 |
ພາບປະກອບ
ຫວຽດນາມ ຈະທົດລອງພັດທະນາບັນດາລາຍການທ່ອງທ່ຽວອອກໄປຫາເກາະຕ່າງໆ,ເຂດທະເລຢູ່ຫ່າງໄກຈາກຝັ່ງສົມທົບກັບບັນດາການບໍລິການທາງທະເລອື່ນໆ, ພ້ອມກັນນັ້ນກໍ່ສົ່ງເສີມການໂຄສະນາກ່ຽວກັບການທ່ອງທ່ຽວ, ຫັນບັນດາຜະລິດຕະພັນ, ເຄື່ອງໝາຍທ່ອງທ່ຽວທາງທະເລເປັນຫຼາຍຮູບຫຼາຍແບບໂດຍມີການເຊື່ອມຕໍ່ກັບບັນດາລາຍການທ່ອງທ່ຽວສາກົນ. ຫວຽດນາມ ຈະພັດທະນາລະບົບທ່າກໍາປັ່ນທະເລຕາມແຜນຜັງສັງລວມ ແລະເຫັນດີເປັນເອກະພາບໃນຂອບເຂດທົ່ວປະເທດ ເພື່ອແນໃສ່ຕອບສະໜອງຄວາມຮຽກຮ້ອງຕ້ອງການຫັນປະເທດຊາດເປັນປະເທດອຸດສາຫະກໍາ ແລະທັນສະໄໝ; ສ້າງພື້ນຖານໂຄງລ່າງດ້ານເຕັກນິກເພື່ອເຊື່ອມໂຍງຢ່່າງວ່ອງໄວ ແລະມີກຳລັງແກ່ງແຍ້ງຢ່າງພຽງພໍໃນການເຄື່ອນໄຫວທ່າກໍາປັ່ນທະເລ ກັບປະເທດຕ່າງໆໃນພາກພື້ນ ແລະໃນໂລກ.
ຫວຽດນາມ ກໍ່ສຸມໃສ່ພັດທະນາການລ້ຽງປູກສິນທະເລຕາມທິດຜະລິດເປັນສິນຄ້າ, ທັນສະໄໝ, ນໍາໃຊ້ເຕັກໂລໂນຢີສູງ, ຍູ້ແຮງການພັດທະນາການຂຸດຄົ້ນສິນທະເລຢູ່ໄກຝັ່ງ, ຕິດພັນການຂຸດຄົ້ນແບບຍືນຍົງກັບການປົກປ້ອງ ແລະພັດທະນາແຫຼ່ງສິນໃນນໍ້າ. ຫວຽດນາມ ຈະສືບຕໍ່ກວດກາຄືນ, ສ້າງ ແລະຜັນຂະຫຍາຍບັນດາແຜນຮ່າງ, ໜ້າທີ່ໃນໂຄງການຈຸດສຸມສໍາຫຼວດຊັບພະຍາກອນ, ສິ່ງແວດລ້ອມທະເລ ແລະໝູ່ເກາະໂດຍພື້ນຖານ. ຜັນຂະຫຍາຍປະຕິບັດການວາງແຜນຜັງເຂດເສດຖະກິດ, ເຂດອຸດສາຫະກໍາ, ເຂດຕົວເມືອງແຄມທະເລ ເຊິ່ງຮັບປະກັນຕາມທິດຍືນຍົງ, ອີງໃສ່ລະບົບນິເວດ, ປັບຕົວໃຫ້ເໝາະສົມກັບການປ່ຽນແປງຂອງດິນຟ້າອາກາດ, ນໍ້າທະເລຍຶ່ງຂຶ້ນສູງ, ຕອບສະໜອງບັນດາຂໍ້ກໍານົດຂອງກົດໝາຍວ່າດ້ວຍການປົກປ້ອງສິ່ງແວດລ້ອມ.
ແຜນການສັງລວມຮອດປີ 2030, ວິໄສທັດຮອດປີ 2045 ໄດ້ຍົກອອກ 6 ເນື້ອໃນ, ມາດຕະການແກ້ໄຂກ່ຽວກັບການຄຸ້ມຄອງທະເລ ແລະມະຫາສະໝຸດ, ຄຸ້ມຄອງເຂດຝັ່ງທະເລ, ນັ້ນແມ່ນ: ການພັດທະນາເສດຖະກິດທະເລ, ແຄມທະເລ; ຍົກສູງຊີວິດການເປັນຢູ່ຂອງປະຊາຊົນ, ສ້າງວັດທະນະທໍາທະເລ, ສັງຄົມມີຄວາມຜູກພັນ, ເປັນມິດກັບທະເລ; ວິທະຍາສາດ, ເຕັກໂນໂລຢີ, ພັດທະນາແຫຼ່ງຊັບພະຍາກອນມະນຸດ; ສິ່ງແວດລ້ອມ, ການຮັບມືກັບໄພທໍາມະຊາດ, ການປ່ຽນແປງຂອງດິນຟ້າອາກາດ ແລະນໍ້າທະເລຍຶ່ງຂຶ້ນສູງ; ການຮັບປະກັນດ້ານປ້ອງກັນຊາດ, ປ້ອງກັນຄວາມສະຫງົບ, ການພົວພັນຕ່າງປະເທດ ແລະຮ່ວມມືກັບສາກົນ.
（ໄຊພອນ）
