ບົດບາດ ແລະ ຄວາມສຳຄັນ ຂອງການເຄື່ອນໄຫວການທູດ ໃນເວທີພາກພື້ນ ແລະ ສາກົນ

ສະຫາຍ ອານຸພາບ ວົງໜໍ່ແກ້ວ ກຳມະການສູນກາງຊາວໜຸ່ມປະຊາຊົນປະຕິວັດລາວ.

ໂອກາດດັ່ງກ່າວ, ສະຫາຍ ອານຸພາບ ວົງໜໍ່ແກ້ວ ກຳມະການສູນກາງຊາວໜຸ່ມປະຊາຊົນປະຕິວັດລາວ, ເລຂາຄະນະບໍລິຫານງານຊາວໜຸ່ມ ກະຊວງການຕ່າງປະເທດ ໄດ້ຍົກໃຫ້ເຫັນຜົນສຳເລັດ ແລະ ຄວາມສຳຄັນຂອງການເຄື່ອນໄຫວການທູດ ຂອງ ສປປ ລາວ ໃນໄລຍະຜ່ານມາ ຈົນເຖິງ ປັັດຈຸບັນ ພາຍໃຕ້ການປະຕິບັດນະໂຍບາຍການຕ່າງປະເທດຂອງພັກ ແລະ ລັດຖະບານ ທີ່ຖືກຕ້ອງ ແລະ ສອດຄ່ອງກັບການປ່ຽນແປງສະພາບການຂອງໂລກ ແລະ ພາກພື້ນ ໃນແຕ່ລະໄລຍະ, ແນໃສ່ສ້າງເງື່ອນໄຂ, ສະພາບແວດລ້ອມທີ່ເອື້ອອຳນວຍຄວາມສະດວກ ໃຫ້ແກ່ການປົກປັກຮັກສາ ແລະ ສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອງ.

ການປະກາດເອກະລາດ ເທື່ອທໍາອິດ ຂອງປະເທດລາວ ໃນວັນທີ 12 ຕຸລາ 1945 ແມ່ນໝາກຜົນ ແຫ່ງການຕໍ່ສູ້ ດ້ວຍກຳລັງອາວຸດ, ການຕໍ່ສູ້ ທາງດ້ານການເມືອງ ຂອງປະຊາຊົນ ລາວ ບັນດາເຜົ່າ ໂດຍນຳພາ ຂອງປະທານ ໄກສອນ ພົມວິຫານ ແລະ ປະທານ ສຸພານຸວົງ ຊຶ່ງເປັນຂີດໝາຍ ແຫ່ງການເລີ່ມຕົ້ນ ຂອງວຽກງານການຕ່າງປະເທດ ຂອງລາວ ຈົນເຖິງປະຈຸບັນ. ສະນັ້ນ, ໂດຍການ ຄົ້ນຄວ້າ ແລະ ສະເໜີ ຂອງກະຊວງການຕ່າງປະເທດ ແລະ ຄະນະພົວພັນ ຕ່າງປະເທດສູນກາງພັກ, ກົມການເມືອງສູນກາງພັກ ຈຶ່ງໄດ້ຕົກລົງ ເຫັນດີກຳນົດເອົາວັນທີ 12 ຕຸລາ 1945 ເປັນວັນການທູດລາວ ຢ່າງເປັນທາງການ.

ຕະຫຼອດໄລຍະ 73 ປີຜ່ານມາ ພາຍໃຕ້ການນຳພາ ອັນສະຫຼາດສ່ອງໃສ ແລະ ຖືກຕ້ອງ ຂອງພັກປະຊາຊົນປະຕິບັດລາວ, ຂະແໜງການຕ່າງປະເທດ ໄດ້ມີການເຕີບໃຫ່ຍ ຂະຫຍາຍຕົວ ເປັນກ້າວໆ ທັງດ້ານປະລິມານ ແລະ ຄຸນນະພາບ. ໂດຍຍຶດໝັ້ນ ແນວທາງການຕ່າງປະເທດ ສັນຕິພາບ ເອກະລາດ ມິດຕະພາບ ແລະ ການຮ່ວມມື ຢ່າງສະເໝີຕົ້ນ ສະເໝີປາຍ ແລະ ປະຕິບັດ ນະໂຍບາຍ ເປີດກວ້າງ ການພົວພັນຮ່ວມມື ແບບຫຼາຍທິດ, ຫຼາຍຝ່າຍ ແລະ ຫຼາຍຮູບແບບ ຕາມທິດນຳ “ເພີ່ມມິດ ຫຼຸດຜ່ອນສັດຕູ”. ປະຈຸບັນ ສປປ ລາວ ໄດ້ມີສາຍພົວພັນ ການທູດກັບ 138 ປະເທດ, ມີສາຍພົວພັນ ກັບ ພັກການເມືອງທົ່ວໂລກ 124 ພັກ, ມີສຳນັກງານ ຜູ້ຕາງໜ້າການທູດ ຂອງລາວ ຢູ່ຕ່າງປະເທດ 38 ແຫ່ງ.

ບັນຍາກກອງປະຊຸມເຜີຍແຜ່.

ພ້ອມດຽວກັນນັ້ນ, ກອງປະຊຸມຍັງໄດ້ຄົ້ນຄ້ວາ, ນຳສະເໜີ ແລະ ແລກປ່ຽນຄຳຄິດເຫັນ ກ່ຽວກັບບາງບັນຫາທີ່ພົ້ນເດັ່ນຂອງສາກົນ ແລະ ພາກພື້ນໃນປັດຈຸບັນ, ເພື່ອເຮັດໃຫ້ຜູ້ເຂົ້າຮ່ວມ ກໍຄືພະນັກ ງານຮຸ່ນສືບທອດໄດ້ຮັບຮູ້ ແລະ ເຂົ້າໃຈຢ່າງຖືກຕ້ອງ ກ່ຽວກັບບັນຫາຕ່າງໆ ທີ່ເກີດຂຶ້ນໃນໂລກ ແລະ ພາກພື້ນ.
ກອງປະຊຸມໄດ້ຮັບຟັງ ການປະກອບຄຳຄິດຄຳເຫັນ ກ່ຽວກັບບັນຫາຕ່າງໆ ທີ່ກ່ຽວຂ້ອງກັບວຽກງານການທູດ ຈາກບັນດາ ທ່ານເອກອັກຄະລັດຖະທູດອາວຸໂສ ທີ່ມີປະສົບການ ໃນການເຄື່ອນໄຫວວຽກງານການທູດສອງຝ່າຍ ແລະ ຫລາຍຝ່າຍ. ພ້ອມນັ້ນ, ບັນດາເອກອັກຄະລັດຖະທູດອາວຸໂສ ໄດ້ຍົກໃຫ້ເຫັນປະສົບການ ແລະ ບົດຮຽນ ກ່ຽວກັບການເຄື່ອນໄຫວວຽກງານການທູດຕົວຈິງ ແຕ່ລະໄລ ຍະເຊິ່ງ ເປັນປະສົບການ ແລະ ບົດຮຽນອັນລໍ້າຄ່າ ສຳລັບນັກການທູດຮຸ່ນສືບທອດ.

（ຫັດ​ທະ​ບູນ）