 |
ພາບປະກອບ
ມາເຖິງປັດຈຸບັນ, ເຖິງວ່າ ຢູ່ ສປປ ລາວ ຍັງບໍ່ທັນກວດພົບກໍລະນີຜູ້ຕິດ ເຊື້ອພະຍາດ ໂຄວິດ-19, ແຕ່ເຈົ້າໜ້າທີ່ໆກ່ຽວຂ້ອງ ກໍໄດ້ປະສານສົມທົບກັນຢ່າງໃກ້ຊິດ ແລະ ເປັນປົກ ກະຕິ; ເຖິງວ່າປະຊາຊົນ ຈະມີຄວາມແຕກຕື່ນ ໃນໄລຍະເບື້ອງຕົ້ນ ຍ້ອນໄດ້ຮັບຂໍ້ມູນຂ່າວສານທີ່ເກີນຄວາມເປັນຈິງ, ແຕ່ປັດຈຸບັນ ປະຊາຊົນແມ່ນໄດ້ຮັບຮູ້ ຂໍ້ມູນທີ່ຖືກຕ້ອງຫລາຍຂຶ້ນ ຈາກພາກສ່ວນທີ່ກ່ຽວຂອງພາກລັດ ແລະ ອົງການຈັດຕັ້ງສາກົນ ອັນໄດ້ເຮັດໃຫ້ປະຊາຊົນ ມີຄວາມເຂົ້າໃຈຫລາຍຂຶ້ນ. ພ້ອມດຽວກັນນັ້ນ, ສປປ ລາວ ກໍໄດ້ຕິດຕາມສະພາບການ ແລະ ການແກ້ໄຂຂອງລັດຖະບານ ສປ ຈີນ ຢ່າງໃກ້ຊິດ, ພ້ອມທັງ ຕີລາຄາສູງຕໍ່ການຊີ້ນໍາ-ນໍາພາລະດັບສູງ ແລະ ທັນການຂອງ ພັກ ແລະ ລັດ ຖະບານ ສປ ຈີນ ເພື່ອສຸມທຸກກໍາລັງແຮງເຂົ້າ ໃນການຄວບຄຸມການລະບາດ ຂອງເຊື້ອໄວຣັດດັ່ງກ່າວ ຈົນສາມາດເຮັດໃຫ້ການລະບາດຖືກຈໍາກັດລົງ.
ສປປ ລາວ ກໍໄດ້ຈັດກິດຈະກໍາລະດົມທຶນ ເພື່ອນຳໄປຊ່ວຍເຫລືອ ແລະ ໃຫ້ກໍາລັງໃຈແກ່ປະຊາຊົນຈີນ ຜ່ານສະມາຄົມມິດຕະພາບ ລາວ-ຈີນ, ສະມາຄົມນັກສຶກສາລາວ ທີ່ເຄີຍໄປຮຽນ ຢູ່ສປ ຈີນ ແລະ ໜ່ວຍງານ ອື່ນໆ. ສໍາລັບ ບຸກຄົນໃດຕ້ອງການຢາກມີສ່ວນຮ່ວມ ໃນການບໍລິ ຈາກ ກໍສາມາດໄປບໍລິຈາກ ໄດ້ທີ່ກະຊວງພະລັງງານ ແລະ ບໍ່ແຮ່ ແລະ ຫ້ອງວ່າການນະຄອນຫລວງ, ສໍາລັບ ຕ່າງແຂວງ ກໍສາມາດໄປບໍລິຈາກໄດ້ທີ່ ພະແນກພົວພັນຕ່າງປະເທດ ແລະ ພະແນກພະ ລັງງງານ ແລະ ບໍ່ແຮ່ ໃນທົ່ວປະເທດ.
ຄະນະກໍາມະການ ສາທາລະນະສຸກ ຮ່ວມກັບ ສະຖານເອກອັກຄະລັດຖະທູດ ສປ ຈີນ ປະຈໍາລາວ ໄດ້ຈັດສໍາມະນາເພື່ອແລກປ່ຽນບົດຮຽນໃນວຽກງານ ການຄວບຄຸມ ພະຍາດໄວຣັສ ໂຄວິດ-2019 ໃນວັນທີ 21 ກຸມພາ 2020 ນີ້ທີ່ກະຊວງສາທາລະນະສຸກ, ນະຄອນຫລວງວຽງຈັນ. ທ່ານ ດຣ. ເນົາ ບຸດຕາ ກ່າວວ່າ: ລັດຖະບານ ແຫ່ງ ສປປ ລາວ ກໍຄືກະຊວງສາທາລະນະສຸກ ໄດ້ຖືສໍາຄັນການເຝົ້າລະວັງ ແລະ ປ້ອງກັນພະຍາດອັກເສບປອດສາຍພັນໃໝ່ໄວຣັສ ໂຄວິດ-2019 ຊຶ່ງສາມາດເກີດຂຶ້ນຢ່າງພາວະວິໄສ ບໍ່ແມ່ນຍ້ອນເຮົາມັກ ຫລື ບໍ່ມັກ. ແຕ່ເມື່ອມັນເກີດຂຶ້ນແລ້ວ ພວກເຮົາຕ້ອງສາມັກຄີກັນ ແລະ ພ້ອມກັນແກ້ໄຂ. ໃນນັ້ນອົງການອະນາໄມໂລກ ໄດ້ແຈ້ງໃຫ້ຮູ້ວ່າມາດຕະການທີ່ພັກ ແລະ ລັດຖະບານ ສປ ຈີນ ໄດ້ຕອບໂຕ້ຕໍ່ພະຍາດນີ້ ແມ່ນສຸດທີ່ຖືກຕ້ອງ ແລະ ມີປະສິດທິຜົນສູງ. ນອກຈາກຈະປົກປ້ອງສຸຂະພາບ ຂອງປະຊາຊົນຂອງຕົນແລ້ວ, ຍັງປົກປ້ອງປະຊາຊົນໂລກອີກດ້ວຍ.ຢູ່ ສປປ ລາວ ຍັງບໍ່ທັນມີກໍລະນີຜູ້ຕິດເຊື້ອພະຍາດນີ້ ໜຶ່ງໃນບັນດາສາເຫດ ກໍຍ້ອນມາດຕະການຂອງຝ່າຍຈີນໄດ້ຊ່ວຍກວດ, ກັນກອງຄົນໂດຍສານຈາກ ສປ ຈີນເຂົ້າມາລາວ ຊຶ່ງຝ່າຍຈີນໄດ້ອະນຸຍາດຜູ້ທີ່ເຂົ້າມາລາວ ແມ່ນຜູ້ທີ່ບໍ່ມີເຊື້ອໄວຣັສ ໂຄວິດ 2019.
（ໄຊພອນ）
