 |
ເລືອກຕັ້ງຢູ່ກຳປູເຈຍ.
ວັນທີ 29 ກໍລະກົດ 2018 ກຳປູເຈຍ ກຳລັງຈະມີການເລືອກຕັ້ງ. ນີ້ແມ່ນການເລືອກຕັ້ງທີ່ມີຄວາມໝາຍສຳຄັນສຳລັບປະເທດກຳປູເຈຍ. ດ້ວຍເປົ້າໝາຍນຳພາປະເທດກຳປູເຈຍ ສູ່ຄວາມພັດທະນາຢ່າງມີສະຖຽນລະພາບ ແລະ ຈະເລີນຮຸ່ງເຮືອງ, ພັກປະຊາຊົນກຳປູເຈຍ ໄດ້ປະກາດນະໂຍບາຍຂອງພັກ ໃນການລົງຫາສຽງຢູ່ຫຼາຍເຂດໃໝ່ ແລະ ໄດ້ຮັບການຕ້ອນຮັບຈາກປະຊາຊົນເປັນຈຳນວນຫຼວງຫຼາຍ.
ນະໂຍບາຍພັກໃນການຫາສຽງຂອງການເລືອກຕັ້ງໃໝ່ ຂອງພັກປະຊາຊົນ ກຳປູເຈຍກຳອຳນາດປະກອບມີ 11 ຂໍ້ດັ່ງນີ້: ເສີມສ້າງຄວາມສາມັກຄີ, ເຄົາລົບລັດຖະທຳມະນູນ, ປ້ອງກັນລະບອບຣາຊາທິປະໄຕ; ຍົກສູງປະຊາທິປະໄຕ, ເສລີພາບຫຼາຍພັກ; ຮັບປະກັນ-ເຄົາລົບສິດທິມະນຸດ, ຮັກສາກົດໝາຍ ແລະ ຄວາມເທົ່າທຽມກັນໃນສັງຄົມ; ປົກປັກຮັກສາຢ່າງແໜ້ນແກ່ນຄວາມເປັນເອກະລາດ ອະທິປະໄຕ ຜືນແຜ່ນດິນອັນຄົບຖ້ວນ, ມີສັນຕິພາບ ແລະ ປະເທດຊາດມີຄວາມສະຫງົບ; ພັດທະນາເສດຖະກິດ ບັດລຸໄດ້ລະດັບການເຕີບໂຕຍືນຍົງ 7%/ປີ ແລະ ແບ່ງປັນຢ່າງເທົ່າທຽມກັນຜົນສຳເລັດຂອງເສດຖະກິດດັ່ງກ່າວ, ພ້ອມກັນນັ້ນສືບຕໍ່ຮັກສາ ດັດສະນີການຫຼຸດຜ່ອນຄວາມທຸກຍາກຢູ່ທີ່ລະດັບ 1%/ປີ...
ກ່າວຄຳປາໄສທີ່ການຫາສຽງເລືອກຕັ້ງ ນາຍົກລັດຖະມົນຕີ ກຳປູເຈຍ ຮຸນເຊນ ຢືນຢັນວ່າ: “ທ່ານຖືເອົາສິດຜົນປະໂຫຍດຂອງປະຊາຊົນກຳປູເຈຍ ມາກ່ອນສະເໝີ ” ແລະ ຈະພະຍາຍາມ ຍຶດຖືແນວທາງນີ້ ຖ້າພັກປະຊາຊົນກຳປູເຈຍຂອງ ທ່ານຮຸນເຊນ ໄດ້ຮັບໄຊຊະນະໃນການເລືອກຕັ້ງຄັ້ງນີ້.
ການເລືອກຕັ້ງ ໃນວັນທີ 29 ກໍລະກົດ ທີ່ຈະມາເຖິງມີຄວາມໝາຍສຳຄັນ ຕໍ່ກັບປະເທດກຳປູເຈຍ ເພາະຈະກຳນົດວ່າພັກໃດຈະສືບຕໍ່ນຳພາປະເທດກຳປູເຈຍວັດທະນາຖາວອນ. ຄວາມຕ້ອງການຂອງ ປະຊະຊາຊົນກຳປູເຈຍ ແມ່ນຊີວິດການເປັນຢູ່ຂອງພວກເຂົາໄດ້ຮັບການເບິ່ງແຍງ, ຮັບປະກັນທາງດ້ານສັງຄົມ ແລະ ຊີວິດການເປັນຢູ່ດ້ານວັດຖຸກໍ່ຄືຈິດໃຈ.
ຄວາມເປັນຈິງກຳລັງພິສູດໃຫ້ເຫັນວ່າ: 39 ກວ່າປີທີ່ຜ່ານມາ ພັກປະຊາຊົນກຳປູເຈຍ ໄດ້ຮ່ວມສຸກຮ່ວມທຸກກັບປະຊາຊົນກຳປູເຈຍ, ຄວາມມານະພະຍາຍາມໃນການແກ້ໄຂຄວາມຫຍຸ້ງຍາກ ແລະ ລຳບາກ, ເພື່ອຍາດໄດ້ຜົນສຳເລັດເປັນປະຫວັດສາດ, ນຳພາປະເທດໃຫ້ຫຼຸດພົ້ນອອກຈາກເງົາມືດຂອງອາດີດ ແລະ ກ້າວໄປສູ່ການພັດທະນາ ອັນມີກຽດສະຫງ່າງາມໃນທຸກໆຂົງເຂດຄື: ມີສັນຕິພາບ, ເອກກະລາດ, ອະທິປະໄຕ ແລະ ຜືນແຜ່ນດິນອັນເປັນປຶກແຜ່ນ.
ປະຈຸບັນ ເສດຖະກິດກຳປູເຈຍ ພັດທະນາຢ່າງໝັ້ນຄົງ. 6 ເດືອນຕົ້ນປີ 2018 ສະພາບການເມືອງ-ສັງຄົມແມ່ນມີຄວາມ ໝັ້ນຄົງໂດຍພື້ນຖານ, ມີຄວາມສະຫງົບ ແລະ ເປັນລະບຽບຮຽບຮ້ອຍ ໃນທົ່ວສັງຄົມກຳປູເຈຍ. ເສດຖະກິດມະຫາພາກ ກຳປູເຈຍສືບຕໍ່ພັດທະນາຕາມທ່າອ່ຽງ ຂອງການຈະເລີນເຕີບໂຕ ໃນງວດ IV ປີ 2017, ຊີວິດການເປັນຢູ່ຂອງປະຊາຊົນນັບມື້ນັບໄດ້ຮັບການປັບປຸງ, ບັນດານະໂຍບາຍຊີວິດການເປັນຢູ່, ໄດ້ຮັບການເອົາໃຈໃສ່ ແລະ ໃຫ້ຄວາມສຳຄັນ.
ສືບຕໍ່ເປົ້າໝາຍ ແຜນນະໂຍບາຍໃໝ່ ຂອງພັກປະຊາຊົນກຳປູເຈຍຢືນຢັນວ່າ: ຈະໃຫ້ບູລິມະສິດກ່ຽວກັບສິດຜົນປະໂຫຍດ, ໂດຍສະເພາະແມ່ນຊົນຊັ້ນຊາວນາ ແລະ ກຳມະກອນ. ດ້ວຍການບໍ່ເກັບພາສີ ເຄື່ອງມືກະສິກຳຂອງຊາວນາ ເພື່ອເພີ່ມປະລິມານການຜລິດ ໃນຮູບແແບບຄອບຄົວ, ຊ່ວຍເຫຼືອແກ່ຊາວກະສິກອນເປີດກວ້າງການຜລິດກຳສິກຳ ແລະ ຊອກຫາແຫຼ່ງຕະຫຼາດຈຳໜ່າຍສິນຄ້າກຳສິກຳ ດ້ວຍລາຄ່າທີ່ເໝາະສົມ. ປະຊາຊົນບໍ່ມີທີ່ດິນປຸກສ້າງຈະໄດ້ຮັບທີ່ດິນ ເພື່ອກໍ່ສ້າງທີ່ຢູ່ອາໄສ ແລະ ເພີ່ມຄ່າຜລິດຜ່ານໂຄງການ ທີ່ດິນສົງເຄາະຂອງສັງຄົມ.
ພັກປະຊາຊົນກຳປູເຈຍ ມີນະໂຍບາຍເພີ່ມເງີນເດືອນໃຫ້ ກຳມະກອນ ແລະ ຊາວຜູ້ອອກແຮງງານ ດ້ວຍການເພີ່ມສະຫວັດດີການອື່ນໆ ເພື່ອເພີ່ມທະວີຍົກສູງຄຸນລັກສະນະຂອງວຽກງານ ແລະ ຮັບປະກັນວິຊາຊີບ ໃຫ້ກຳມະກອນ ແລະ ຊາວຜູ້ອອກແຮງງານ.
（ຫັດທະບູນ）
