 |
ອາຊຽນ ຫາລືການນຳໃຊ້ຂໍ້ມູນຂ່າວສານພູມສາດອະວະກາດ
ກອງປະຊຸມຄັ້ງນີ້ເປັນຄັ້ງທີ 2 ໂດຍສືບຕໍ່ຈາກກອງປະຊຸມປີຜ່ານມາເຊິ່ງຈັດຢູ່ໃນຂອບໂຄງການຂອງຄະນະກໍາມະການອາຊຽນ ແລະ ຖືເປັນຄັ້ງທຳອິດຂອງ ສປປ ລາວ ທີ່ໄດ້ຮັບທຶນສະໜັບສະໜູນຈາກກອງທຶນອາຊຽນດ້ານວິທະຍາສາດເຕັກໂນໂລຊີ ແລະ ນະວັດຕະກຳ ພາຍຫຼັງກະຊວງວິທະຍາສາດ ແລະ ເຕັກໂນໂລຊີ ໄດ້ສ້າງຕັ້ງປີ 2011 ແລະ ເປັນການຈັດຕັ້ງປະຕິບັດ ແຜນປະຕິບັດງານອາຊຽນດ້ານວິທະຍາສາດເຕັກໂນໂລຊີ ແລະ ນະວັດຕະກຳ ແຕ່ ປີ 2016-2025 ກອງປະຊຸມຄັ້ງນີ້ ເປັນລັກສະນະຄົ້ນຄວ້າດ້ານທິດສະດີ ແລະ ການສຶກສາບົດຮຽນຕົວຈິງ ເຊິ່ງຈະມີຕົວຢ່າງຂໍ້ມູນຂອງຜູ້ຊ່ຽວຊານມາປະກອບ ແລະ ໄດ້ຮັບຄວາມສົນໃຈຈາກຜູ້ຊ່ຽວຊານສະເພາະຂົງເຂດດັ່ງກ່າວ ທັງເປັນການປະຕິບັດພັນທະຂອງ ສປປ ລາວ ໃນນາມເປັນສະມາຊິກອາຊຽນ ລວມເຖິງການຍາດແຍ່ງເອົາການຮ່ວມມື ສ້າງເຄືອຄ່າຍ ແລະ ການຮັດແໜ້ນຄວາມສາມັກຄີເປັນໜຶ່ງດຽວຂອງອາຊຽນ ແລະ ກັບອົງການຈັດຕັ້ງສາກົນ.
ເພື່ອເປັນເວທີໃຫ້ການແລກປ່ຽນຄວາມຄິດເຫັນປຶກສາຫາລືບັນຫາການຈັດຕັ້ງປະຕິບັດຕົວຊີ້ວັດ ຂອງການພັດທະນາແບບຍືນຍົງ ທີ່ ເປັນສິ່ງທ້າທາຍໃນປັດຈຸບັນການນຳໃຊ້ຂໍ້ມູນຂ່າວສານພູມມີສາດດ້ານຂໍ້ມູນສະຖິຕິເພື່ອຄວາມຍືນຍົງ ແລະ ການສະໜັບສະໜູນການປະຕິບັດເປົ້າໝາຍພັດທະນາແບບຍືນຍົງຂອງອົງການສະຫະປະຊາຊາດ.
（ແຫຼ່ງຂໍ້ມູນ： vientianemai.net）
