 |
ໄຂກອງປະຊຸມກຸ່ມເຈົ້າໜ້າທີ່ອາວຸໂສປ້ອງກັນປະເທດ ອາຊຽນ.(ພາບ:baoquocte.vn)
ກອງປະຊຸມຖືກຈັດຂຶ້ນ ເພື່ອແນໃສ່ສ້າງສໍາເລັດບັນດາເອກະສານ, ເນື້ອໃນ ແລະ ວຽກງານກະກຽມ ໃຫ້ແກ່ບັນດາກອງປະຊຸມປ້ອງກັນປະເທດ ອາຊຽນ, ໃນນັ້ນມີກອງປະຊຸມເຈົ້າໜ້າທີ່ອາວຸໂສປ້ອງກັນປະເທດ ອາຊຽນ ((ADSOM), ກອງປະຊຸມລັດຖະມົນຕີກະຊວງປ້ອງກັນປະເທດບັນດາປະເທດ ອາຊຽນ ຄັ້ງທີ 14 (ADMM – 14) ແລະ ກອງປະຊຸມລັດຖະມົນຕີກະຊວງປ້ອງກັນປະເທດ ບັນດາປະເທດ ອາຊຽນ ເປີດກວ້າງ ຄັ້ງທີ 7 ((ADMM+ ຄັ້ງທີ 7).
ກ່ອນໜ້ານັ້ນ, ຕອນບ່າຍວັນທີ 8 ມັງກອນ, ທີ່ນະຄອນດ່ານັ້ງ, ທ່ານພົນຕີ ຫວູຈ໋ຽນຖັ໊ງ, ຫົວໜ້າກົມພົວພັນຕ່າງປະເທດ-ກະຊວງປ້ອງກັນປະເທດຫວຽດນາມ, ຫົວໜ້າຄະນະຜູ້ແທນຫວຽດນາມ ທີ່ກອງປະຊຸມໜ່ວຍງານວິຊາການເຈົ້າໜ້າທີ່ອາວຸໂສປ້ອງກັນປະເທດອາຊຽນ (ADSOM WG) ແລະກອງປະຊຸມໜ່ວຍງານວິຊາການເຈົ້າໜ້າທີ່ອາວຸໂສປ້ອງກັນປະເທດອາຊຽນເປີດກວ້າງ (ADSOM-Plus WG) ໄດ້ພົບປະສອງຝ່າຍກັບບັນດາຄະນະຜູ້ແທນອາຊຽນ ທີ່ເຂົ້າຮ່ວມກອງປະຊຸມ. ADSOM WG ແລະ ADSOM-Plus WG ແມ່ນບັນດາກອງປະຊຸມການທະຫານ-ການປ້ອງກັນຊາດທໍາອິດໃນປີຫວຽດນາມ ດໍາລົງຕໍາແໜ່ງເປັນປະທານອາຊຽນ 2020. ບັນດາກອງປະຊຸມນີ້ຈະຈັດຕັ້ງຢູ່ນະຄອນດ່ານັ້ງ ໃນລະຫວ່າງວັນທີ 9-11 ມັງກອນ 2020. ວຽກງານກະກຽມໃຫ້ແກ່ເຫດການທີ່ມີລັກສະນະເປີດສາກນີ້ໂດຍກົມພົວພັນຕ່າງປະເທດ-ອົງການປະຈໍາການຄະນະຊີ້ນໍາກະຊວງປ້ອງກັນປະເທດກ່ຽວກັບອາຊຽນ 2020 ພ້ອມກັບບັນດາອົງການກ່ຽວຂ້ອງຂອງກະຊວງປ້ອງກັນປະເທດດໍາເນີນຢ່າງຕັ້ງໜ້າ, ຮອບຄອບຖີ່ຖ້ວນ.
ບັນດາກອງປະຊຸມຄັ້ງນີ້ມີໜ້າທີ່ກະກຽມເນື້ອໃນໃຫ້ກອງປະຊຸມລັດຖະມົນຕີປ້ອງກັນປະເທດບັນດາປະເທດອາຊຽນ (ADMM) ຄັ້ງທີ 14 ແລະກອງປະຊຸມລັດຖະມົນຕີປ້ອງກັນປະເທດບັນດາປະເທດອາຊຽນເປີດກວ້າງ (ADMM+) ຄັ້ງທີ 7. ຍ້ອນເຫດນັ້ນ, ຜົນສໍາເລັດຂອງ ADSOM WG ແລະ ADSOM-Plus WG ຈະແມ່ນປະຖົມປັດໄຈສໍາຄັນປະກອບສ່ວນເຂົ້າໃນຜົນສຳເລັດລວມຂອງປີປະທານອາຊຽນ 2020, ພ້ອມທັງຢັ້ງຢືນບົດບາດ, ຖານະທີ່ຕັ້ງຂອງກອງທັບປະຊາຊົນຫວຽດນາມ ໃນການເຊື່ອມໂຍງເຂົ້າກັບສາກົນ.
（ໄຊພອນ）
