມຕົ້ນທຸລະກິດ” ເຊິ່ງການຂຶ້ນທະບຽນວິສາຫະກິດເປັນຂອດສຳຄັນໜຶ່ງຂອງຕົວຊີ້ວັດດັ່ງກ່າວ.
ໃນໄລຍະຜ່ານມາກະຊວງອຸດສາຫະກຳ ແລະ ການຄ້າ ໃນຖານະຂະແໜງການທີ່ໄດ້ຮັບມອບໝາຍໃຫ້ເປັນໃຈກາງຮັບຜິດຊອບປະສານງານ ແລະ ປັບປຸງລະບຽບການກ່ຽວກັບຕົວຊີ້ວັດ “ການເລີ່ມຕົ້ນທຸລະກິດ” ໄດ້ໃຊ້ຄວາມພະຍາຍາມເພື່ອໃຫ້ຕົວຊີ້ວັດນີ້ມີການປ່ຽນແປງທີ່ດີຂຶ້ນເລີ່ມແຕ່ວັນທີ 1 ກຸມພາ 2019 ເປັນຕົ້ນໄປຈະໄດ້ຈັດຕັ້ງປະຕິບັດການແຈ້ງຂຶ້ນທະບຽນວິສາຫະກິດລະບົບໃໝ່ເຊິ່ງມີການປ່ຽນແປງ ຄື: ການຍົກເລີກແບບພິມທີ່ຕັ້ງສຳນັກງານ ແບບພິມກົດລະບຽບຂອງບໍລິສັດຈາກສຳນວນຄຳຮ້ອງລົບລ້າງໃບອະນຸຍາດຜະລິດປ້າຍໃບອະນຸຍາດຄວັດຕາປະທັບເຈົ້າໜ້າທີ່ ປກສ ໄດ້ກະຈາຍໜ່ວຍຄວັດຕາປະທັບລົງທ້ອງຖິ່ນເຈົ້າໜ້າທີ່ ປກສ ໄດ້ລົບລ້າງການລົງທະບຽນນຳໃຊ້ຕາປະທັບການແຈ້ງຂຶ້ນທະບຽນວິສາຫະກິດໄດ້ອອກເລກປະຈຳຕົວຜູ້ເສຍອາກອນພ້ອມທັງໝົດນີ້ມັນຈະຊ່ວຍເຮັດໃຫ້ເວລາສັ້ນລົງ ແລະ ຕົ້ນທຶນການເລີ່ມຕົ້ນທຸລະກິດຫຼຸດຄ່າໃຊ້ຈ່າຍ.
（ແຫຼ່ງຂໍ້ມູນ： vientianemai.net）
