 |
ທ່ານ ຫງວ໋ຽນ ບ໋າຮຸ່ງ ເອກອັກຄະລັດຖະທູດ ຫວຽດນາມ ຜູ້ມີອຳນາດເຕັມ ປະຈຳ ສປປ ລາວ.
ນັກຂ່າວ: ສາຍພົວພັນລະຫວ່າງສອງປະເທດ ລາວ-ຫວຽດນາມ ແມ່ນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ, ມີໜຶ່ງບໍ່ມີສອງໃນໂລກນີ້. ສະເໜີທ່ານມີຄໍາເຫັນຕໍ່ຄວາມສໍາຄັນຂອງສາຍພົວພັນດັ່ງກ່າວ?
ທ່ານ ຫງວ໋ຽນ ບ໋າຮຸ່ງ: ຄວາມສໍາຄັນອັນພິເສດມີໜຶ່ງບໍ່ມີສອງຂອງສາຍພົວພັນ ລາວ-ຫວຽດນາມ, ນີ້ແມ່ນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງປະເທດຂອງພວກເຮົາ ແລະ ອາດຈະຢັ້ງຢືນໄດ້ວ່ານີ້ແມ່ນສາຍພົວພັນມີໜຶ່ງບໍ່ມີສອງໃນໂລກນີ້, ສະແດງໃຫ້ເຫັນການສະໜິດແໜ້ນ, ໄວ້ເນື້ອເຊື່ອໃຈເຊິ່ງກັນ ແລະ ກັນ ຢ່າງເລິກເຊິ່ງ. ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງ ລາວ-ຫວຽດນາມ ເປັນປັດໄຈເປັນຕາຍ ຂອງການປະຕິວັດຂອງສອງປະເທດ, ເປັນຊັບສົມບັດອັນລໍ້າຄ່າໄດ້ຮັບການກໍ່ຕັ້ງດ້ວຍເລືອດເນື້ອເຫື່ອແຮງຂອງພະນັກງານ, ນັກຮົບຂອງປະເທດຫລາຍຮຸ່ນຄົນ, ໄດ້ຮັບການສ້າງຕັ້ງໂດຍກົງຈາກປະທານ ໂຮ່ຈີີ່ມິງ, ປະທານ ໄກສອນ ພົມວິຫານ ແລະ ປະທານສຸພານຸວົງ ແລະ ໄດ້ຮັບການນໍາຫລາຍຮຸ່ນຄົນຂອງສອງປະເທດ ລາວ-ຫວຽດນາມ ເພີ່ມພູນຄູນສ້າງ ແລະ ປະຊາຊົນ, ພະນັກງານສະມາຊິກພັກຂອງສອງພັກ, ສອງປະເທດສືບຕໍ່ສູ້ຊົນ, ເພີ່ມພູນຄູນສ້າງ, ເພີ່ມທະວີໃນຫລາຍທົດສະວັດທີ່ຜ່ານມາ.
ອາດຈະເວົ້າໄດ້ວ່າ, ມາຮອດປັດຈຸບັນ, ຂ້າພະເຈົ້າໃນຖານະເປັນພະນັກງານການທູດຫລາຍປີ, ໄດ້ສັງເກດຫລາຍສາຍພົວພັນ, ໄດ້ປະກອບສ່ວນເຂົ້າໃນການສ້າງຕັ້ງຫລາຍສາຍພົວພັນອັນສໍາຄັນຂອງຫວຽດນາມ ກັບບັນດາປະເທດໃນໂລກນີ້, ແຕ່ວ່າບໍ່ມີສາຍພົວພັນໃດໃນໂລກນີ້ສາມາດປຽບທຽບກັບຄວາມມິດຕະພາບ, ສະເໝີຕົ້ນສະເໝີປາຍ, ເປັນຕາຍຮ່ວມກັນຄືສອງຊາດ ລາວ-ຫວຽດນາມ ໃນໄລຍະທີ່ຜ່ານມາ. ຂ້າພະເຈົ້າຂໍຍົກຕົວຢ່າງເພື່ອສາມາດເຫັນໄດ້ລວງເລິກຂອງສາຍພົວພັນ ລາວ-ຫວຽດນາມ, ເຊິ່ງບໍ່ມີຫລາຍຄົນທີ່ຊາບວ່າມີເທົ່າໃດບົດເພງສະແດງເຖິງຄວາມມິດຕະພາບ ລາວ-ຫວຽດນາມ. ຍາມຂ້າພະເຈົ້າເຮັດວຽກກັບບາງສະຫາຍການນໍາຂອງລາວ ຈໍານວນໜຶ່ງຂ້າພະເຈົ້າໄດ້ຊາບວ່າ ປັດຈຸບັນສອງປະເທດຂອງພວກເຮົາມີບົດເພງເວົ້າ ເຖິງຄວາມມິດຕະພາບ ລາວ-ຫວຽດນາມ ເກີນກວ່າ 200 ບົດເພງ. ຂ້າພະເຈົ້າສາມາດຢັ້ງຢືນໄດ້ວ່າ, ບໍ່ມີສາຍພົວພັນທີສອງໃດໃນໂລກນີ້, ລະຫວ່າງປະເທດໃດປະເທດໜຶ່ງ ເຊິ່ງມີຈໍານວນບົດເພງຫລາຍ ແລະ ເລິກເຊິ່ງຄືແນວນັ້ນ. ພວກເຮົາຍາມຟັງບົດເພງເວົ້າເຖິງຄວາມມິດຕະພາບ ລາວ-ຫວຽດນາມ ລ້ວນແຕ່ມີຄວາມຮູ້ສຶກຢ່າງເລິກເຊິ່ງ, ສະດຸ້ງໃຈ ແລະ ບັນດານັກແຕ່ງຂອງສອງ ປະເທດຍາມແຕ່ງບົດເພງດັ່ງກ່າວ ລ້ວນແຕ່ມີຄວາມຮູ້ສຶກຈາກຫົວໃຈ, ຈາກຄວາມຮັກແພງອັນເລິກເຊິ່ງ ຂອງມິດຕະພາບ ລາວ-ຫວຽດນາມ, ເພື່ອໃຫ້ພວກເຮົາສ້າງບົດເພງອັນລໍ້າຄ່າ ແລະ ພວກເຮົາຈະບໍ່ມີວັນຢຸດການຮ້ອງເພງເຫລົ່ານັ້ນ. ນອກຈາກນັ້ນ, ຍັງມີຫລາຍພັນບົດກະວີ, ເລື່ອງລາວ ເວົ້າເຖິງຄວາມມິດຕະພາບອັນຍິ່ງໃຫຍ່ລະຫວ່າງ ລາວ-ຫວຽດນາມ. ສະເພາະຂົງເຂດດັ່ງກ່າວໄດ້ສະແດງໃຫ້ເຫັນລວງເລິກ ຂອງສາຍພົວພັນລະຫວ່າງສອງພັກ, ສອງລັດ ຜ່ານໜັງສືພິມ, ໂທລະພາບ ຫລື ຜ່ານການສໍາພາດຂອງການນໍາຫວຽດນາມ, ການນໍາລາວ ຫລື ຂອງຂ້າພະເຈົ້າເອງ ໃນເມື່ອກ່ອນ. ການພົວພັນລະຫວ່າງພັກປະຊາຊົນປະຕິວັດລາວ ແລະ ພັກກອມມູນິດຫວຽດນາມ ເປັນປັດໄຈໃນການຕັດສິນໃຈນັບມື້ນັບເລິກເຊິ່ງ, ສະໜິດແໜ້ນ ແລະ ການໄວ້ເນື້ອເຊື່ອໃຈ ລະຫວ່າງສອງພັກນັບມື້ນັບພັດທະນາໝັ້ນຄົງ, ບໍ່ມີອິດທິກໍາລັງໃດ, ສາມາດຂັດຂວາງ ຫລື ແບ່ງແຍກຄວາມໄວ້ເນື້ອເຊື່ອໃຈລະຫວ່າງສອງພັກ, ສອງລັດ ແລະ ປະຊາຊົນສອງປະເທດຂອງພວກເຮົາ. ຄືດັ່ງທີ່ການ ນໍາຫລາຍຄົນຂອງສອງປະເທດໄດ້ຢັ້ງຢືນສາຍໃຈອັນເລິກເຊິ່ງລະ ຫວ່າງສອງປະເທດຂອງພວກເຮົາ, ນີ້ແມ່ນປັດໄຈສໍາຄັນທີ່ສຸດຕໍ່ກັບສອງປະເທດພວກເຮົາໃນຕໍ່ໜ້າ. ພວກເຮົາມີຄວາມເອກອ້າງທະນົງໃຈເບິ່ງຄືນອະດີດ, ປັດຈຸບັນກໍ່ຄືອະນາຄົດ ແລະ ເຊື່ອໝັ້ນວ່າສາຍພົວພັນພິເສດ, ຍິ່ງໃຫຍ່, ເລິກເຊິ່ງ ແລະ ໝັ້ນຄົງລະຫວ່າງສອງປະເທດ.
ນັກຂ່າວ: : ທ່ານເອກອັກຄະລັດຖະທູດມີຄໍາເຫັນຄືແນວໃດຕໍ່ສາຍພົວພັນ ລາວ-ຫວຽດນາມ ໃນ ອະນາຄົດ?
ທ່ານ ຫງວ໋ຽນ ບ໋າຮຸ່ງ: ສາຍພົວພັນລະຫວ່າງ ສອງປະເທດຂອງພວກເຮົາໄດ້ສ້າງຕັ້ງບົນພື້ນຖານໜັກແໜ້ນ, ປະຫວັດສາດມີຄວາມເລິກເຊິ່ງ ແລະ ປະຊາຊົນສອງປະເທດຂອງພວກເຮົາມີຄວາມສະໜິດແໜ້ນຄືແນວນັ້ນ, ຂ້າພະເຈົ້າມີຄວາມເຊື່ອໝັ້ນຕໍ່ອະນາຄົດນັບມື້ນັບດີງາມຂອງສາຍພົວພັນລະຫວ່າງສອງຊາດຂອງພວກເຮົາ, ພາຍໃຕ້ການນໍາພາຂອງພັກ ປະຊາຊົນປະຕິວັດລາວ ແລະ ພັກກອມມູນິດຫວຽດນາມ, ໄດ້ຮັບການສະໜັບສະໜູນຢ່າງໝົດຈິດໝົດໃຈຂອງປະຊາຊົນສອງປະເທດ, ຂອງພະນັກງານສະມາຊິກພັກ ແລະ ຄົນຮຸ່ນໜຸ່ມຂອງສອງປະເທດເຂົ້າໃຈຢ່າງຈະແຈ້ງ ແລະ ສືບຕໍ່ເພີ່ມພູນຄຸນສ້າງ, ຂ້າພະເຈົ້າເຊື່ອໝັ້ນວ່າອະນາຄົດສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານນັບມື້ນັບໄດ້ຮັບການພັດທະນາຢ່າງເລິກເຊິ່ງ ແລະ ໝັ້ນຄົງຕະຫລອດການ.
ນັກຂ່າວ: ໃນຖານະເປັນເອກອັກຄະລັດຖະທູດຫວຽດນາມ ປະຈຳລາວ, ທ່ານຈະຊຸກຍູ້ຄົນຮຸ່ນຕໍ່ໆໄປຄືແນວໃດ ເພື່ອປະຕິບັດບັນດາຂໍ້ຕົກລົງຂອງການນຳຂັ້ນສູງສອງປະເທດຢ່າງມີປະສິດຜົນ?
ທ່ານ ຫງວ໋ຽນ ບ໋າຮຸ່ງ: ໃນຖານະເປັນເອກອັກຄະລັດຖະທູດ ແຫ່ງ ສສ ຫວຽດນາມ ປະຈຳແຫ່ງ ສປປ ລາວ, ມີໜ້າທີ່ສຳຄັນໃນການປະສານສົມທົບ, ເສນາທິການ, ຊຸກຍູ້ ແລະ ຕິດຕາມການຈັດຕັ້ງ ປະຕິບັດຂໍ້ຕົກລົງຂັ້ນສູງຂອງສອງ ພັກ, ສອງປະເທດ. ທຸກໆປີ, ບົນພື້ນຖານ ສາຍພົວພັນພິເສດລະຫວ່າງສອງປະເທດ, ການນຳຂັ້ນສູງຂອງພວກເຮົາໄດ້ມີການພົບປະ ແລະ ສ້າງບັນດາຂໍ້ຕົກລົງທີ່ສຳຄັນ, ໃນນັ້ນມີບັນດາຂໍ້ຕົກລົງໃຫ້ແຕ່ລະປີ, ມີບັນດາຂໍ້ຕົກລົງມີລັກສະນະຍາວນານໃນໄລຍະການພັດທະນາຂອງສາຍພົວພັນສອງປະເທດ. ດັ່ງນັ້ນ, ການຈັດຕັ້ງປະຕິບັດບັນດາຂໍ້ຕົກລົງຂັ້ນສູງລະຫວ່າງ ລາວ-ຫວຽດນາມ ຢ່າງມີໄຊ ຈະມີຄວາມໝາຍສຳຄັນທີ່ສຸດໃນການປັບປຸງ, ເພີ່ມພູນຄູນສ້າງມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງຫວຽດນາມ ແລະ ລາວ. ຕ້ອງມີການປະສານສົມທົບຢ່າງແໜ້ນແຟ້ນກັບພາກສ່ວນຫລັກແຫລ່ງຂອງສອງປະເທດ, ບັນດາກະຊວງ, ຂະແໜງການ ແລະ ທ້ອງຖິ່ນໃນບາງວຽກຄືດັ່ງນີ້: (I) ເວົ້າສະເພາະ ແລະ ສະຖານທູດ ກໍ່ຄື ບັນດາອົງການຕາງໜ້າຂອງ ສສ ຫວຽດນາມ ປະຈຳລາວ ຕ້ອງມີການກຳແໜ້ນເນື້ອໃນຂອງຂໍ້ຕົກລົງຂັ້ນສູງ; (II) ຕິດຕາມການຈັດຕັ້ງປະຕິບັດບັນດາຂໍ້ຕົກລົງດັ່ງກ່າວຂອງກະຊວງ, ຂະແໜງການ ແລະ ທ້ອງຖິ່ນທີ່ ກ່ຽວຂ້ອງຂອງແຕ່ລະປະເທດ ແລະ ລາຍງານ, ເສນາທິການ, ສະເໜີຢ່າງທັນທີ່ກັບການນຳຂອງປະເທດ, ໂດຍກົງແມ່ນການນຳຂອງຫວຽດນາມ, ບັນດາກະຊວງ, ຂະແໜງການ ແລະ ທ້ອງຖິ່ນຂອງຫວຽດນາມ ກ່ຽວກັບການຈັດຕັ້ງປະຕິບັດບັນດາຂໍ້ຕົກລົງດັ່ງກ່າວ, ມີຫຍັງດີ, ມີຫຍັງບໍ່ດີ, ມີຫຍັງຕ້ອງປັບປຸງ ແລະ ເພີ່ມທະວີ; (III) ເຮັດວຽກໂດຍກົງກັບກະຊວງ, ຂະແໜງການ ແລະ ທ້ອງຖິ່ນ ຂອງສອງປະເທດເພື່ອຊຸກຍູ້ ແລະ ສືບຕໍ່ເປັນຂົວຕໍ່ລະຫວ່າງກະຊວງ, ຂະແໜງການ ແລະ ທ້ອງຖິ່ນຂອງສອງຝ່າຍ ເພື່ອຈັດຕັ້ງປະຕິບັດບັນດາຂໍ້ ຕົກລົງດັ່ງກ່າວໄດ້ດີ; (IV) ສືບຕໍ່ປະສານສົມທົບກັບບັນດາສະຫາຍ ລາວຢູ່ນະຄອນຫລວງວຽງຈັນ, ໂດຍສະເພາະແມ່ນກະຊວງ, ຂະແໜງ ການຕ່າງໆທີ່ຫລັກແຫລ່ງ, ຮັບຟັງຄຳເຫັນຂອງບັນດາສະຫາຍຕໍ່ກັບການຈັດຕັ້ງປະຕິບັດບັນດາຂໍ້ຕົກລົງດັ່ງກ່າວ ເພື່ອລາຍງານ, ສ່ອງແສງກັບການນຳຂອງຫວຽດນາມ ເພື່ອໃຫ້ມີການປັບປຸງ ຫລື ມີມາດຕະການເພີ່ມທະວີຢ່າງທັນການ ຫລື ບັນດາສະຫາຍການນຳຂັ້ນສູງສາມາດແລກປ່ຽນເຊິ່ງກັນ ແລະ ກັນ ຍາມມີຄວາມຈຳເປັນເພື່ອກະຕຸກຊຸກຍູ້ບັນຫາຕ້ອງຜັນຂະຫຍາຍ ໂດຍສະເພາະແມ່ນບັນຫາຕ່າງໆທີ່ມີຄວາມຫຍຸ້ງຍາກທາງດ້ານພາວະວິໄສ ແລະ ອັດຕະວິໄສຂອງແຕ່ລະຝ່າຍ.
ກ່ຽວກັບຮຸ່ນໜຸ່ມຂອງສອງປະເທດ, ຂ້າພະເຈົ້າສຸດທີ່ຊາບຊື້ງຄຳເວົ້າຂອງປະທານ ໄກສອນ ພົມວິຫານ ຖືຄົນຮຸ່ນໜຸ່ມແມ່ນ “ນົກອິນຊີຂອງຍຸກສະໄໝ” ບິນສູງ ແລະ ບິນໄກ, ນຳພາປະເທດຊາດມີຄວາມພັດທະນາ. ຄົນຮຸ່ນໜຸ່ມຂອງຫວຽດນາມ ແລະ ລາວ ຕ້ອງມີຄວາມເຂົ້າໃຈຢ່າງເລິກເຊິ່ງກ່ຽວກັບລັກສະນະອັນຍິ່ງໃຫຍ່, ຄວາມສາມັກຄີແບບພິເສດມີໜຶ່ງບໍ່ມີສອງລະຫວ່າງສອງຊາດ, ເພາະວ່ານີ້ແມ່ນອະນາຄົດຂອງປະເທດ, ອະນາຄົດຂອງສາຍພົວພັນດັ່ງກ່າວ. ຖ້າຄົນຮຸ່ນໜຸ່ມບໍ່ເຂົ້າໃຈຢ່າງເລິກເຊິ່ງ, ແທດຈິງ ແລະ ຈະແຈ້ງຕໍ່ກັບລັກສະນະເປັນຕາຍຂອງສາຍພົວພັນດັ່ງກ່າວ ອາດເຮັດໃຫ້ມີຄວາມຫຍຸ້ງຍາກໃນການຮັບຮູ້, ສືບທອດ ແລະ ເພີ່ມພູນຄຸນສ້າງສາຍພົວພັນດັ່ງກ່າວໃນອະນາຄົດ. ອາດຈະຢັ້ງຢືນໄດ້ວ່າການນຳຂອງສອງປະເທດສຸດທີ່ເອົາໃຈໃສ່ໃນບັນຫາດັ່ງກ່າວ ແລະ ໃນໄລຍະຜ່ານມາໄດ້ໃຊ້ເຫື່ອແຮງ, ເວລາຫລາຍສົມຄວນເພື່ອເຮັດວຽກງານເຜີຍແຜ່ໂຄສະນາຄວາມໝາຍສຳຄັນຂອງສາຍພົວພັນແບບພິເສດ ລາວ- ຫວຽດນາມ ໃຫ້ແກ່ຄົນຮຸ່ນໜຸ່ມສອງປະເທດ. ຂ້າພະເຈົ້າສຸດທີ່ດີໃຈໃນໄລຍະຜ່ານມາ ຂ້າພະເຈົ້າກໍ່ໄດ້ເຫັນຄົນຮຸ່ນໜຸ່ມສອງປະເທດເຂົ້າໃຈຖືກ, ເຂົ້າໃຈຈະແຈ້ງ ແລະ ປະກອບສ່ວນສຳຄັນເຂົ້າໃນສາຍພົວພັນດັ່ງກ່າວ. ຂ້າພະເຈົ້າເຊື່ອໝັ້ນວ່າ, ໃນອະນາຄົດຄົນຮຸ່ນໜຸ່ມຂອງພວກເຮົາຈະຮັບຮູ້ມູນເຊື້ອອັນລ້ຳຄ່ານີ້ ແລະ ສືບຕໍ່ສ້າງສາສາຍພົວພັນດັ່ງກ່າວນັບມື້ນັບພັດທະນາຄືດັ່ງຄວາມຫວັງຂອງການນຳສອງປະເທດ ແລະ ຄືດັ່ງຄຳເວົ້າຂອງປະທານ ໂຮ່ຈີ່ມິງ “ໝັ້ນຄົງຂະໜົງແກ່ນຕະຫລອດການ”.
ນັກຂ່າວ: ຄວາມໝາຍສຳຄັນ ຂອງການຢ້ຽມຢາມ ສປປ ລາວ ຢ່າງເປັນທາງການຂອງສະຫາຍ ຫງວຽນ ຝູ໋ ຈ້ອງ, ເລຂາທິການໃຫຍ່, ປະທານປະເທດແຫ່ງ ສສ ຫວຽດນາມ?
ທ່ານ ຫງວ໋ຽນ ບ໋າຮຸ່ງ: ນີ້ແມ່ນການເດີນທາງຢ້ຽມຢາມທາງຕ່າງປະເທດຄັ້ງທຳອິດຂອງສະຫາຍ ຫງວຽນ ຝູ໋ ຈ້ອງ ພາຍຫລັງສະພາແຫ່ງຊາດ ຫວຽດ ນາມ ເລືອກຕັ້ງເປັນປະທານປະເທດ ແຫ່ງ ສສ ຫວຽດນາມ. ພາຍຫລັງໄດ້ຮັບການເລືອກຕັ້ງເປັນປະທານປະເທດ, ສະຫາຍ ຫງວຽນ ຝູ໋ ຈ້ອງ ໄດ້ເລືອກປະເທດລາວ, ເປັນສະຫາຍອ້າຍນ້ອງສະໜິດສະໜົມທີ່ສຸດຂອງຫວຽດນາມ ເພື່ອມາຢ້ຽມຢາມ, ກ່ອນທີ່ຈະຢ້ຽມຢາມປະເທດອື່ນ, ນັບທັງປະເທດໃຫຍ່ຄື: ຈີນ, ອາເມລິກາ, ລັດເຊຍ, ຍີ່ປຸ່ນ. ການຢ້ຽມຢາມໃນຄັ້ງນີ້, ສະຫາຍ ຫງວຽນ ຝູ໋ ຈ້ອງ ແລະ ພັກກອມມູນິດ ຫວຽດນາມ ຢາກສົ່ງສານອັນສຳ ຄັນທີ່ສຸດມາຍັງອ້າຍນ້ອງລາວ, ປະຊາຊົນລາວ ທຸກຖ້ວນໜ້າວ່າຫວຽດນາມ ຈະສະເໝີຕົ້ນສະເໝີປາຍຍາມໃດກໍ່ຖືເປັນສຳຄັນ ແລະ ຈະເຮັດສຸດຄວາມສາມາດ ເພື່ອເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານນັບມື້ ນັບແຕກດອກອອກຜົນ. ນີ້ກໍ່ແມ່ນໂອກາດເພື່ອໃຫ້ສະຫາຍ ຫງວຽນ ຝູ໋ ຈ້ອງ ແລະ ສະຫາຍ ບຸນຍັງ ວໍລະຈິດ, ເລຂາທິການໃຫຍ່, ປະທານປະເທດ ແຫ່ງ ສປປ ລາວ ກໍ່ຄືບັນດາສະຫາຍການນຳຕ່າງໆຂອງລາວແລກ ປ່ຽນບາງບັນຫາອັນລະອຽດ ເພື່ອເພີ່ມທະວີການຮ່ວມມືໃນທຸກຂົງເຂດລະຫວ່າງສອງປະເທດນັບມື້ນັບເລິກເຊິ່ງ, ແທ້ຈິງ ແລະ ມີປະສິດທິຜົນກວ່າເກົ່າ, ຄືດັ່ງຄວາມຫວັງຂອງການນຳ ແລະ ປະຊາຊົນສອງປະເທດ. ຜ່ານການຢ້ຽມຢາມຄັ້ງນີ້, ຝ່າຍຫວຽດນາມ ກໍ່ຄື ສະຫາຍ ຫງວຽນ ຝູ໋ ຈ້ອງ ເອງຢາກສົ່ງສານໄປຍັງໂລກກ່ຽວກັບສາຍພົວພັນພິເສດມີໜຶ່ງບໍ່ມີສອງລະຫວ່າງສອງປະເທດລາວ ແລະ ຫວຽດນາມ , ເພື່ອໃຫ້ໂລກເຂົ້າໃຈວ່າລາວເປັນສາຍພົວພັນພິເສດທີ່ສຸດຂອງຫວຽດນາມ; ຫວຽດນາມ ແລະ ລາວ ຈະສືບຕໍ່ຮັດແໜ້ນການຮ່ວມມື, ສະໜິດຕິດແໜ້ນ, ໄວ້ເນື້ອເຊື່ອໃຈໃນສະພາບໂລກ ແລະ ພາກພື້ນມີຄວາມຜັນແປຢ່າງສັບສົນ. ເນື່ອງໃນໂອກາດນີ້, ສອງຝ່າຍຈະມີຫລາຍຂໍ້ຕົກລົງອັນສຳ ຄັນລະຫວ່າງສອງປະເທດ ເພື່ອໃຫ້ສາຍພົວພັນມີການພັດທະນາກວ່າເກົ່າ. ເວົ້າລວມແລ້ວ, ນີ້ແມ່ນການຢ້ຽມຢາມມີຄວາມສຳຄັນທີ່ສຸດ, ເຖິງແມ່ນວ່າ ສະຫາຍ ຫງວຽນ ຝູ໋ ຈ້ອງ ໃນຖານະເປັນເລຂາທິການໃຫຍ່ໄດ້ມາຢ້ຽມຢາມ ສປປ ລາວ ຫລາຍເທື່ອ.（ແຫຼ່ງຂໍ້ມູນ： ຂປລ）
